ବ୍ରହ୍ମପୁର ଅଫିସ,୨୭ା୫: ମାଲିକଙ୍କ ମୃତ୍ୟୁ ପରେ ବ୍ୟାଙ୍କ ଋଣ ଶୁଝିବା ଆଳରେ ଗ୍ୟାରେଜ ଓ ସ୍ପେୟାର ପାର୍ଟସ ଦୋକାନର ଚାବି ନେଇ ୬୦ଲକ୍ଷ ଟଙ୍କାର ସାମଗ୍ରୀ ବିକ୍ରି କରି ଟଙ୍କା ଠକି ନେଇଥିବା ଅଭିଯୋଗରେ ପୋଲିସ ୨ଜଣଙ୍କୁ ଗିରଫ କରିଛି। ସେମାନେ ହେଲେ ଆସ୍କାରୋଡ ପାଣିଗ୍ରାହୀପେଣ୍ଠର ଅରୁଣ କୁମାର ପାଣିଗ୍ରାହୀ ଓ ଗୋଷାଣି ନୂଆଗଁାର କିରଣ କୁମାର ଦଳାଇ। ମାମଲା ନଂ.୧୨୭/୨୨ରେ ଟାଉନ ଥାନା ପୋଲିସ ଉଭୟଙ୍କୁ ଶୁକ୍ରବାର କୋର୍ଟ ଚାଲାଣ କରିଥିଲା। କୋର୍ଟଙ୍କ ନିର୍ଦ୍ଦେଶକ୍ରମେ ସେମାନଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛିି। ପ୍ରକାଶ ଯେ, ଗଞ୍ଜାମ ବୁଢାମ୍ବ ଗ୍ରାମର ସୁଦର୍ଶନ ମହାରଣା ବ୍ୟବସାୟ ପାଇଁ ବ୍ରହ୍ମପୁର ଆସି ବ୍ୟାଙ୍କ କଲୋନୀରେ ଏକ ଘର ଭଡା ନେଇ ପରିବାର ସହ ରହୁଥିଲେ। ସେ ଗେଟ୍ବଜାର ଅଞ୍ଚଳରେ ଏକ ଗ୍ୟାରେଜ ଓ ସ୍ପେୟାର ପାର୍ଟସ ଦୋକାନ କରିଥିଲେ। ଉକ୍ତ ଦୋକାନରେ ଅରୁଣ ଓ କିରଣ କାମ କରୁଥିଲେ। ଗତବର୍ଷ ମେ ୩ରେ ସୁଦର୍ଶନଙ୍କ ମୃତ୍ୟୁ ଘଟିଥିଲା। ୧୪ ଦିନ ପରେ ୧୭ ତାରିଖରେ ଅଭିଯୁକ୍ତ ଦ୍ୱୟ ବ୍ୟାଙ୍କ କଲୋନୀକୁ ଆସି ଦୋକାନ ମାଲିକାଣି ସାଗରିକା ମହାରଣାଙ୍କୁ ଭେଟି ଗ୍ୟାରେଜ ଓ ସ୍ପେୟାର ପାର୍ଟସ ଦୋକାନ ଚାବି ମାଗିଥିଲେ। ବ୍ୟବସାୟ ପାଇଁ ମାଲିକ ପୂର୍ବରୁ ବ୍ୟାଙ୍କରୁ ଆଣିଥିବା ୧୭ଲକ୍ଷ ଟଙ୍କା ଋଣ ଶୁଝିବୁ ବୋଲି ପ୍ରତିଶ୍ରୁତି ଦେଇ ସେମାନେ ଚାବି ନେଇଥିଲେ। କିଛିମାସ ପରେ ଜିଏସ୍ଟି ଓ ବ୍ୟାଙ୍କ ଋଣ ଶୁଝାଯିବ କହି ଏକ ସାଦା କାଗଜରେ ମାଲିକାଣିଙ୍କ ଦସ୍ତଖତ ମଧ୍ୟ ନେଇଥିଲେ। ବ୍ୟାଙ୍କ ଋଣ ଶୁଝିବା ପରିବର୍ତ୍ତେ ଉଭୟେ ଦୋକାନରୁ ସମସ୍ତ ସ୍ପେୟାର ପାର୍ଟସ ଓ ଗ୍ୟାରେଜରେ ଥିବା ଗାଡିଗୁଡିକୁ ବିକ୍ରି କରି ପ୍ରାୟ ୬୦ ଲକ୍ଷ ଟଙ୍କା ହଡପ କରିନେଇଥିଲେ। ଷଡ଼ଯନ୍ତ୍ର କରି ଟଙ୍କା ଠକେଇ ହୋଇଥିବା ଜାଣିବା ପରେ ସାଗରିକା ଏନେଇ ଟାଉନ ଥାନାରେ ଅଭିଯୋଗ କରିଥିଲେ।
