ମେଲବୋନା,୧୪।୨(ପି.ଟି.): ଚଳିତ ଅଷ୍ଟ୍ରେଲିଆନ ଓପନ ଟେନିସ ଟୁର୍ନାମେଣ୍ଟରେ ଅଭିଜ୍ଞ ଭାରତୀୟ ଖେଳାଳି ରୋହନ ବୋପାନ୍ନା ମିକ୍ସଡ ଡବଲ୍ସ ଟୁର୍ନାମେଣ୍ଟରୁ ବାଦ୍ ପଡିଛନ୍ତି। ପ୍ରଥମ ରାଉଣ୍ଡରେ ବୋପାନ୍ନା ଓ ତାଙ୍କ ଚାଇନିଜ ପାର୍ଟନର ୟିଙ୍ଗ୍ୟିଙ୍ଗ୍ ଡୁଆନ ୪-୬, ୪-୬ ସେଟ୍ରେ ଆମେରିକୀୟ ଯୋଡି ବେଥାନି ମାଟେକ ସାଣ୍ଡ୍ସ ଓ ୟୁନାଇଟେଡ କିଙ୍ଗଡମ୍ର ଜେମି ମୁରେଙ୍କଠାରୁ ପରାସ୍ତ ହୋଇ ଟୁର୍ନାମେଣ୍ଟରୁ ବିଦାୟ ନେଇଛନ୍ତି। ଏଥିସହ ଅଷ୍ଟ୍ରେଲିଆନ୍ ଓପନ୍ରୁ ଭାରତୀୟ ଅଭିଯାନ ଶେଷ ହୋଇଛି। ମାତ୍ର ୧ ଘଣ୍ଟା ୩ ମିନିଟ୍ରେ ବୋପାନ୍ନା ଓ ଡୁଆନ ପରାସ୍ତ ହୋଇଥିଲେ।
ଏହାପୂର୍ବରୁ ପୁରୁଷ ଡବଲ୍ସ ଇଭେଣ୍ଟରେ ବୋପାନ୍ନା ଓ ତାଙ୍କ ଜାପାନ ସାଥୀ ବେନ୍ ମ୍ୟାକଲାଚଲାନ ୪-୬, ୬-୭ ସେଟ୍ରେ କୋରିଆ ଓ୍ବାଇଲ୍ଡକାର୍ଡ ଯୋଡି ଜି ସୁଙ୍ଗ ନାମ ଓ ମିନ୍କ୍ୟୁ ସଙ୍କଠାରୁ ପରାସ୍ତ ହୋଇ ବିଦାୟ ନେଇଥିଲେ। ସେହିପରି ଅନ୍ୟତମ ଭାରତୀୟ ଖେଳାଳି ଦିଭିଜ ଶରଣ ଓ ମହିଳା ଖେଳାଳି ଅଙ୍କିତା ରାଇନା ସେମାନଙ୍କ ପାର୍ଟନରଙ୍କ ସହ ଯଥାକ୍ରମେ ପୁରୁଷ ଓ ମହିଳା ଡବଲ୍ସରେ ଗୁରୁବାର ପରାସ୍ତ ହୋଇ ବିଦାୟ ନେଇସାରିଛନ୍ତି।
