ଦାରିଙ୍ଗବାଡ଼ି,୨୯ା୫(ଡି.ଏନ୍.ଏ.): କନ୍ଧମାଳ ଜିଲା ଦାରିଙ୍ଗବାଡ଼ି ଥାନା ସୋନପୁର ପଞ୍ଚାୟତର ସରପଞ୍ଚ କେଶରସେନ ମୁଠାମାଝିଙ୍କୁ କିଛି ଦୁର୍ବୁତ୍ତ ହତ୍ୟା ଧମକ ଦେଇଥିବା ଦାରିଙ୍ଗବାଡ଼ି ଥାନାରେ ଅଭିଯୋଗ ହୋଇଛି। ଏନେଇ ପୋଲିସ ପକ୍ଷରୁ ୮୯/୨୧ରେ ଏକ ମାମଲା ରୁଜୁ କରି ତଦନ୍ତ ଚାଲିଥିବା ଆଇଆଇସି କୌଶିକ ମାଝି କହିଛନ୍ତି।
ପୋଲିସ ସୂତ୍ରରୁ ମିଳିଥିବା ସୂଚନା ଅନୁସାରେ, ଉକ୍ତ ଗ୍ରାମର କିଛି ଲୋକ ଏକ ବୋଲେରୋରେ ଯାଉଥିବା ବେଳେ ଉକ୍ତ ଗ୍ରାମର ଏକ ଟ୍ରାକ୍ଟର ବୋଲେରୋ ସହ ମୁହାଁମୁହିଁ ହୋଇ ବଡ଼ ଦୁର୍ଘଟଣାରୁ ଅଳ୍ପକେ ବର୍ତ୍ତିଥିଲା। ଏହାକୁ ନେଇ ଟ୍ରାକ୍ଟର ଚାଳକ ଏବଂ ବୋଲେରୋରେ ବସିଥିବା ଲୋକଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା। ଟ୍ରାକ୍ଟରଟି ଉକ୍ତ ସୋନପୁର ସରପଞ୍ଚଙ୍କ ପୁଅ ଚଳାଉଥିବା ବେଳେ ସେହି ବୋଲେରୋରେ ବସିଥିବା ଲୋକ ସରପଞ୍ଚଙ୍କ ପୁଅ ଏଭଳି ବିପଦପୁର୍ଣ୍ଣ ଭାବେ ଦ୍ରୁତଗତରେ ଚଳାଉଥିବା ନେଇ ଅଭିଯୋଗ କରିବାକୁ ସରପଞ୍ଚଙ୍କ ଘରେ ପହଞ୍ଚିଥିଲେ। ସେଠାରେ ସରପଞ୍ଚଙ୍କୁ ହତ୍ୟା ଧମକ ଦେଇଥିବା ନେଇ ସରପଞ୍ଚ ଥାନାରେ ଅଭିଯୋଗ କରିଛନ୍ତି ବୋଲି ପୋଲିସ କହିଛି। ସରପଞ୍ଚଙ୍କ ସାହିରେ ବୋଲେରୋଟିକୁ ଗ୍ରାମବାସୀ ଅଟକ ରଖି ଶୁକ୍ରବାର ଥାନାରେ ଅଭିଯୋଗ ଦେବା ପରେ ପୋଲିସ ପହଞ୍ଚି ବୋଲେରୋଟିକୁ ଥାନାକୁ ଆଣିଥିବା ପୋଲିସ ସୂତ୍ରରୁ ଜଣାପଡ଼ିଛି। ହତ୍ୟା ଧମକ ଦେଇଥିବା ଲୋକମାନେ ଉକ୍ତ ଅଞ୍ଚଳର ଏବଂ ସେମାନଙ୍କ ମଧ୍ୟରେ ଜଣେ ଶିକ୍ଷକ ରହିଥିବା ଆଇଆଇସି କହିଛନ୍ତି।
