ମୁମ୍ବାଇ: ଆଜିକାଲି ବାହୁବଳୀ ଅଭିନେତା ପ୍ରଭାସଙ୍କ ନାଁ ତାଙ୍କ ଆଗାମୀ ଫିଲ୍ମ ‘ଆଦିପୁରୁଷ’ର ଅଭିନେତ୍ରୀ କ୍ରୀତି ସାନନଙ୍କ ସହ ଚର୍ଚ୍ଚା ହେଉଛି। ଯଦିଓ କ୍ରୀତି ଏ ବିଷୟରେ ଖୋଲାଖୋଲି ଭାବେ କହିଛନ୍ତି, ତଥାପି ଗୁଜବ ବନ୍ଦ ହେବାର ନାମ ନେଉନାହିଁ। ପୂର୍ବରୁ ପ୍ରଭାସ ଏବଂ ତାଙ୍କ ବାହୁବଳୀ ଫିଲ୍ମର ଅଭିନେତ୍ରୀ ଦେବସେନା ତଥା ଅନୁଷ୍କା ଶେଟ୍ଟୀ ପରସ୍ପରକୁ ଡେଟ୍ କରୁଥିବାର ଚର୍ଚ୍ଚା ହେଉଥିଲା। ପ୍ରଶଂସକମାନେ ଉଭୟଙ୍କ ଯୋଡ଼ିକୁ ମଧ୍ୟ ପସନ୍ଦ କରିଥିଲେ। ଉଭୟ ନିଜ ସମ୍ପର୍କକୁ ଖୋଲାଖୋଲି ଭାବେ ଗ୍ରହଣ କରିନାହାନ୍ତି। ବର୍ତ୍ତମାନ ପ୍ରଭାସ ଏବଂ ଅନୁଷ୍କାଙ୍କ ବ୍ରେକ୍ଅପ୍ ହୋଇଥିବାର କାରଣ ସାମ୍ନାକୁ ଆସିଛି।
ଅନୁଷ୍କା ଏବଂ ପ୍ରଭାବ ବିଲାସେଟ୍ରେ ପରସ୍ପରକୁ ଭେଟିଥିଲେ। ଏହା ପରେ ଦୁହେଁ ଅନେକ ହିଟ୍ ଫିଲ୍ମ ଦେଇଥିଲେ। ପ୍ରଭାସ ଏବଂ ଅନୁଷ୍କା ଉଭୟ ଫିଲ୍ମ ବାହୁବଳୀ ଏବଂ ବାହୁବଳୀ ପାର୍ଟ-୨ରେ ଅଭିନୟ କରିଛନ୍ତି। ଏହି ଫିଲ୍ମଗୁଡ଼ିକ ପରେ ଉଭୟଙ୍କ ସମ୍ପର୍କକୁ ନେଇ ଚର୍ଚ୍ଚା ହୋଇଥିଲା। ଫିଲ୍ମ ବ୍ୟତୀତ ଉଭୟଙ୍କ ଯୋଡ଼ି ବାସ୍ତବ ଜୀବନରେ ମଧ୍ୟ ଭଲ ମ୍ୟାଚ୍ କରୁଥିଲା। ଦୁହେଁ ପରସ୍ପରକୁ ଭଲ ବନ୍ଧୁ ବୋଲି କୁହନ୍ତି।
କିଛିଦିନ ପରେ ଅନୁଷ୍କାଙ୍କ ସମ୍ପର୍କ ଜଣେ ବରିଷ୍ଠ ଅଭିନେତାଙ୍କ ସହ ଚର୍ଚ୍ଚା ହୋଇଥିଲା। ଯେତେବେଳେ ଏହି କଥା ପ୍ରଭାସଙ୍କ ମା’ଙ୍କ କାନରେ ପଡ଼ିଥିଲା, ସେତେବେଳେ ସେ ପ୍ରଭାସ ଏବଂ ଅନୁଷ୍କାଙ୍କ ବିବାହକୁ ମନା କରିଦେଇଥିଲେ। ଅବଶ୍ୟ ଏହା ପରେ ମଧ୍ୟ ଉଭୟ ଭଲ ବନ୍ଧୁ ଭାବେ ରହିଲେ। ପରେ ପ୍ରଭାସଙ୍କ ନାମ କ୍ରୀତି ସାନନଙ୍କ ସହ ଯୋଡ଼ି ହୋଇଥିଲା। କେବଳ ଏତିକି ନୁହେଁ, ଯେତେବେଳେ ଉଭୟଙ୍କୁ ଏକାଠି ଦେଖାଯାଉଥିଲା, ପ୍ରଶଂସକମାନେ ସେମାନଙ୍କ ସମ୍ପର୍କକୁ ନେଇ ପ୍ରଶ୍ନ କରୁଥିଲେ। କିନ୍ତୁ ପ୍ରଭାସ ଏହି ଖବରକୁ ଅସ୍ବୀକାର କରିଛନ୍ତି।
