କୃଷ୍ଣପ୍ରସାଦ,୨୦ା୮(ଡି.ଏନ୍.ଏ.): ବର୍ଷା ଅଭାବରୁ ପୁରୀ ଜିଲା କୃଷ୍ଣପ୍ରସାଦ ବ୍ଲକ ଅଞ୍ଚଳରେ ମରୁଡ଼ି ପରିସ୍ଥିତି ସୃଷ୍ଟି ହୋଇଛି। କ୍ଷେତରେ ଧାନ ଫସଲ କରାଯାଇଥିଲେ ମଧ୍ୟ ପାଣି ନ ଥିବାରୁ ଫାଟି ଆଁ କରିଛି। ତୁରନ୍ତ କୃଷି ବିଭାଗ ଦୃଷ୍ଟି ଦେବା ସହ ସହାୟତା ଦେବାକୁ ଚାଷୀମାନେ ଦାବି କରିଛନ୍ତି।
ସୂଚନା ମୁତାବକ, ଏହି ବ୍ଲକ ଅଞ୍ଚଳରେ କ୍ଷେତରେ ପାଣି ମଡ଼ାଇବା କୌଣସି ବ୍ୟବସ୍ଥା କରାଯାଇ ନ ଥିବା ଜଣାପଡ଼ିଛି। ଫଳରେ ଚଳିତ ବର୍ଷ କୃଷ୍ଣପ୍ରସାଦ, ମାଲୁଦ, ବଜ୍ରକୋଟ, ବୁଦ୍ଧିବର, ଖୋଲଗଞ୍ଜ, ଗୌଡସାହି, ଡିଆକୁଦା, ଅଲିପୁର, ପଥରଗଞ୍ଜ, ଗୋପକୁଦା, ସାହାବାଜପୁର, ମଲେଶ୍ୱରୀ ଆଦି ଗ୍ରାମର ଚାଷଜମି ଫାଟି ଆଁ କରିଛି। ସ୍ବଳ୍ପ ବର୍ଷାରେ ଧାନରୁଆ ହୋଇଥିବା ବେଳେ ପାଣି ଅଭାବରୁ ଧାନ ଗଛ ପୋଡି ପାଳହେଉଛି। ଫଳରେ ଲୋକମାନେ ଧାନ କ୍ଷେତକୁ ଗୋରୁଗାଈ ଛାଡୁଥିବା ଦେଖିବାକୁ ମିଳିଛି। ବୁଦ୍ଧିବର ପଞ୍ଚାୟତର ଚାଷୀ ଭଗବାନ ବିଶ୍ୱାଳ ଏବଂ ପ୍ରବୀର ଗୌଡ କହିଛନ୍ତି, ସମସ୍ତ ଚାଷୀ ଋଣ ଆଣି ଧାନ ଫସଲ କରିଥିଲୁ। ପାଣି ଅଭାବରୁ ଫସଲ ସମ୍ପୂର୍ଣ୍ଣ ନଷ୍ଟ ହୋଇଗଲା। ସରକାର କ୍ଷତିପୂରଣ ଦେବାକୁ ଦାବି କରିଛନ୍ତି। ନବନିର୍ମାଣ କୃଷକ ସଂଘ ସଭାପତି ପ୍ରାଣକୃଷ୍ଣ ଗୌଡ କହିଛନ୍ତି, ଚାଷୀ ଋଣ ଆଣି ଫସଲ କରିଥିଲେ ପାଣିର ଅଭାବରୁ ତାହା ଗଜା ମରୁଡି ହୋଇଛି। ଚାଷୀ ଧାନ ଜମିରେ ଗାଈ ଚରାଇଲେଣି। ତେଣୁ ଚାଷୀଙ୍କୁ ସରକାରୀ ସହାୟତା ପ୍ରଦାନ କରାଯାଉ। ଏଥିସହ ସମସ୍ତ ଚାଷୀଙ୍କୁ ଚଳିବା ପାଇଁ କାମ ଯୋଗାଇ ଦିଆଯାଉ କିମ୍ବା ଏକ ବର୍ଷ ପାଇଁ ସେମାନଙ୍କ ପରିବାରକୁ ଖାଦ୍ୟ ପାଇଁ ଭତ୍ତା ଯୋଗାଇ ଦିଆଯାଉ ବୋଲି ସେ କହିଛନ୍ତି। ଏଥିପ୍ରତି କୃଷି ବିଭାଗ ଦୃଷ୍ଟି ଦେବାକୁ ଦାବି ହେଉଛି। ପ୍ରକାଶ ଯେ, କୃଷ୍ଣପ୍ରସାଦ ଅଞ୍ଚଳର ୩ ପାର୍ଶ୍ୱରୁ ଚିଲିକା ଏବଂ ଗୋଟିଏ ପାର୍ଶ୍ୱ ବଙ୍ଗୋପସାଗରର ଲୁଣା ପାଣି ଘେରି ରହିଛି। ଚତୁଃପାର୍ଶ୍ୱର ଜଳରାଶି ଘେରି ରହିଥିଲେ ମଧ୍ୟ ପାଣି ଅଭାବରୁ କିଛିବର୍ଷ ହେବ ଚାଷୀ ଫସଲ ହରାଉଥିବା ଦେଖିବାକୁ ମିଳିଛି।
