ନୂଆଦିଲ୍ଲୀ,୩୦।୧ : ଗୁଜରାଟ ଦଙ୍ଗା ଉପରେ ବିବିସି ଡକ୍ୟୁମେଣ୍ଟାରି ଉପରେ ହୋଇଥିବା ନିଷେଧାଦେଶର ଶୁଣାଣି କରିବାକୁ ସୁପ୍ରିମକୋର୍ଟ ରାଜି ହୋଇଛନ୍ତି। ଫେବୃଆରୀ ୬ରେ କୋର୍ଟ ଏହି ମାମଲାର ଶୁଣାଣି କରିବେ। ପ୍ରଧାନ ବିଚାରପତି ଡି.ଓ୍ବାଇ ଚନ୍ଦ୍ରଚ୍ୂଡ଼ଙ୍କ ନେତୃତ୍ୱରେ ଗଠିତ ଖଣ୍ଡପୀଠ ସମ୍ମୁଖରେ ମାମଲାର ଶୀଘ୍ର ଶୁଣାଣି ପାଇଁ ଆବେଦନକାରୀ ଏମ.ଏଲ ଶର୍ମା ଆବେଦନ କରିଛନ୍ତି। ଏହା ପରେ କୋର୍ଟ ଏହାକୁ ତାଲିକାଭୁକ୍ତ କରିବାକୁ ନିର୍ଦ୍ଦେଶ ଦେଇଛନ୍ତି।
ଆଇନଜୀବୀ ଏମ.ଏଲ ଶର୍ମା ତାଙ୍କ ଜନସ୍ବାର୍ଥ ମାମଲାରେ ଏକ ସାମ୍ବିଧାନିକ ପ୍ରଶ୍ନ ଉଠାଇଛନ୍ତି। ଏହି ଆବେଦନରେ ସେ ସର୍ବୋଚ୍ଚ ନ୍ୟାୟାଳୟଙ୍କୁ ଅନୁରୋଧ କରିଛନ୍ତି ଯେ ୨୦୦୨ ଗୁଜରାଟ ଦଙ୍ଗା ସମ୍ପର୍କରେ ଖବର, ତଥ୍ୟ ଏବଂ ରିପୋର୍ଟ ଦେଖିବାର ଅଧିକାର ସମ୍ବିଧାନର ଧାରା ୧୯ (୧) ଏବଂ (୨) ଅନୁଯାୟୀ ନାଗରିକମାନଙ୍କର ଅଛି କି ନାହିଁ।
ଏହି ଆବେଦନରେ ସେ ସୂଚନା ଓ ପ୍ରସାରଣ ମନ୍ତ୍ରଣାଳୟର ୨୧ ଜାନୁୟାରୀ ୨୦୨୩ ରେ ବିବିସି ଡକ୍ୟୁମେଣ୍ଟାରିକୁ ବାରଣ କରିବାକୁ ବେଆଇନ, ଅଣସାମ୍ବିଧାନିକ ବୋଲି କହିଛନ୍ତି। ତାଙ୍କ ଆବେଦନରେ ସେ ପଚାରିଛନ୍ତି ଯେ କେନ୍ଦ୍ର ସରକାର ଗଣମାଧ୍ୟମର ସ୍ବାଧୀନତାକୁ ରୋକି ପାରିବେ କି ଯାହା ସମ୍ବିଧାନର ଧାରା ୧୯ (୧) ଏବଂ (୨) ଅନୁଯାୟୀ ନିଶ୍ଚିତ ହୋଇଛି।
ଏଥିରେ ଆହୁରି ମଧ୍ୟ କୁହାଯାଇଛି ଯେ ’ଭାରତର ସମ୍ବିଧାନର ଧାରା ୩୫୨ ଅନୁଯାୟୀ ରାଷ୍ଟ୍ରପତି ଜରୁରୀକାଳୀନ ଘୋଷଣା ନ କରି କେନ୍ଦ୍ର ସରକାର ଜରୁରୀକାଳୀନ ବ୍ୟବସ୍ଥା ଗ୍ରହଣ କରିପାରିବେ କି?’ ବରିଷ୍ଠ ଆଇନଜୀବୀ ଦାବି କରିଛନ୍ତି ଯେ ବିବିସି ଡକ୍ୟୁମେଣ୍ଟାରିରେ ରେକର୍ଡ ହୋଇଥିବା ତଥ୍ୟ ରହିଛି। ପୀଡିତଙ୍କ ନ୍ୟାୟ ପାଇଁ ଏହି ତଥ୍ୟଗୁଡିକ ବ୍ୟବହାର କରାଯାଇପାରିବ।
