ନୂଆଦିଲ୍ଲୀ,୧୨ା୧୨: ସୋମବାର କେନ୍ଦ୍ର କ୍ରୀଡା ଓ ଯୁବବ୍ୟାପାର ମନ୍ତ୍ରୀ ଅନୁରାଗ ଠାକୁରଙ୍କୁ ଭେଟିଛନ୍ତି ଦୁଇ ଅଲିମ୍ପିକ୍ସ ପଦକ ବିଜେତା ରେସ୍ଲର ବଜରଙ୍ଗ ପୁନିଆ ଓ ସାକ୍ଷୀ ମଲିକ। ଆସନ୍ତା ଡିସେମ୍ବର ୨୧ ତାରିଖରେ ଭାରତୀୟ ରେସ୍ଲିଂ ମହାସଂଘ(ଡବ୍ଲ୍ୟୁଏଫ୍ଆଇ)ର ନିର୍ବାଚନ ରହିଥିବା ବେଳେ ଏଥିରେ ସଞ୍ଜୟ ସିଂଙ୍କୁ ଅଂଶଗ୍ରହଣ ପାଇଁ ଅନୁମତି ନ ଦେବାକୁ ଉଭୟ କ୍ରୀଡାମନ୍ତ୍ରୀଙ୍କୁ ଅନୁରୋଧ କରିଛନ୍ତି। ଡବ୍ଲ୍ୟୁଏଫ୍ଆଇର ପୂର୍ବତନ ସଭାପତି ବ୍ରିଜ୍ଭୂଷଣ ଶରଣ ସିଂଙ୍କ ବିରୋଧରେ ଯୌନ ଶୋଷଣ ମାମଲା ଆସିଥିବା ବେଳେ ବଜରଙ୍ଗ ଓ ସାକ୍ଷୀ ବିରୋଧ ପ୍ରଦର୍ଶନର ନେତୃତ୍ୱ ନେଇଥିଲେ। ଉତ୍ତର ପ୍ରଦେଶର କେଶରଗଞ୍ଜରୁ ଭାଜପା ଏମ୍ପି ରହିଥିବା ବ୍ରିଜ୍ଭୂଷଣ ଇସ୍ତଫା ପ୍ରଦାନ କରିଥିବା ବେଳେ ରେସ୍ଲରମାନେ ଯନ୍ତର ମନ୍ତରରେ ନିଜ ଧାରଣା ଜାରି ରଖିଥିଲେ। ତେବେ ବ୍ରିଜଭୂଷଣ କିମ୍ବା ତାଙ୍କ ପରିବାରର କାହାକୁ ନିର୍ବାଚନ ଲଢିବାକୁ ଦିଆଯିବ ନାହିଁ ବୋଲି କ୍ରୀଡା ମନ୍ତ୍ରାଳୟ ପକ୍ଷରୁ ପ୍ରତିଶ୍ରୁତି ଦିଆଯିବା ପରେ ଖେଳାଳି ମାନେ ଧାରଣାରୁ ଓହରିଥିଲେ। ଉଲ୍ଲେଖଯୋଗ୍ୟ ଯେ, ବର୍ତ୍ତମାନ ଡବ୍ଲ୍ୟୁଏଫ୍ଆଇ ସଭାପତି ଦୌଡରେ ସଞ୍ଜୟ ସିଂ ଓ ଅନୀତା ଶେଓରାନ ରହିଛନ୍ତି। ଅନୀତା ୨୦୧୦ ରାଜ୍ୟଗୋଷ୍ଠୀ କ୍ରୀଡାରେ ପଦକ ବିଜୟୀ ଖେଳାଳି ରହିଥିବା ବେଳେ ସଞ୍ଜୟ ହେଉଛନ୍ତି ବ୍ରିଜ୍ଭୂଷଣଙ୍କ ପୂର୍ବତନ ସହଯୋଗୀ। ପୂର୍ବରୁ କ୍ରୀଡାମନ୍ତ୍ରୀ ଆମକୁ ଦେଇଥିବା ପ୍ରତିଶ୍ରୁତି ମନେପକାଇ ଦେବା ପାଇଁ ଆମେ ଭେଟିଥିଲୁ ବୋଲି କହିଛନ୍ତି ଟୋକିଓ ଅଲିମ୍ପିକ୍ସ ବ୍ରୋଞ୍ଜ ପଦକ ବିଜେତା ବଜରଙ୍ଗ। ସଞ୍ଜୟ ସିଂ ଏହି ନିର୍ବାଚନ ଲଢୁଥିବା ବେଳେ ସେ ବ୍ରିଜ୍ଭୂଷଣଙ୍କ ଜଣେ ପୂର୍ବତନ ସହଯୋଗୀ। ଅନ୍ୟ ପକ୍ଷରେ ଅନୀତା ଜଣେ ପୂର୍ବତନ ରେସ୍ଲର ହୋଇଥିବାରୁ ତାଙ୍କ ପ୍ରତି ଆମର ସମର୍ଥନ ରହିଛି। ସେ ନିଜେ ଜଣେ ଆଥଲେଟ ଭାବରେ ଖେଳାଳିଙ୍କ ଦୁଃଖ ବୁଝିବାରେ ସମର୍ଥ ହେବେ।
ଜଣେ ପୂର୍ବତନ ରେସ୍ଲର ଏହି ଦାୟିତ୍ୱ ନେଲେ ଆମେ ଖୁସି ହେବୁ। ଅନୀତା ଦେଶ ପାଇଁ ରାଜ୍ୟଗୋଷ୍ଠୀ କ୍ରୀଡାରେ ପଦକ ଜିତି ସାରିଛନ୍ତି। ତେଣୁ ସେ ପଦକ ବିଜୟ ପଛର ପରିଶ୍ରମ ସମ୍ପର୍କରେ ଅବଗତ। ପ୍ରଥମ ମହିଳା ଭାବେ ସେ ଡବ୍ଲ୍ୟୁଏଫ୍ଆଇ ସଭାପତି ଦୌଡରେ ରହିଥିବା ଅନୀତା ଯୌନ ଶୋଷଣ ମାମଲାର ଅନ୍ୟତମ ସାକ୍ଷୀ ଅଟନ୍ତି। ଯୌନ ଶୋଷଣ ମାମଲାରୁ ଜାମିନରେ ଆସିଥିବା ବ୍ରିଜ୍ଭୂଷଣ ଡବ୍ଲ୍ୟୁଏଫ୍ଆଇ ସଭାପତି ଭାବେ ୧୨ ବର୍ଷ ପୂରଣ କରି ସାରିଥିବା ବେଳେ ସେ ଆଉଥରେ ନିର୍ବାଚନ ଲଢି ପାରିବେ ନାହିଁ। ବ୍ରିଜ୍ଭୂଷଣଙ୍କ ପୁଅ କରଣ ସିଂ ଉତ୍ତରପ୍ରଦେଶ ରେସଲିଂ ଫେଡେରେଶନର ଉପସଭାପତି ରହିଥିବା ବେଳେ ଜ୍ୱାଇଁ ବିଶାଲ ସିଂ ବିହାର ରେସଲିଂ ଫେଡେରେଶନର ସଭାପତି ରହିଛନ୍ତି। ତେବେ ଖେଳାଳିଙ୍କ ଆପତ୍ତି ପରେ ଉଭୟ ନିର୍ବାଚନରୁ ନିଜକୁ ଦୂରେଇ ରଖିଥିଲେ।
