ମେଲବୋର୍ନ,୨୬।୧୧(ଏପି): ବର୍ଷର ପ୍ରଥମ ଗ୍ରାଣ୍ଡସ୍ଲାମ ଟୁର୍ନାମେଣ୍ଟ ଅଷ୍ଟ୍ରେଲିଆନ ଓପନ୍ ଏଥର ସାମାନ୍ୟ ବିଳମ୍ବିତ ହେବ ବୋଲି ଭିକ୍ଟୋରିଆ କ୍ରୀଡ଼ାମନ୍ତ୍ରୀ ମାର୍ଟିନ ପାକୁଲା କହିଛନ୍ତି। ମେଲବୋର୍ନରେ ଜାନୁୟାରୀ ୧୮ରୁ ଆରମ୍ଭ ହେବାକୁ ଥିବା ଅଷ୍ଟ୍ରେଲିଆନ୍ ଓପନର ୨୦୨୧ ସଂସ୍କରଣ ଗୋଟିଏ କିମ୍ବା ଦୁଇ ସପ୍ତାହ ବିଳମ୍ବିତ ହେବର ଯଥେଷ୍ଟ ସମ୍ଭାବନା ରହିଛି ବୋଲି ସେ ସୂଚନା ଦେଇଛନ୍ତି।
ସରକାରଙ୍କ ବିଭାଗୀୟ କର୍ତ୍ତୃପକ୍ଷ ଓ ଟେନିସ ଅଧିକାରୀମାନେ ଆଲୋଚନା କରି ଏହି ଟୁର୍ନାମେଣ୍ଟ ଆୟୋଜନ ହେବ ବୋଲି ସିଦ୍ଧାନ୍ତରେ ପହଞ୍ଚିଛନ୍ତି। ତେବେ ଟୁର୍ନାମେଣ୍ଟ ଆରମ୍ଭରେ ବିଳମ୍ବ ଏକ ପ୍ରକାର ନିଶ୍ଚିତ ବୋଲି ସେ ସ୍ପଷ୍ଟ କରିଛନ୍ତି। ପୂର୍ବରୁ ଫ୍ରେଞ୍ଚ୍ ଓପନ ଗୋଟିଏ ମାସ ବିଳମ୍ବିତ ହୋଇଥିଲା। ଏପରିକି ଓ୍ବିମ୍ବେଲଡନ ଟୁର୍ନାମେଣ୍ଟ ମଧ୍ୟ ଆୟୋଜନ ହୋଇପାରି ନ ଥିଲା। ଆଗାମୀ ଦୁଇ ସପ୍ତାହ ମଧ୍ୟରେ ଟୁର୍ନାମେଣ୍ଟର ଅନ୍ତିମ ତାରିଖ ଧାର୍ଯ୍ୟ କରାଯିବ ବୋଲି ଅଷ୍ଟ୍ରେଲିଆନ ଓପନ ନିର୍ଦ୍ଦେଶକ ଓ ଟେନିସ ଅଷ୍ଟ୍ରେଲିଆ ମୁଖ୍ୟ କାର୍ଯ୍ୟନିର୍ବାହୀ କ୍ରେଗ ଟିଲେ ଗତ ସପ୍ତାହରେ କହିଥିଲେ। ସାଧାରଣତଃ ଏହି ଟୁର୍ନାମେଣ୍ଟ ଜାନୁୟାରୀର ଅନ୍ତିମ ଦୁଇ ସପ୍ତାହରେ ଆରମ୍ଭ ହୋଇଥାଏ।
କୋଭିଡ୍-୧୯ ମହାମାରୀ ଦ୍ୱାରା ଅଷ୍ଟ୍ରେଲିଆର ଭିକ୍ଟୋରିଆ ରାଜ୍ୟ ଗୁରୁତର ଭାବେ ପ୍ରଭାବିତ ହୋଇଛି। ଫଳରେ ମେଲବୋର୍ନରେ ସବୁଠାରୁ ଦୀର୍ଘ ଲକ୍ଡାଉନ ଜାରି କରାଯିବା ସହ ରାତ୍ରି କାଳୀନ କର୍ଫ୍ୟୁ, ଭ୍ରମଣଜନିତ ଓ ଅନ୍ୟାନ୍ୟ କଟକଣା ଜାରି କରାଯାଇଛି। ଅବଶ୍ୟ ଏବେ କୌଣସି ଆକ୍ଟିଭ କେସ୍ ଚିହ୍ନଟ କରାଯାଇନାହିଁ। ଅକ୍ଟୋବର ୨୮ ତାରିଖରେ ଶେଷଥର ପାଇଁ କୌଣସି ବ୍ୟକ୍ତି କରୋନାରେ ମୃତ୍ୟୁବରଣ କରିଥିଲେ। ତେବେ ଖେଳାଳିମାନେ ଅଷ୍ଟ୍ରେଲିଆରେ ପହଞ୍ଚିବା ପରେ କେତେଦିନ କ୍ୱାରାଣ୍ଟାଇନ୍ରେ ରହିବେ ସେ ନେଇ ପାକୁଲା କିଛି ସ୍ପଷ୍ଟ କରିନାହାନ୍ତି। କିନ୍ତୁ ଏବେ ଅଷ୍ଟ୍ରେଲିଆରେ ପହଞ୍ଚୁଥିବା ବ୍ୟକ୍ତି ବାଧ୍ୟତାମୂଳକ ଭାବେ ୧୪ ଦିନ କ୍ୱାରାଣ୍ଟାଇନରେ ରହିବା ନିୟମ ବଳବତ୍ତର ରହିଛି। ଆଗାମୀ ଦିନରେ ଏ ସଂକ୍ରାନ୍ତରେ ସବୁକିଛି ସ୍ପଷ୍ଟ କରାଯିବ ବୋଲି କୁହାଯାଇଛି।
