ହାଙ୍ଗଝୋ,୨୭।୯: ନେପାଳ ପୁରୁଷ ଦଳ ବୁଧବାର ମୋଙ୍ଗୋଲିଆ ବିପକ୍ଷ ଏସିଆନ ଗେମ୍ସ ଗ୍ରୁପ ମ୍ୟାଚ ସମୟରେ ଇତିହାସ ରଚିଛି। ହାଙ୍ଗଝୋରେ ପୁରୁଷ କ୍ରିକେଟର ଉଦ୍ଘାଟନୀ ମ୍ୟାଚରେ ନେପାଳ ଟି -୨୦ କ୍ରିକେଟର ଅନେକ ରେକର୍ଡ ଭାଙ୍ଗିଛି। ସୋମବାର ମହିଳା କ୍ରିକେଟରେ ଭାରତ ସ୍ବର୍ଣ୍ଣ ପଦକ ଜିତିବା ପରେ ପୁରୁଷ ଇଭେଣ୍ଟର ପ୍ରଥମ ମ୍ୟାଚରେ ବିଶ୍ୱ ରେକର୍ଡ ସୃଷ୍ଟି ହୋଇଛି। ନେପାଳ ୨୦ ଓଭରରେ ୩୧୪/୩ର ଅବିଶ୍ୱସନୀୟ ସ୍କୋର କରିଛି ଏବଂ ଟି -୨୦ କ୍ରିକେଟରେ ୩୦୦ମାର୍କ ଅତିକ୍ରମ କରିଥିବା ପ୍ରଥମ ଦଳ ହୋଇପାରିଛି। ଏସିଆନ ଗେମ୍ସ ମ୍ୟାଚକୁ ଅନ୍ତର୍ଜାତୀୟ ଟି -୨୦ ମାନ୍ୟତା ଦିଆଯିବ ବୋଲି ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି) ନିଶ୍ଚିତ କରିସାରିଛି।
ଏଥିସହ, ଦିପେନ୍ଦ୍ର ସିଂ ଆରି ଟି -୨୦ ଅର୍ଦ୍ଧଶତକ ପାଇଁ ଯୁବରାଜ ସିଂଙ୍କ ଦୀର୍ଘ ଦିନର ରେକର୍ଡ ଭାଙ୍ଗିଛନ୍ତି। ୨୦୦୭ ବିଶ୍ୱକପ୍ ସମୟରେ ଇଂଲଣ୍ଡ ବିପକ୍ଷରେ ୧୨ଟି ବଲରେ ଯୁବରାଜ ଅର୍ଦ୍ଧଶତକ ହାସଲ କରିଥିଲେ। ସମାନ ଇନିଂସରେ ସେ ଗୋଟିଏ ଓଭରରେ ୬ଟି ଛକା ମାରିଥିଲେ। ସେହିପରି ଦିପେନ୍ଦ୍ର ସିଂ ମାତ୍ର ୯ ବଲରେ ନିଜର ଅର୍ଦ୍ଧଶତକ ପୂରଣ କରିଛନ୍ତି।
