ରାଓ୍ବଲପିଣ୍ଡି,୪ା୯: ପାକିସ୍ତାନ ବିପକ୍ଷ ଦ୍ୱିତୀୟ କ୍ରିକେଟ ଟେଷ୍ଟ ମ୍ୟାଚ ୬ ଉଇକେଟରେ ଜିତି ନେଇଛି ବାଂଲାଦେଶ। ଏଥିସହିତ ଦଳ ଦୁଇ ମ୍ୟାଚ ବିଶିଷ୍ଟ ସିରିଜ ୨-୦ରେ କ୍ଲିନ୍ ସୁଇପ୍ ବିଜୟ ହାସଲ କରିଛି। ମ୍ୟାଚ ଜିତିବା ଲାଗି ମଙ୍ଗଳବାର ମ୍ୟାଚର ୫ମ ତଥା ଅନ୍ତିମ ଦିବସରେ ବାଂଲାଦେଶ ହାତରେ ୧୦ ଉଇକେଟ ଥିବାବେଳେ ବିଜୟ ପାଇଁ ୧୪୩ ରନ ଆବଶ୍ୟକ କରୁଥିଲା। ଭ୍ରମଣକାରୀ ଦଳ ୪ ଉଇକେଟ ବିନିମୟରେ ମ୍ୟାଚ ଜିତି ନେଇଥିଲା। ଶକିବ ଅଲ ହସନ ଚୌକା ମାରି ଦଳକୁ ବିଜୟୀ କରାଇଥିଲେ। ବାଂଲାଦେଶର ଏହା ହେଉଛି ଦ୍ୱିତୀୟ ଦ୍ୱିପାକ୍ଷିକ ଟେଷ୍ଟ ସିରିଜ ବିଜୟ। ପୂର୍ବରୁ ୨୦୦୯ରେ ଦଳ ଓ୍ବେଷ୍ଟଇଣ୍ଡିଜକୁ ପରାସ୍ତ କରିଥିଲା। ଭ୍ରମଣକାରୀ ଦଳ ପ୍ରଥମ ଟେଷ୍ଟ ମ୍ୟାଚ ୧୦ ଉଇକେଟରେ ବିଜୟୀ ହୋଇଥିଲା। ରାଓ୍ବଲପିଣ୍ଡିଠାରେ ଅନୁଷ୍ଠିତ ଦ୍ୱିତୀୟ ଟେଷ୍ଟ ମ୍ୟାଚର ପ୍ରଥମ ଦିବସ ଖେଳ ବର୍ଷା ଯୋଗୁ ସମ୍ଭବ ହୋଇ ନ ଥିଲା। ଫଳରେ ମ୍ୟାଚ ୪ଦିନ ବିଶିଷ୍ଟ ହୋଇଯାଇଥିଲା। ବାଂଲାଦେଶ ଏହାର ଦ୍ୱିତୀୟ ଇନିଂସରେ ୪ ଉଇକେଟ ବିନିମୟରେ ୧୮୫ ରନ କରିଥିଲା। ଶକିବ ୨୧ ରନ ଏବଂ ମୁସ୍ଫିର ରହିମ ୨୨ରନ କରି ଅପରାଜିତ ରହିଥିଲେ। ପ୍ରଥମ ଇନିଂସରେ ବାଂଲାଦେଶ ଏକଦା ମାତ୍ର ୨୬ରନରେ ଏହାର ୬ ଉଇକେଟ ହରାଇ ସଙ୍କଟରେ ପଡ଼ିଥିଲା। ମାତ୍ର ଲିଟନ ଦାସ ଓ ମେହିଦି ହସନ ମିରାଜଙ୍କ ପ୍ରଭାବୀ ବ୍ୟାଟିଂ ଯୋଗୁ ଦଳ ମ୍ୟାଚକୁ ପ୍ରତ୍ୟାବର୍ତ୍ତନ କରିଥିଲା। ପରେ ଫାଷ୍ଟ ବୋଲର ହସନ ମେହମୁଦ, ନାହିଦ ରାଣା ଓ ତସ୍କିନ ଅହମ୍ମଦଙ୍କ ଚମତ୍କାର ବୋଲିଂ ଯୋଗୁ ଦଳ ପାକିସ୍ତାନକୁ ଦ୍ୱିତୀୟ ଇନିଂସରେ ୧୭୨ରନରେ ଅଲଆଉଟ କରିଦେଇଥିଲା। ବାଂଲାଦେଶ ପାଇଁ ୪ଟି ସେସନରେ ୧୮୪ ରନର ବିଜୟ ଲକ୍ଷ୍ୟ ଧାର୍ଯ୍ୟ ହୋଇଥିଲା। ମ୍ୟାଚରେ ନାଟକୀୟ ପ୍ରତ୍ୟାବର୍ତ୍ତନ ପାଇଁ ପାକିସ୍ତାନ ପ୍ରୟାସ କରିଥିଲା। ମାତ୍ର ଜାକିର ହସନ (୪୦ରନ), ଅଧିନାୟକ ନଜମୁଲ ହୋନେସ ସାନ୍ତୋ (୩୮) ଏବଂ ମୋମିନୁଲ ହକ୍ (୩୪) ଲଢୁଆ ବ୍ୟାଟିଂ ପ୍ରଦର୍ଶନ କରି ସେମାନଙ୍କ ଦଳକୁ ଆଗେଇ ନେଇଥିଲେ। ସୂଚନାଯୋଗ୍ୟ, ପାକିସ୍ତାନ ଘରୋଇ ଗ୍ରାଉଣ୍ଡରେ ଖେଳିଥିବା ଗତ ୧୦ଟି ମ୍ୟାଚ ମଧ୍ୟରେ ଗୋଟିଏ ହେଲେ ବିଜୟ ହାସଲ କରିପାରି ନାହିଁ। ଶେଷଥର ପାଇଁ ୨୦୨୧ ଡିସେମ୍ବରରେ ରାଓ୍ବଲପିଣ୍ଡିଠାରେ ଦକ୍ଷିଣ ଆଫ୍ରିକା ବିପକ୍ଷରେ ବିଜୟ ହାସଲ କରିଥିଲା। ମଙ୍ଗଳବାର ଲିଟନ ଦାସ ପ୍ଲେୟର ଅଫ୍ ଦି ମ୍ୟାଚ ଏବଂ ମେହିଦି ହସନ ମିରାଜ ପ୍ଲେୟର ଅଫ୍ ଦି ସିରିଜ ବିବେଚିତ ହୋଇଛନ୍ତି।
