ନନ୍ଦପୁର,୧୮।୩(ତୁଷାର କାନ୍ତ ମହାନ୍ତି): କୋରାପୁଟ ଜିଲା ନନ୍ଦପୁର ଥାନା ଅଧୀନ ଦେଗନ୍ଧନା ଗ୍ରାମ ସ୍କୁଲ ଗଡାଣି ନିକଟରେ ଭାରସାମ୍ୟ ହରାଇ ଅଟୋ ଓଲଟି ୧୦ ଯାତ୍ରୀ ମଙ୍ଗଳବାର ଆହତ ହୋଇଛନ୍ତି। ସେମାନଙ୍କ ମଧ୍ୟରୁ ୪ଜଣଙ୍କ ଅବସ୍ଥା ଗୁରୁତର ହେବାରୁ ସେମାନଙ୍କୁ କୋରାପୁଟ ଶହୀଦ ଲକ୍ଷ୍ମଣ ନାୟକ ଭେଷଜ ମହାବିଦ୍ୟାଳୟ ଓ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି। ଗୁରୁତରମାନେ ହେଲେ ଖମରା ଗ୍ରାମର ରବୀନ୍ଦ୍ର ବୁରୁଡି, ମାରଡ଼ା ଗ୍ରାମର ଆଦୁ ହନ୍ତାଳ, ତୁସୁବା ଗ୍ରାମର ରୁକ୍ମଣୀ ହନ୍ତାଳ ଓ ଗୁନେଇପଡ଼ା ଗ୍ରାମର ବବିତା ମାଝୀ। ସୂଚନାନୁଯାୟୀ, ଅଟୋ(ଓଡି୧୦ ଜେଡ ୪୯୨୫)ରେ ସମସ୍ତ ଯାତ୍ରୀ ଖମରା ଗ୍ରାମରୁ ଦେବତାହଞ୍ଜର ଗ୍ରାମକୁ ଭୋଜି ଖାଇବାକୁ ଯାଉଥିଲେ। ଏହି ସମୟରେ ଅଟୋ ଭାରସାମ୍ୟ ହରାଇ ଓଲଟି ପଡ଼ିଥିଲା। ଏଥିରେ ସମସ୍ତ ଯାତ୍ରୀ ଆହତ ହୋଇଥିଲେ। ଖବର ପାଇ ନନ୍ଦପୁର ଥାନାଧିକାରୀ ତ୍ରିନାଥ ତୋଟାପାଡିଆ ଓ ଟିମ୍ ଆହତମାନଙ୍କୁ ନନ୍ଦପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ନେଇଥିଲେ। ପ୍ରାଥମିକ ଚିକିତ୍ସା ପରେ ଗୁରୁତରମାନଙ୍କୁ କୋରାପୁଟ ସ୍ଥାନାନ୍ତର କରାଯାଇଥିଲା। ଅଟୋ ଚାଳକ ନିଶାସକ୍ତ ଥିବା ଜାଣିବା ପରେ ପୋଲିସ ଥାନାକୁ ଆଣି ତଦନ୍ତ କରୁଛି। ଗୁରୁତରଙ୍କୁ କୋରାପୁଟ ସ୍ଥାନାନ୍ତର କରିବାକୁ ଆମ୍ବୁଲାନ୍ସ ମିଳିନଥିଲା। ଏହାକୁ ନେଇ ସାମାନ୍ୟ ଅସନ୍ତୋଷ ପ୍ରକାଶ ପାଇଥିଲା। ବାଧ୍ୟ ହୋଇ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ନାଲକୋ ପ୍ରଦତ୍ତ ଆମ୍ବୁଲାନ୍ସ ଭଡ଼ା କରି ଗୁରୁତରଙ୍କୁ କୋରାପୁଟ ନିଆଯାଇଥିବା ସୂଚନା ମିଳିଛି।
