ବିସିସିଆଇ ଆପେକ୍ସ କାଉନ୍‌ସିଲ ବୈଠକ
8:41 amJuly 8, 2023July 8, 2023 / 02

ମୁମ୍ବାଇ, ୮।୭(ପି.ଟି.): ଗତ ଇଣ୍ଡିଆନ ପ୍ରିମିୟର ଲିଗ୍‌ (ଆଇପିଏଲ୍‌)ର ବହୁଚର୍ଚ୍ଚିତ ‘ଇମ୍ପାକ୍ଟ ପ୍ଲେୟର’ ନିୟମକୁ ଆସନ୍ତା ଅକ୍ଟୋବର ୧୬ରୁ ଆରମ୍ଭ ହେବାକୁଥିବା ସୟଦ ମୁସ୍ତାକ ଅଲି ଟି୨୦ ଟ୍ରଫିରେ ଲାଗୁ କରାଯିବ। ଶୁକ୍ରବାର ଏଠାରେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)ର ଆପେକ୍ସ କାଉନ୍‌ସିଲ ବୈଠକରେ ଏସମ୍ପର୍କିତ ପ୍ରସ୍ତାବ ଗୃହୀତ ହୋଇଯାଇଛି। ସୟଦ ମୁସ୍ତାକ ଅଲି ଟି୨୦ରେ ଗତବର୍ଷ ଲାଗୁ କରାଯାଇଥିଲା। ସେତେବେଳେ ଇମ୍ପାକ୍ଟ ପ୍ଲେୟର ୧୪ ଓଭର ଶେଷ ହେବା ପୂର୍ବରୁ ଖେଳିବାକୁ ଆସୁଥିଲେ। ଖେଳାଳିଙ୍କ ନାମ ଟସ୍‌ ପୂର୍ବରୁ ଘୋଷଣା କରାଯାଇଥିଲା। ଆସନ୍ତା ସିଜନରୁ କିନ୍ତୁ ଏଥିରେ ପରିବର୍ତ୍ତନ କରାଯିବ। ଆଇପିଏଲ୍‌ ଭଳି ଟିମ୍‌ଗୁଡ଼ିକ ଟସ୍‌ ପୂର୍ବରୁ ଚୂଡ଼ାନ୍ତ ଏକାଦଶ ଘୋଷଣା କରିବା ବ୍ୟତୀତ ସେମାନଙ୍କ ୪ ବଦଳ ଖେଳାଳିଙ୍କ ନାମ ଘୋଷଣା କରିବାକୁ ହେବ। ଉଭୟ ଦଳକୁ ଜଣେ ଇମ୍ପାକ୍ଟ ଖେଳାଳି ବ୍ୟବହାର ପାଇଁ ଅନୁମତି ରହିବ, କିନ୍ତୁ ଏହା ବାଧ୍ୟତାମୂଳକ ନୁହେଁ। ଇମ୍ପାକ୍ଟ ପ୍ଲେୟର ନିୟମକୁ ୧୦ ଆଇପିଏଲ୍‌ ଟିମ୍‌ ବ୍ୟବହାର କରିଥିଲେ। ଏହାକୁ ନେଇ କିନ୍ତୁ ଭିନ୍ନ ଭିନ୍ନ ମତ ଆସିଥିଲା। ଅଷ୍ଟ୍ରେଲିଆର ପୂର୍ବତନ ଅଧିନାୟକ ଓ ଦିଲ୍ଲୀ କ୍ୟାପିଟାଲ୍ସ ମୁଖ୍ୟ କୋଚ୍‌ ରିକି ପଣ୍ଟିଂ କହିଥିଲେ।
ଏହାଦ୍ୱାରା ଦଳରେ ଅଲରାଉଣ୍ଡରଙ୍କ ଭୂମିକା ଗୌଣ ହୋଇଯିବ। ସେମାନଙ୍କ ନିକଟରେ ଯଦି ଜଣେ ବିଶ୍ୱ ଶ୍ରେଣୀର ଅଲରାଉଣ୍ଡର ନ ଥିବେ ତେବେ ଜଣେ ବ୍ୟାଟର କିମ୍ବା ଜଣେ ବୋଲରଙ୍କୁ ବାଛିବାକୁ ପଡ଼ିବ। ଆପେକ୍ସ କାଉନ୍‌ସିଲ ଆହୁରି ମଧ୍ୟ ସେପ୍ଟେମ୍ବର-ଅକ୍ଟୋବରରେ ହାଙ୍ଗ୍‌ଝୋରେ ଏସିଆନ ଗେମ୍ସ ପାଇଁ ପୁରୁଷ ଓ ମହିଳା ଦଳର ଅଂଶଗ୍ରହଣ ପ୍ରସ୍ତାବକୁ ଅନୁମୋଦନ କରିଛି। ଏସିଆନ ଗେମ୍ସରେ ପୁରୁଷ ବିଭାଗ କ୍ରିକେଟ ପ୍ରତିଯୋଗିତା ସେପ୍ଟେମ୍ବର ୨୮ରୁ ଆରମ୍ଭ ହେବ। ଏଥିରେ ଭାରତର ଦ୍ୱିତୀୟ ଦଳ ଭାଗ ନେବ। କାରଣ ଭାରତରେ ଅକ୍ଟୋବର ୫ରୁ ଦିନିକିଆ ବିଶ୍ୱକପ୍‌ ଖେଳାଯିିବାର କାର୍ଯ୍ୟକ୍ରମ ରହିଛି।