କଲମ୍ବୋ,୧୭।୭: ଶ୍ରୀଲଙ୍କା ବିପକ୍ଷ ଗାଲେ ଟେଷ୍ଟରେ ପାକିସ୍ତାନର ସ୍ଥିତି ଖରାପ ରହିଛି। ପ୍ରଥମ ଇନିଂସରେ ଶ୍ରୀଲଙ୍କା ୨୨୨ ରନ ସଂଗ୍ରହ କରିଥିଲା। ଏହାର ଜବାବରେ ପାକିସ୍ତାନ ୯ ଉଇକେଟ ହରାଇ ଏପର୍ଯ୍ୟନ୍ତ ୧୭୬ ରନ୍ କରିଛି। ପାକିସ୍ତାନ ପକ୍ଷରୁ ଅଧିନାୟକ ବାବର ଆଜମ ପଡ଼ିଆରେ ଜବରଦସ୍ତ ପ୍ରଦର୍ଶନ କରିଛନ୍ତି। ସେ ୨୦୨ ବଲ୍ ଖେଲି ୮୩ ରନ୍ର ପାଳି ଖେଳିଥିଲେ। ଏହି ମ୍ୟାଚରେ ସେ ୨୧ ରନ ସ୍କୋର କରିବା ମାତ୍ରେ ବାବର ଏକ ସ୍ବତନ୍ତ୍ର ରେକର୍ଡ ହାସଲ କରିଥିଲେ। ସେ ଅନ୍ତର୍ଜାତୀୟ କ୍ରିକେଟରେ ୧୦,୦୦୦ ରନ ସ୍କୋର କରିବାରେ ଦ୍ରୁତତମ ଏସୀୟ ବ୍ୟାଟ୍ସମ୍ୟାନ ହୋଇଛନ୍ତି। ଏହି ପରିପ୍ରେକ୍ଷୀରେ ସେ ବିରାଟ କୋହଲିଙ୍କୁ ପଛରେ ପକାଇ ଥିଲେ।
ବାବର ସମସ୍ତ ତିନୋଟି ଫର୍ମାଟକୁ ମିଶାଇ ୨୨୮ ଇନିଂସରେ ୧୦ ହଜାର ରନ ପୂରଣ କରିଥିଲେ। ଏଥି ସହିତ କୋହଲି ୨୩୨ ଇନିଂସରେ ଏହା କରିଥିଲେ। ୨୪୩ ଇନିଂସରେ ଅନ୍ତର୍ଜାତୀୟ କ୍ରିକେଟରେ ସୁନୀଲ ଗାଭାସ୍କର ୧୦,୦୦୦ ରନ ପୂରଣ କରିଥିଲେ। ଅନ୍ତର୍ଜାତୀୟ କ୍ରିକେଟରେ ୧୦,୦୦୦ ରନ ପୂରଣ କରିବାରେ ବାବର ହେଉଛି ଏକାଦଶ ପାକିସ୍ତାନୀ ବ୍ୟାଟ୍ସମ୍ୟାନ। ତେବେ ସେ ଏହା କରିବାରେ ଦ୍ରୁତତମ ପାକିସ୍ତାନୀ ବ୍ୟାଟ୍ସମ୍ୟାନ ଅଟନ୍ତି।
୧୦,୦୦୦ ଅନ୍ତର୍ଜାତୀୟ ରନ ସ୍କୋର କରିବାରେ ଦ୍ରୁତତମ ଏସୀୟ ବ୍ୟାଟ୍ସମ୍ୟାନ
ବାବର ଆଜାମ ୨୨୮
ବିରାଟ କୋହଲି ୨୩୨
ସୁନୀଲ ଗାଭାସ୍କର ୨୪୩
ଜାଭେଦ ମିଆଣ୍ଡାଡ ୨୪୮
ସୌରଭ ଗାଙ୍ଗୁଲି ୨୫୩
