ଭୁବନେଶ୍ୱର,୨୦।୮(ବ୍ୟୁରୋ): ରାସ୍ତା ପାର୍ଶ୍ୱ, ଘର ଆଗରେ ରହୁଥିବା ବଡ଼ ଓ ଦାମୀ ଗାଡ଼ିରୁ ବ୍ୟାଟେରି ଚୋରି କରୁଥିଲେ। ବିଭିନ୍ନ ଜିଲାରୁ ଏସବୁ ଚୋରି ବ୍ୟାଟେରିକୁ ଭୁବନେଶ୍ୱର ଆଣି ଏକାଠି କରିବା ପରେ ପଶ୍ଚିମବଙ୍ଗକୁ ଚାଲାଣ କରୁଥିଲେ। ରାଜ୍ୟରେ ସକ୍ରିୟ ରହିଥିବା ଏପରି ଏକ ଆନ୍ତଃରାଜ୍ୟ ବ୍ୟାଟେରି ଚୋରି ର଼୍ୟାକେଟକୁ କମିଶନରେଟ ପୋଲିସ ଠାବ କରିଛି। ଚୋରି ବ୍ୟାଟେରିକୁ ଚାଲାଣ ପାଇଁ ଗାଡ଼ିରେ ଲଦାଯାଉଥିବା ବେଳେ ଭୁବନେଶ୍ୱର ମଞ୍ଚେଶ୍ୱର ଥାନା ପୋଲିସ ଧରିଛି। ଏଥିସହ ଗ୍ୟାଙ୍ଗର ୬ ଜଣଙ୍କୁ ଗିରଫ କରିଛି। ସେମାନେ ହେଲେ ପଶ୍ଚିମବଙ୍ଗ କୋଲକାତା ଜିଲା ମଲ୍ଲିକ ବଜାର ଥାନାଞ୍ଚଳର ମହମ୍ମଦ ଏସ୍ତ୍ୟାକ୍ (୩୫), ଦକ୍ଷିଣ ଚବିଶ ପ୍ରଗଣା ଜିଲା ଡାଇମଣ୍ଡ ହାଓଡା ଥାନା ଅଞ୍ଚଳର ମୁସାରୁଦ୍ଦିନ୍ ମୁଲ୍ଲା(୨୪), ଆକ୍ରମ ସେଖ୍(୨୪), ସେଖ୍ ସବିର୍(୩୨), ପଶ୍ଚିମ ମେଦିନପୁର ଜିଲା ବେଲ୍ଦା ଥାନାଞ୍ଚଳର ସୁର୍ଜିତ ସିଂ ସଇନି(୫୫) ଓ ଗଞ୍ଜାମ ଜିଲା ସଦର ଥାନା ଆସ୍କା ରୋଡ୍ର ସେଖ୍ ଜାଫର(୨୫)। ଘଟଣାସ୍ଥଳରୁ ଦୁଇଟି ଟ୍ରକ୍, ଗୋଟିଏ ପିକ୍ଅପ୍ ଭ୍ୟାନ ସହ ସେଥିରେ ଲୋଡ୍ ଥିବା ୧୫ଶହରୁ ଊର୍ଦ୍ଧ୍ୱ ବ୍ୟାଟେରି ଜବତ ହୋଇଛି। ଏସବୁ ବ୍ୟାଟେରିର ଆନୁମାନିକ ମୂଲ୍ୟ ୧୦ ଲକ୍ଷ ଟଙ୍କା ହେବ। ଏନେଇ ପୋଲିସ ଏକ ମାମଲା (ନଂ.୨୩୨/୨୧) ରୁଜୁ କରି ଅଭିଯୁକ୍ତଙ୍କୁ ଗୁରୁବାର କୋର୍ଟ ଚାଲାଣ କରିଛି।
ପ୍ରାଥମିକ ତଦନ୍ତରୁ ପୋଲିସକୁ ମିଳିଥିବା ସୂଚନାନୁସାରେ, ଗଞ୍ଜାମ, ପୁରୀ, ନୟାଗଡ଼ ସମେତ ରାଜ୍ୟର କେତେକ ଜିଲାରେ ଏହି ଗ୍ୟାଙ୍ଗ୍ ସକ୍ରିୟ ରହିଛି। ଜାତୀୟ ରାଜପଥ, ମୁଖ୍ୟ ରାସ୍ତା ପାର୍ଶ୍ୱ ଓ ଘର ଆଗରେ ଅଟକି ରହୁଥିବା ଗାଡ଼ିକୁ ଗ୍ୟାଙ୍ଗ୍ର ସଦସ୍ୟମାନେ ଟାର୍ଗେଟ କରିଥାନ୍ତି। ବିଳମ୍ବିତ ରାତିରେ ସେଥିରୁ ବ୍ୟାଟେରି ଚୋରି କରିବା ପରେ ବିଭିନ୍ନ ସ୍ଥାନରେ ଲୁଚାଇ ରଖି ଭୁବନେଶ୍ୱର ଆଣି ଏକାଠି କରିଥାନ୍ତି। ସମୟ ସୁଯୋଗ ଦେଖି ପଶ୍ଚିମବଙ୍ଗକୁ ଚାଲାଣ କରି ବିପୁଳ ଅର୍ଥ ରୋଜଗାର କରନ୍ତି। ପୋଲିସ ଯାଞ୍ଚରୁ ବର୍ତ୍ତିବା ପାଇଁ ଚାଲାଣରେ ନିୟୋଜିତ ଗାଡ଼ି ଆଗରେ ‘ଅନ୍ ଆର୍ମି ଡ୍ୟୁଟି’ ଲେଖୁଥିଲେ। ତେବେ ବୁଧବାର ରାତି ପ୍ରାୟ ୧୨ଟାରେ ମଞ୍ଚେଶ୍ୱର ଶିଳ୍ପାଞ୍ଚଳର ଏକ ବାଇକ୍ ଶୋ’ରୁମ୍ ନିକଟରେ ଟ୍ରକ ରଖି ସେଥିରେ ଚୋରି ବ୍ୟାଟେରିକୁ ଲଦୁଥିବା ନେଇ ବିଶ୍ୱସ୍ତ ସୂତ୍ରରୁ ପୋଲିସ ଖବର ପାଇଥିଲା। ଏହାପରେ ଏକ ଟିମ୍ ସେଠାରେ ଚଢ଼ାଉ କରିଥିଲା। ପୋଲିସକୁ ଦେଖି ଅଭିଯୁକ୍ତମାନେ ଟ୍ରକ୍ ଓ ବ୍ୟାଟେରି ଛାଡ଼ି ଖସିଯିବାକୁ ଉଦ୍ୟମ କରିଥିଲେ। ଏହି ସମୟରେ ପୋଲିସ ଟିମ୍ ଘେରିଯାଇ ଅଭିଯୁକ୍ତଙ୍କୁ କାବୁ କରିଥିଲା। ଗୋଟିଏ ଟ୍ରକ୍ ଆଗରେ ସାଦା କାଗଜରେ ‘ଅନ୍ ଆର୍ମି ଡ୍ୟୁଟି ଅର୍ଜେଣ୍ଟ’ ବୋଲି ଲେଖାଥିଲା। ତେବେ ଘଟଣାସ୍ଥଳରୁ କେହି ଖସି ଯାଇଥିଲେ କି, ଚୋରି ବ୍ୟାଟେରି କେଉଁଠାରେ ରଖୁଥିଲେ ଓ ଏଥିରେ ଆଉ କେଉଁମାନେ ସମ୍ପୃକ୍ତ ଅଛନ୍ତି, ସେନେଇ ପୋଲିସ ଅଧିକ ତଦନ୍ତ ଚଳାଇଛି।
