ନୂଆଦିଲ୍ଲୀ,୧୭।୨: ଇଣ୍ଡିଆନ୍ ପ୍ରିମିୟର ଲିଗ୍(ଆଇପିଏଲ୍) ୨୦୨୧ ଲାଗି ଗୁରୁବାର ଚେନ୍ନାଇରେ ନିଲାମୀ ପ୍ରକ୍ରିୟା କରାଯିବ। ଏଥିପାଇଁ ୧୧୧୪ ଖେଳାଳି ନାମାଙ୍କନ କରିଥିଲେ। ହେଲେ ସେଥିରୁ ୨୯୨ଜଣ ଫାଇନାଲ ପାଇଁ ମନୋନୀତ ହୋଇଛନ୍ତି। ସମସ୍ତ ୮ଟି ଫ୍ରାଞ୍ଚାଇଜ୍ ୬୧ଜଣ ଖେଳାଳିଙ୍କ ପାଇଁ ଦାମ ନିର୍ଦ୍ଧାରିତ କରିବ। ଏଥିରେ ଘରୋଇ କ୍ରିକେଟଠାରୁ ଆରମ୍ଭ କରି ଲୋକପ୍ରିୟ ଅନ୍ତରାଷ୍ଟ୍ରୀୟ ଖେଳାଳି ଭାଗ ନେଉଛନ୍ତି। ତେବେ ଏହାର ଗୋଟିଏ ଦିନ ପୂର୍ବରୁ ଭାରତର ପୂର୍ବ ବୋଲର୍ ଆଶିଷ ନେହେରା ବଡ଼ ଭବିଷ୍ୟବାଣୀ କରିଛନ୍ତି। ନିଲାମୀରେ କେଉଁ ଖେଳାଳି ସବୁଠାରୁ ମହଙ୍ଗା ରହିବେ ତାହା ସେ କହିଛନ୍ତି।
ଆଇପିଏଲ୍ରେ ବିଦେଶୀ ଖେଳାଳିଙ୍କୁ ବେଶ୍ ପସନ୍ଦ କରାଯାଇଥାଏ। ଚଳିତ ଥର ମଧ୍ୟ ତାହା ହୋଇପାରେ। ଗ୍ଲେନ୍ ମାକ୍ସଓ୍ବେଲ ଏବଂ କ୍ରିସ୍ ମୋରିସ ଅଧିକାଂଶ ଫ୍ରାଞ୍ଚାଇଜ୍ଙ୍କ ପସନ୍ଦ ତାଲିକାରେ ଥିବା ନେଇ କୁହାଯାଉଥିବା ବେଳେ ନେହେରା କିନ୍ତୁ ସହମତି ପ୍ରକାଶ କରିନାହାନ୍ତି। ସେ ବାଂଲାଦେଶୀ ଅଲରାଉଣ୍ଡର ଶକିବ ଅଲ ଅସନଙ୍କ ଡିମାଣ୍ଡ ଅଧିକ ରହିବ ବୋଲି କହିଛନ୍ତି। ଶକିବ ସବୁଠାରୁ ମହଙ୍ଗା ସାବ୍ୟସ୍ତ ହେବେ। ତାଙ୍କ ପାଖରେ ଯେକୌଣସି ଟିମ୍ରେ ସନ୍ତୁଳନ ରଖିବାର କ୍ଷମତା ରହିଛି ବୋଲି ନେହେରା କହିଛନ୍ତି।
