ନୟାଗଡ,୮।୯(ଲୋକନାଥ ମିଶ୍ର): ଖଣ୍ଡପଡ଼ା ବିଧାୟକ ସୌମ୍ୟରଞ୍ଜନ ପଟ୍ଟନାୟକ ନିଜ ଖବରକାଗଜରେ ସରକାରଙ୍କୁ ସମାଲୋଚନା କରିବା ପରେ ନୟାଗଡ଼ ବିଧାୟକ ଅରୁଣ ସାହୁ ତାଙ୍କୁ କଡ଼ା ସମାଲୋଚନା କରିଛନ୍ତି। ନୟାଗଡ଼ ଡାକବଙ୍ଗଳାଠାରେ ଗୁରୁବାର ସେ ଏକ ଖବରଦାତା ସମ୍ମିଳନୀ କରି ସୌମ୍ୟଙ୍କୁ ପ୍ରଶ୍ନ କରିଛନ୍ତି । ଅରୁଣ କହିଛନ୍ତି, ସୌମ୍ୟରଞ୍ଜନ ହାରି ହାରି ବିଜୁ ଜନତା ଦଳରୁ ପ୍ରାର୍ଥୀ ହୋଇ ଖଣ୍ଡପଡ଼ାରୁ ଜିତିଥିଲେ। ତେବେ ମନ୍ତ୍ରୀପଦ ନ ମିଳିବାରୁ ଆଜି ସେ ବିଜୁ ଜନତା ଦଳ ଏବଂ ସରକାରଙ୍କ ବିରୋଧରେ କହୁଛନ୍ତି। ସୌମ୍ୟରଞ୍ଜନ ଏବେ କିଛିଦିନ ହେଲା ବଡ଼ ବିଚଳିତ ଅଛନ୍ତି । ଉଦ୍ଭଟ କଥା କହୁଛନ୍ତି । ମୁଁ ତାଙ୍କୁ ଗୋଟିଏ ଛୋଟିଆ ପ୍ରଶ୍ନ ପଚାରିବାକୁ ଚାହେଁ । ଏବେ ତାଙ୍କର ଚୈତନ୍ୟ ଉଦୟ ହେଲା ଭଳି କଥା କହୁଛନ୍ତି । ପାର୍ଟି ଆଗ ନା ମାଟି ଆଗ। ସେ ରାଜ୍ୟ ସଭା ସଦସ୍ୟ ଭାବେ ନିର୍ବାଚିତ ହୋଇଥିଲେ। ସାରା ଓଡ଼ିଶା ମାଟିର ସେବା କରିପାରିଥାନ୍ତେ । ବହୁଦିନ ହେଲା ହାରି ହାରି ଖଣ୍ଡପଡ଼ାରେ ସେ ବିଧାୟକ ହେଲେ । ୪ ବର୍ଷ ୪ମାସ ଗଲା । ଖଣ୍ଡପଡ଼ା ମାଟିର ସମସ୍ତଙ୍କୁ ପ୍ରଶ୍ନ ପଚାରିବା, ମାଟିର ସେବା ଓ ସମାଜସେବା କେତେ କଲେ। ସମାଜ ସେବାର ନଁାଗନ୍ଧ ନାହିଁ। ମାଟିର ସେବା ବହୁତ ଦୂରେ ଥାଉ । ଏବେ ସେ ଅନେକ ସମୟରେ ମୁଖ୍ୟମନ୍ତ୍ରୀଙ୍କ ଅଫିସକୁ ଟାର୍ଗେଟ କରିବା ଏବଂ ନିଜକୁ ଏକ ବିରାଟ ଶକ୍ତିଶାଳୀ ସମାଜସେବୀ ଭାବେ ଉପସ୍ଥାପିତ କରିବାରେ ଲାଗିଛନ୍ତି। ଏସବୁ ହେଉଛି ତାଙ୍କ ଅସ୍ଥିରତାର ଲକ୍ଷଣ । ଖଣ୍ଡପଡ଼ାରେ ବିଧାୟକ ହେବା ପରେ ତାଙ୍କର ଏକମାତ୍ର ଉଦ୍ଦେଶ୍ୟ ଥିଲା କେମିତି ମନ୍ତ୍ରୀଟିଏ ହେବି । ତେଣୁ ମନ୍ତ୍ରୀ ହେବା ଯେତେବେଳେ ତାଙ୍କ ସୌଭାଗ୍ୟରେ ଜୁଟିଲା ନାହିଁ ସେ ହତାଶାରେ ଅନେକ କଥା କହୁଛନ୍ତି। ଗତ ୪ ବର୍ଷ ୪ମାସ ଭିତରେ ସୌମ୍ୟରଞ୍ଜନ ମାଟିର କଥା କେତେ ବୁଝିଛନ୍ତି। ସେ ଖଣ୍ଡପଡ଼ାବାସୀଙ୍କଠାରୁ ଉତ୍ତର ମାଗନ୍ତୁ। ସେ କୁଆଡ଼େ ଢଳୁଛନ୍ତି କୁଆଡେ ଢଳୁଥିଲେ କୁଆଡେ ଢଳିବେ ସେଇଟା ତାଙ୍କ ଛଡ଼ା କାହାକୁ ଜଣାନାହିଁ । କୌଣସି ଉଦ୍ଦେଶ୍ୟ ନ ଥାଇ ସେ କିଛି କରନ୍ତି ନାହିଁ। ସବୁଠାରୁ ବଡ଼ କଥା ହେଉଛି ୪ବର୍ଷ ଭିତରେ ସେ ନା ମାଟିର କଥା ବୁଝିଲେ ନା ପାର୍ଟିର କଥା ବୁଝିଲେ। କେବଳ ନିଜ କଥା ବୁଝନ୍ତି । ନିଜ ଇଚ୍ଛା ଚରିତାର୍ଥ କରିବାକୁ ଚେଷ୍ଟା କରନ୍ତି। ଯେତେବେଳେ ସେଥିରେ ସେ ସଫଳ ହୁଅନ୍ତି ନାହିଁ ସେତେବେଳେ ଏହିଭଳି ବ୍ଲାକ୍ମେଲ କରିବା ଭଳି ପନ୍ଥା ଆପଣେଇ ନିଅନ୍ତି । ବ୍ଲାକ୍ମେଲିଂ କରିବାର କଥାରେ ସଫଳ ନ ହେବାରୁ ସେ ଉଗ୍ର ହୋଇ ପଡିଛନ୍ତି ବୋଲିି ଅରୁଣ କହିଛନ୍ତି ।
