ମୀରପୁର,୬ା୧୨:ବାଂଲାଦେଶ ଓ ନ୍ୟୁଜିଲାଣ୍ଡ ମଧ୍ୟରେ ଅନୁଷ୍ଠିତ ଦ୍ୱିତୀୟ ଟେଷ୍ଟ ମ୍ୟାଚର ପ୍ରଥମ ଦିନରେ ନ୍ୟୁଜିଲାଣ୍ଡର ପରିସ୍ଥିତି ଖରାପ କରିଦେଇଛି ବାଂଲାଦେଶ। ମୀରପୁରରେ ଖେଳା ଯାଇଥିବା ମ୍ୟାଚ୍ରେ ବଲ୍ ତଳୁଆ ରହୁଥିବା ବେଳେ ଅସମାନ ବାଉନ୍ସ କାରଣରୁ ପ୍ରଥମ ଦିନରେ ୧୫ ଉଇକେଟର ପତନ ଘଟିଛି। ପ୍ରଥମେ ବ୍ୟାଟିଂ କରି ବାଂଲାଦେଶ ୧୭୨ ରନ୍ରେ ଅଲଆଉଟ ହୋଇଥିବା ବେଳେ ଖରାପ ଆଲୋକ କାରଣରୁ ଖେଳ ବନ୍ଦ ହେବା ବେଳକୁ ନ୍ୟୁଜିଲାଣ୍ଡ ୫୫ ରନ୍ରେ ୫ ଉଇକେଟ ହରାଇ ସଙ୍କଟରେ ପଡିଛି।
ଟସ୍ ଜିତି ବାଂଲାଦେଶ ଅଧିନାୟକ ନଜମୋଲ ହୋସେନ୍ ଶନ୍ତୋ ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିଲେ। ନ୍ୟୁଜିଲାଣ୍ଡ ପକ୍ଷରୁ ମିଚେଲ୍ ସାଣ୍ଟନର(୩/୩୧) ଓ ଗ୍ଲେନ୍ ଫିଲିପ୍ସ(୩/୬୫) ମିଳିତ ଭାବରେ ୬ ଉଇକେଟ ନେବାରୁ ବାଂଲାଦେଶ ୧୭୨ ରନ୍ରେ ସମସ୍ତ ଉଇକେଟ ହରାଇଥିଲା। ଦଳର ୫ ଜଣ ବ୍ୟାଟର ଦୁଇଅଙ୍କ ଛୁଇଁପାରି ନ ଥିବା ବେଳେ ମୁଶଫିକୁର ରହିମ ସର୍ବାଧିକ ୩୫ ରନ୍ କରିଥିଲେ। ଅନ୍ୟମାନଙ୍କ ମଧ୍ୟରେ ଶାହାଦତ ହୋସେନ୍ ୩୧ ଓ ମେହିଦୀ ହସନ ମିରାଜ ୨୦ ରନ୍ କରିଥିଲେ। ଏଜାଜ୍ ପଟେଲ ୨ ଉଇକେଟ ନେଇଥିଲେ। ସେହିପରି ବିଶ୍ୱର ଷଷ୍ଠ ବୋଲର ଭାବରେ ବିନା କୌଣସି ରନ ବ୍ୟୟ କରି ଉଇକେଟ ନେବାର ରେକର୍ଡ କରିଥିଲେ ଟିମ୍ ସାଉଦି।
ନ୍ୟୁଜିଲାଣ୍ଡର ବ୍ୟାଟିଂ ମଧ୍ୟ ଅତ୍ୟନ୍ତ ଦୟନୀୟ ରହିଥିଲା ା ଖରାପ ଆଲୋକ କାରଣରୁ ୧୨ ଓଭର ପୂର୍ବରୁ ଖେଳ ବନ୍ଦ ହୋଇଥିବା ବେଳେ ନ୍ୟୁଜିଲାଣ୍ଡ ୫୫ ରନ୍ରେ ୫ ଉଇକେଟ ହରାଇଛି। ମେହିନୀ ହସନ ମିରାଜ ଚମତ୍କାର ବୋଲିଂ କରି ୩ ଉଇକେଟ ନେଇଥିବା ବେଳେ ତାଇଜୁଲ ଇସଲାମ ୨ ଉଇକେଟ ନେଇଥିଲେ। କେନ୍ ଓ୍ବିଲିୟମସନ୍ ୧୩ ରନ୍ କରି ଆଉଟ ହୋଇଥିବା ବେଳେ ଡାରିଲ୍ ମିଚେଲ୍ ୧୨ ଓ ଗ୍ଲେନ୍ ଫିଲିପ୍ସ ୫ ରନ୍ରେ ଅପରାଜିତ ଅଛନ୍ତି।
