ଚେନ୍ନାଇ, ୧୧ା୨- ଦେଶର ନୂଆ ପେସ ସେନସେଶନ ଟି. ନଟରାଜନଙ୍କୁ ବିଜୟ ହଜାରେ ଟ୍ରଫି ପାଇଁ ଘୋଷିତ ତାମିଲନାଡୁ ଦଳରୁ ରିଲିଜ କରିଦିଆଯାଇଛି। ଏହି ବାମ ହାତୀ ପେସରଙ୍କୁ ବିଶ୍ରାମ ଦେବାକୁ ତାମିଲନାଡୁ କ୍ରିକେଟ ଆସୋସିଏଶନ (ଟିଏନ୍ସିଏ) ନିକଟରେ ଅନୁରୋଧ କରିଥିଲେ ଟିମ୍ ଇଣ୍ଡିଆର ମ୍ୟାନେଜମେଣ୍ଟ ଓ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)।
ଇଂଲଣ୍ଡ ବିପକ୍ଷ ସୀମିତ ଓଭର କ୍ରିକେଟ ସିରିଜ୍ ପାଇଁ ଭାରତୀୟ ଦଳର ମ୍ୟାନେଜମେଣ୍ଟ ଓ ବିସିସିଆଇ ନଟରାଜନଙ୍କୁ ଚାହୁଁଛି। ଭାରତୀୟ ଦଳର ସ୍ବାର୍ଥକୁ ନଜରରେ ରଖି ଆମେ ଏଥିରେ ହଁ କହିଛୁ ବୋଲି ଟିଏନ୍ସିଏ ସମ୍ପାଦକ ଆର.ଏସ୍. ରାମାସାମୀ କହିଛନ୍ତି। ୨୦ ଜଣିଆ ତାମିଲ ନାଡୁ ଦଳରେ ନଟରାଜନଙ୍କ ବଦଳରେ ସ୍ଥାନ ପାଇଛନ୍ତି ଆର.ଏସ୍. ଜଗନାଥ ସିନିବାସ। ଉଲ୍ଲେଖଥାଉ କି, ଇଂଲଣ୍ଡ-ଭାରତ ଟି୨୦ ସିରିଜ୍ର ୫ ମ୍ୟାଚ୍ ଅହମ୍ମଦାବାଦଠାରେ ଖେଳାଯିବ।
