ସୁନ୍ଦରଗଡ଼,୧୨।୫(ଡି.ଏନ୍.ଏ.): ସୁନ୍ଦରଗଡ଼ ଜିଲା ବୀରମିତ୍ରପୁର ଥାନା ପୋଲିସ ମଙ୍ଗଳବାର ବିଳମ୍ବିତ ରାତିରେ ଏକ ଜୁଆଆଡ୍ଡା ଉପରେ ଚଢ଼ାଉ କରି ୫ ଲକ୍ଷରୁ ଊର୍ଦ୍ଧ୍ୱ ଟଙ୍କା,୧୦ ବାଇକ୍, ୪ଟି ବୋଲେରୋ, ଗୋଟିଏ କାର୍ ସହ ୧୧ଟି ମୋବାଇଲ ଓ ଅନ୍ୟାନ୍ୟ ସାମଗ୍ରୀ ଜବତ କରିଛି। ଏହି ଘଟଣାରେ ପୋଲିସ ୧୩ ଜଣଙ୍କୁ ଗିରଫ କରି ପରେ ଥାନାରୁ ବ୍ୟକ୍ତିଗତ ମୁଚାଲିକାରେ ଛାଡ଼ି ଦେଇଛି।
ପ୍ରକାଶ ଯେ, ଏହି ଥାନା ଅନ୍ତର୍ଗତ କପିଳାସ ନିକଟରେ ଜୁଆଖେଳ ଚାଲିଥିବା ବିଶ୍ବସ୍ତ ସୂତ୍ରରୁ ସୂଚନା ପାଇ ଏସ୍ପି ସାଗରିକା ନାଥଙ୍କ ନିର୍ଦ୍ଦେଶ କ୍ରମେ ପୋଲିସ ଉକ୍ତ ସ୍ଥାନରେ ଚଢ଼ାଉ କରିଥିଲା। କୋଭିଡ ମହମାରୀକୁ ଖାତିର ନ କରି ସ୍ଥାନୀୟ ଓ ପଡ଼ୋଶୀ ଝାଡ଼ଖଣ୍ଡ ରାଜ୍ୟର ପ୍ରାୟ ୧୩ ଜଣ ଏହି ଖେଳ ଖେଳୁଥିଲେ। ପୋଲିସ ଚଢ଼ାଉ ବେଳେ ଅଭିଯୁକ୍ତମାନେ ଦୌଡ଼ି ପଳାଇଥିଲେ। ପୋଲିସ ସେଠାରୁ ଘୁଡ଼ୁଘୁଡି ପଟି, ନଗଦ ୫ଲକ୍ଷ ୩୧ ହଜାର ୪୧୦ ଟଙ୍କା,୧୦ ବାଇକ୍, ଗୋଟିଏ ବୋଲେରୋ ୩ଟି କାର୍ ଜବତ କରିଛି। ଏଥିସହ ୧୧ଟି ମୋବାଇଲ, ଖେଳରେ ବ୍ୟବହୃତ ଘୁଡୁଘୁଡି ପଟି ଓ ଅନ୍ୟାନ୍ୟ ସାମଗ୍ରୀ ଜବତ ହୋଇଛି। ଏହି ଚଢ଼ାଉ ବେଳେ ଜୁଆଆଡ୍ଡାରେ ୨୫ରୁ ୩୦ ଜଣ ଥିଲେ। ପୋଲିସ ସ୍କ୍ବାଡକୁ ଦେଖି ସେମାନେ ସେଠାରୁ ଗାଡ଼ି ଓ ବାଇକ ଛାଡ଼ି ଦୌଡ଼ି ପଳାଇଥିଲେ। ସେମାନଙ୍କ ମଧ୍ୟରୁ ୧୩ ଜଣ ଗିରଫ କରାଯାଇଥିବା ଏସ୍ପି ସୂଚନା ଦେଇଛନ୍ତି।
