ମୁମ୍ବାଇ,୨୩ା୧୨: ଅଷ୍ଟ୍ରେଲିଆ ବିପକ୍ଷ ଏକମାତ୍ର ମହିଳା ଟେଷ୍ଟକୁ ନିୟନ୍ତ୍ରଣରେ ରଖିଛି ଭାରତ। ତୃତୀୟ ଦିନର ଷ୍ଟମ୍ପ ଅପସାରଣ ସୁଦ୍ଧା ଅଷ୍ଟ୍ରେଲିଆ ୫ ଉଇକେଟ ହରାଇ ୨୩୩ ରନ୍ କରିବା ସହିତ ୪୬ ରନ୍ରେ ଆଗୁଆ ରହିଛି। ଆଉ ଗୋଟିଏ ଦିନ ବାକି ରହିଥିବା ବେଳେ ଏହି ମ୍ୟାଚ୍ଟି ବର୍ତ୍ତମାନ ପାଖାପାଖି ଭାରତ ସପକ୍ଷରେ ରହିଛି।
ଦ୍ୱିତୀୟ ଦିନର ଅସମାପ୍ତ ସ୍କୋର ୭ ଉଇକେଟରେ ୩୭୬ ରନରୁ ଖେଳ ଆରମ୍ଭ କରି ଭାରତ ୪୦୬ ରନ୍ରେ ସମସ୍ତ ଉଇକେଟ ହରାଇଥିଲା। ଦୁଇ ଅପରାଜିତ ବ୍ୟାଟର ଦୀପ୍ତି ଶର୍ମା(୭୮) ଓ ପୂଜା ବସ୍ତ୍ରକାର (୪୭) ସଅଳ ଆଉଟ ହୋଇଥିଲେ। ଦଳୀୟ ସ୍କୋର ୩୯୬ ରନ୍ରେ ପୂଜା ପ୍ୟାଭିଲିୟନ ଫେରିଥିଲେ। ଅଷ୍ଟ୍ରେଲିଆ ପକ୍ଷରୁ ୮ ଜଣ ବୋଲର ନିୟୋଜିତ ହୋଇଥିବା ବେଳେ ଆଶ୍ଲେ ଗାର୍ଡନର ସର୍ବାଧିକ ୪ ଉଇକେଟ ନେଇଥିଲେ। ଅନ୍ୟମାନଙ୍କ ମଧ୍ୟରେ କିମ୍ ଗାର୍ଥ ଓ ଆନାବେଲ ସଦରଲାଣ୍ଡ ଦୁଇଟି ଲେଖାଏ ଉଇକେଟ ନେଇଥିଲେ। ଅଷ୍ଟ୍ରେଲିଆ ପ୍ରଥମ ଇନିଂସରେ ୨୧୯ ରନ କରିଥିବା ବେଳେ ଭାରତ ୧୮୭ ରନ୍ରେ ଆଗୁଆ ରହିଥିଲା।
ଅଷ୍ଟ୍ରେଲିଆ ଦ୍ୱିତୀୟ ଇନିଂସ ଆରମ୍ଭ କରିଥିବା ବେଳେ ଦୁଇ ଓପନର ବେଥ୍ ମୁନି(୪୯) ଓ ଫିବ୍ ଲିଚଫିଲ୍ଡ(୧୮) ପ୍ରଥମ ଉଇକେଟରେ ୪୯ ରନ୍ ଯୋଡିଥିଲେ। ମୁନି ରନ୍ଆଉଟ ହୋଇଥିବା ବେଳେ ଫିବ୍ଙ୍କୁ ବୋଲ୍ଡ କରିଥିଲେ ସ୍ନେହ ରାଣା। ତେବେ ଏଲିସ୍ ପେରୀ(୪୫) ଓ ଟାଲିଆ ମ୍ୟାକ୍ଗ୍ରା(୭୩) ତୃତୀୟ ଉଇକେଟରେ ୮୪ ରନ୍ ଯୋଡିଥିଲେ। ପେରୀ ୯୧ ବଲ୍ ଖେଳି ୫ ଚୌକା ସହାୟତାରେ ୪୫ ରନ୍ କରିଥିବା ବେଳେ ମ୍ୟାକ୍ଗ୍ରା ୧୭୭ ବଲ୍ ଖେଳି ୧୦ ଚୌକା ମାରିଥିଲେ। ପେରୀଙ୍କୁ ଆଉଟ କରି ରାଣା ଭାରତକୁ ଦ୍ୱିତୀୟ ସଫଳତା ପ୍ରଦାନ କରିଥିଲେ। ଅଧିନାୟିକା ଏଲିସା ହିଲୀ(୩୨) ଓ ଟାଲିଆ ମ୍ୟାକ୍ଗ୍ରା ଚତୁର୍ଥ ଉଇକେଟରେ ୬୬ ରନ୍ ଯୋଡିଥିଲେ। ତେବେ ପାର୍ଟ ଟାଇମର ତଥା ଭାରତୀୟ ଅଧିନାୟିକା ହରମନପ୍ରୀତ୍ କୌର ଉଭୟଙ୍କୁ ମାତ୍ର ୧୫ ରନ୍ ବ୍ୟବଧାନରେ ଆଉଟ କରିଥିଲେ। ଷ୍ଟମ୍ପ ଅପସାରଣ ବେଳକୁ ଆନାବେଲ୍ ସଦରଲାଣ୍ଡ(୧୨) ଓ ଆସ୍ଲେ ଗାର୍ଡନର(୭) ରନ୍ରେ ବ୍ୟାଟିଂ କରୁଛନ୍ତି। ଭାରତ ପକ୍ଷରୁ ହରମନପ୍ରୀତ୍ କୌର ଓ ସ୍ନେହ ରାଣା ଗୋଟିଏ ଲେଖାଏ ଉଇକେଟ ନେଇଛନ୍ତି।
