ଏକ ସଦ୍ୟତମ ସର୍ଭେରୁ ଜଣାପଡିଛି ଯେ ବର୍ତ୍ତମାନ ୮୦ ପ୍ରତିଶତରୁ ଅଧିକ ଲୋକ ଅମ୍ଳପିତ୍ତ ରୋଗରେ ଆକ୍ରାନ୍ତ। ଏପରି କି ଯୌବନ ଆରମ୍ଭରୁ ଏହି ରୋଗରେ ପୀଡିତ ହେବା ଦେଖାଯାଉଛି। କେତେକ ଲୋକ ଭୋଜିକୁ ଗଲେ ସାଦା ଭୋଜନ ମଧ୍ୟ ଖାଇପାରନ୍ତି ନାହିଁ। ଯାହା ଖାଇଲେ ଅଜୀର୍ଣ୍ଣ ହୋଇ ଅମ୍ଳ ଯୋଗୁଁ ହେକୁଟି ଦେବାର ଦେଖାଯାଏ। ବିନା ପରିଶ୍ରମରେ ଗରିଷ୍ଠ ଖାଦ୍ୟ ଖାଇବା, ମଦ, ଗୁଟ୍ଖା, କଡ଼ା ମସଲା, ଖଟା, ବାସି ଜିନିଷ, ଅସ୍ବାସ୍ଥ୍ୟକର ଖାଦ୍ୟ ପାନୀୟ ବ୍ୟତୀତ ଚିନ୍ତା, ଶୋକ, ଭୟ, ଅନିଦ୍ରା, ଭୋକ ଲାଗିଲେ ନ ଖାଇବା, କଳକାରଖାନାରେ ଦିବାରାତ୍ର କାମ କରିବା ଦ୍ୱାରା ଖାଦ୍ୟ ସହଜରେ ହଜମ ନ ହୋଇ ପିତ୍ତ ସୃଷ୍ଟି ହୋଇଥାଏ। ଏଥିଯୋଗୁ ପେଟରେ ଜ୍ୱଳନ, ଅମ୍ଳ ହେକୁଟି, ଛାତିରେ କିଛି ଅଟକିବା ପରି ଲାଗିବା, ଦାନ୍ତ ଖଟା ପଡ଼ିଯିବା, କୋଷ୍ଠବଦ୍ଧତା, ନାଳମିଶ୍ରିତ ପତଳା ବା ଖଦଖଦଡ଼ିଆ ଝାଡ଼ା, ଅଳ୍ପ ଖାଇଲେ ଅଜୀର୍ଣ୍ଣ ହେବା, ମୁଣ୍ଡ ବୁଲାଇବା, ବିନା ପରିଶ୍ରମରେ କ୍ଳାନ୍ତ ଲାଗିବା, କଣ୍ଠ ପ୍ରଦେଶରେ ଦାହ, ଅରୁଚି ଇତ୍ୟାଦି ଲକ୍ଷଣ ଦେଖିବାକୁ ମିଳେ। ଏପରି କିଛି ଦିନ ଲାଗି ରହିଲେ ଉଦରଶୂଳ ବା କଲିକ୍ ପେନ୍ ଆରମ୍ଭ ହୁଏ। ବେଳେବେଳେ ବାନ୍ତି ହୋଇଥାଏ। ପରେ ପିତ୍ତାଶୟରେ ପଥର ଦେଖିବାକୁ ମିଳେ। କେତେକ ଆଣ୍ଟାସିଡ୍ ଆଦି ଖାଇ ଏହି ରୋଗରୁ ସାମୟିକ ଉପଶମ ପାଇଥାଆନ୍ତି। କିନ୍ତୁ ରୋଗ ସମ୍ପୂର୍ଣ୍ଣ ଭାବରେ ଭଲ ନ ହୋଇ ଶରୀର ଭିତରେ କାୟା ବିସ୍ତାର କରି ଚାଲିଥାଏ। ଏପରି କି କେତେକଙ୍କ ପେଟରେ ଏଥିଯୋଗୁଁ ଅଲସର ବା ଘା’ ହୋଇଥାଏ, ଯାହାକି ପରବର୍ତ୍ତୀ ସମୟରେ ଅସ୍ତ୍ରୋପଚାର କରିବାକୁ ପଡିଥାଏ। ଡାକ୍ତରଙ୍କ ସହ ପରାମର୍ଶ ସମୟରେ ରୋଗ ସମ୍ପର୍କରେ ସଠିକ୍ ବିବରଣୀ ଦେଇ ଏହାର ଚିକିତ୍ସା କରିବା ସହ ଏ ନେଇ ସଚେତନ ରହିଲେ ଏଥିରୁ ଆରୋଗ୍ୟ ମିଳିଥାଏ।ଅନ୍ୟପକ୍ଷରେ ଏପରି ସମସ୍ୟା ପାଇଁ ଆୟୁର୍ବେଦୀୟ ଡାକ୍ତରଙ୍କ ପରାମର୍ଶ ଅନୁସାରେ ଶାସ୍ତ୍ରୀୟ ଭଷ୍ମ ଔଷଧ ସେବନ ଓ ଚିକିତ୍ସକଙ୍କ ପରାମର୍ଶ ଅନୁସାରେ ପଥ୍ୟାପଥ୍ୟ ନିୟମ ପାଳନ କଲେ ରୋଗୀ ଅଳ୍ପ ଦିନ ମଧ୍ୟରେ ଆରୋଗ୍ୟ ଲାଭ କରି ଖୁସିରେ ଜୀବନଯାପନ କରିଥାଏ।
ଡା. ଆଶିଷ ବାନାର୍ଜୀ
-ଆନନ୍ଦ ବଜାର, ବେତନଟୀ, ମୟୂରଭଞ୍ଜ
ମୋ : ୯୮୬୧୩୭୪୩୮୫
