ପୁରୀ ଅଫିସ,୧୮।୪: କିଛି ଦିନର ବ୍ୟବଧାନ ପରେ ଶ୍ରୀକ୍ଷେତ୍ରରେ ପୁଣି ରକ୍ତ ଛିଟା ପଡ଼ିଛି। ରବିବାର ଭୋର ସମୟରେ ପୁରୀ ଦଇତାପଡ଼ା ସାହିର ଜଣେ ଯୁବକ ଟିକନ ଶତପଥୀ(୪୬)ଙ୍କ ଘରେ ପଶି କେତେଜଣ ଦୁର୍ବୃତ୍ତ ତାଙ୍କୁ ମରଣାନ୍ତକ ଆକ୍ରମଣ କରିଛନ୍ତି। ଟିକନ ଘରେ ଏକାକୀ ରହୁଥିଲେ। ଆକ୍ରମଣ ପରେ ଟିକନ ଘୋଷାରି ହୋଇ ଚୁଡ଼ାପଟ୍ଟି ରାସ୍ତା ପର୍ଯ୍ୟନ୍ତ ଆସିଥିଲେ। ସେଠାରେ ସ୍ଥାନୀୟ ଲୋକେ ତାଙ୍କୁ ରକ୍ତ ଜୁଡ଼ୁବୁଡ଼ୁ ଅବସ୍ଥାରେ ଦେଖିବା ପରେ ଉଦ୍ଧାର କରି ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଇଥିଲେ। ପରେ ତାଙ୍କ ସ୍ବାସ୍ଥ୍ୟାବସ୍ଥା ଗୁରୁତର ହେବାରୁ ତାଙ୍କୁ କଟକସ୍ଥିତ ଏସ୍ସିବି ମେଡିକାଲକୁ ସ୍ଥାନାନ୍ତର କରାଯାଇଛି। ଟିକନଙ୍କ ପଡ଼ୋଶୀ ଘର ଲୋକଙ୍କ ଅଭିଯୋଗ ଆଧାରରେ ପୋଲିସ ଏକ ମାମଲା ରୁଜୁ କରି ଦୁର୍ବୃତ୍ତଙ୍କୁ ଖୋଜୁଛି। ଟିକନଙ୍କ ଶରୀରର ଅନେକ କ୍ଷତ ହୋଇଥିବା ବେଳେ ମୁଣ୍ଡ, ବାମ ଗୋଡ଼ ଓ ବାମ ହାତରେ ଗଭୀର ଆଘାତ ଲାଗିଛି। କୌଣସି ଧାରୁଆ ଅସ୍ତ୍ର ସହାୟତାରେ ତାଙ୍କୁ ଆକ୍ରମଣ କରାଯାଇଥିବା ପୋଲିସ ଅନୁମାନ କରୁଛି।
ତେବେ ସ୍ଥାନୀୟ ଲୋକଙ୍କ କହିବା ଅନୁଯାୟୀ, ଟିକନ ଜଣେ ନିିଶା ବେପାରୀ। ତାଙ୍କ ଘରକୁ ଅନେକ ନିଶାସେବନକାରୀ ଆସିଥାନ୍ତି। ନିଶା ବେପାରକୁ କେନ୍ଦ୍ର କରି ତାଙ୍କ ଉପରେ ଆକ୍ରମଣ ହୋଇଥିବା ସ୍ଥାନୀୟ ଲୋକେ ଅନୁମାନ କରୁଛନ୍ତି। ଟିକନଙ୍କ ପରିବାର ଲୋକେ ଦିଲ୍ଲୀରେ ରହୁଛନ୍ତି। ତାଙ୍କର ମା’ ଓ ଦୁଇ ଭଉଣୀ ଥିବାବେଳେ କେହି ତାଙ୍କ ପାଖରେ ରହୁନାହାନ୍ତି। ସେ ଏକାକୀ ଏଠାରେ ରୁହନ୍ତି। ପୋଲିସ ଟିକନଙ୍କ ପରିବାର ଲୋକଙ୍କ ସହ ଯୋଗାଯୋଗ କରି ଏତଲା ଦେଇଥିବା ବେଳେ ଏକାଧିକ ଦୁର୍ବୃତ୍ତ ଏହି ଆକ୍ରମଣ ଘଟଣାରେ ସମ୍ପୃକ୍ତ ଥିବା ଅନୁମାନ କରୁଛି। ସେହିଭଳି ଚିକିତ୍ସା ପରେ ଟିକନଙ୍କ ସ୍ବାସ୍ଥ୍ୟାବସ୍ଥାରେ ସୁଧାର ଆସୁଥିବା ଆଇଆଇସି ଗୋକୁଳ ରଞ୍ଜନ ଦାଶ କହିଛନ୍ତି।
