ଇନ୍ଦୋର,୨।୩: ବର୍ଡର-ଗାଭାସ୍କର ଟ୍ରଫି ୨୦୨୩ର ତୃତୀୟ ଟେଷ୍ଟ ମ୍ୟାଚର ଦ୍ୱିତୀୟ ଦିନରେ ଆର ଅଶ୍ୱିନ ଏକ ବଡ଼ ସଫଳତା ଅର୍ଜନ କରିଛନ୍ତି। ସେ ଅନ୍ତର୍ଜାତୀୟ କ୍ରିକେଟରେ ଭାରତୀୟ ଦଳ ପାଇଁ ତୃତୀୟ ସର୍ବାଧିକ ଉଇକେଟ ନେଇଛନ୍ତି। ସେ ଭେଟେରାନ ଅଲରାଉଣ୍ଡର କପିଲ ଦେବଙ୍କୁ ପଛରେ ପକାଇଛନ୍ତି।
ଇନ୍ଦୋରରେ ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ଖେଳାଯାଉଥିବା ଟେଷ୍ଟର ଦ୍ୱିତୀୟ ଦିନର ପ୍ରଥମ ଅଧିବେଶନରେ ଅଶ୍ୱିନ ତିନିଟି ଉଇକେଟ ନେଇଥିଲେ। ପ୍ରଥମେ ପିଟର ହ୍ୟାଣ୍ଡସକମ୍ବଙ୍କ ଉଇକେଟ ନେଇ ସେ କପିଲ ଦେବଙ୍କ ୬୮୭ ଅନ୍ତର୍ଜାତୀୟ ଉଇକେଟ ରେକର୍ଡ ସହ ସମକକ୍ଷ ହୋଇଥିଲେ। ତା’ପରେ ଆଲେକ୍ସ କେରିଙ୍କୁ ପାଭିଲିୟନକୁ ପଠାଇବାବେଳେ ଅଶ୍ୱିନ କପିଲ ଦେବଙ୍କୁ ଅତିକ୍ରମ କରିଥିଲେ। ଅଶ୍ୱିନ ଏଠାରେ ଅଟକି ନ ଥିଲେ। ସେ ନାଥନ ଲିଅନଙ୍କ ଉଇକେଟ୍ ନେଇ ଅନ୍ତର୍ଜାତୀୟ କ୍ରିକେଟରେ ଭାରତୀୟ ଦଳ ପାଇଁ ତୃତୀୟ ସର୍ବାଧିକ ନେଇଥିଲେ।
ଅନିଲ କୁମ୍ବଲେ ଭାରତ ପାଇଁ ସର୍ବାଧିକ ଅନ୍ତର୍ଜାତୀୟ ଉଇକେଟ ନେଇଛନ୍ତି। ୪୦୩ ଅନ୍ତର୍ଜାତୀୟ ମ୍ୟାଚର ୫୦୧ ଇନିଂସରେ କୁମ୍ବଲେ ମୋଟ ୯୫୬ ଉଇକେଟ ନେଇଛନ୍ତି। ଏଠାରେ ହରଭଜନ ସିଂଙ୍କ ନାମ ଦ୍ୱିତୀୟ ସ୍ଥାନରେ ରହିଛି। ୩୬୭ଟି ମ୍ୟାଚ୍ର ୪୪୪ ଇନିଂସରେ ହରଭଜନ ୭୧୧ ଉଇକେଟ ନେଇଛନ୍ତି। ଏଥି ସହିତ, ବର୍ତ୍ତମାନ ଆର ଅଶ୍ୱିନ ତିନି ନମ୍ବରରେ ପହଞ୍ଚିଛନ୍ତି। ଅଶ୍ୱିନ ଏପର୍ଯ୍ୟନ୍ତ ୨୬୯ ମ୍ୟାଚର ୩୪୭ ଇନିଂସରେ ୬୮୯ ଉଇକେଟ ନେଇଛନ୍ତି।
