ନୂଆଦିଲ୍ଲୀ,୩ ।୨: ୨୦୦୨ ଗୁଜରାଟ ଦଙ୍ଗା ଉପରେ ନିର୍ମାଣ କରାଯାଇଥିବା ବିବିସି ଡକ୍ୟୁମେଣ୍ଟାରୀ ଉପରେ ରୋକ ଲଗାଇବା ମାମଲାରେ ଶୁକ୍ରବାର ସୁପ୍ରିମକୋର୍ଟ କେନ୍ଦ୍ରକୁ ନୋଟିସ ଜାରି କରିଛନ୍ତି । ଏହାସହ କୋର୍ଟ ସରକାରଙ୍କୁ ଡକ୍ୟୁମେଣ୍ଟାରୀକୁ ନେଇ କରାଯାଇଥିବା ଟୁଇଟକୁ ହଟାଇବାକୁ ନେଇ ଜାରି କରାଯାଇଥିବା ନିର୍ଦ୍ଦେଶର ଫାଇଲ ବି ମାଗିଛନ୍ତି । ଆସନ୍ତା ଏପ୍ରିଲରେ ମାମଲାର ପରବର୍ତ୍ତି ଶୁଣାଣି ହେବ ।
ଜଷ୍ଟିଶ ସଞ୍ଜିବ ଖାନ୍ନା ଓ ଏମ ଏମ ସୁନ୍ଦରେସଙ୍କ ବେଞ୍ଚ ସାମ୍ନାକୁ ଦୁଇଟି ଅଭିଯୋଗ ଶୁଣାଣି ପାଇଁ ଆସିଥିଲା । ପ୍ରଥମ ଆବେଦନ ବରିଷ୍ଠ ସାମ୍ବାଦିକ ଏନ ରାମ, ତ୍ରୁଣମୂଳ କଂଗ୍ରେସ ଏମପି ମହୁଆ ମୋଇତ୍ରୀ ଓ ଓକିଲ ପ୍ରଶାନ୍ତ ଭୂଷଣଙ୍କର ଥିଲା । ଏଥିରେ ଡକ୍ୟୁମେଣ୍ଟାରୀ ‘ଇଣ୍ଡିଆ: ଦ ମୋଦି କ୍ୱଶ୍ଚିନ’ଉପରେ ଲାଗିଥିବା ରୋକକୁ ବିରୋଧ କରାଯାଇଥିଲା । ଏହାସହ ଆବେଦନକାରୀଙ୍କ ପକ୍ଷରୁ ଏହାକୁ ନେଇ କରାଯାଇଥିବା ଟୁଇଟକୁ ହଟାଯାଇଥିବା କଥା ବି ଉଲ୍ଲେଖ କରାଯାଇଥିଲା । ଦ୍ୱିତିୟ ଆବେଦନ ଓକିଲ ଏମ ଏଲ ଶର୍ମାଙ୍କର ଥିଲା ।
