ଭୁବନେଶ୍ୱର,୫।୬(ବ୍ୟୁରୋ): ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନୂଆ ଟିମ୍ରେ ୩ ବିବାଦୀୟ ମନ୍ତ୍ରୀଙ୍କୁ ସ୍ଥାନ ମିଳି ନ ଥିବା କୁହାଯାଉଛି। ବରିଷ୍ଠ ମନ୍ତ୍ରୀ ଅରୁଣ କୁମାର ସାହୁ, ପ୍ରତାପ ଜେନା ଏବଂ ଦିବ୍ୟଶଙ୍କର ମିଶ୍ରଙ୍କୁ ମନ୍ତ୍ରୀଙ୍କ ନାମ ସମ୍ଭାବ୍ୟ ତାଲିକାରେ ନାହିଁ। ଏହି ୩ ନେତା ଭିନ୍ନଭିନ୍ନ ପ୍ରସଙ୍ଗକୁ ନେଇ କିଛିଦିନ ତଳେ ବିବାଦରେ ରହିଥିଲେ। ମାହାଙ୍ଗା ଡବଲ ମର୍ଡର ପ୍ରସଙ୍ଗରେ ପ୍ରତାପ, ପରୀ ହତ୍ୟାକାଣ୍ଡ ଘଟଣାକୁ ନେଇ ଅରୁଣ ଏବଂ ମମିତା ମେହେର ହତ୍ୟା ଘଟଣାରେ ଦିବ୍ୟଶଙ୍କର ବିବାଦୀୟ ହୋଇଥିଲେ। ଏହିସବୁ ପ୍ରସଙ୍ଗରେ ବିରୋଧୀ ରାଜ୍ୟରେ ପ୍ରବଳ ହଙ୍ଗାମା କରିବା ସହ ଉକ୍ତ ୩ ଜଣଙ୍କୁ ମନ୍ତ୍ରିମଣ୍ଡଳରୁ ବାଦ୍ ଦେବାକୁ ଦାବି କରି ଆସୁଥିଲେ। ଶେଷରେ ମୁଖ୍ୟମନ୍ତ୍ରୀଙ୍କ ୫ମ ପାଳିର ଦ୍ୱିତୀୟ ଥର ମନ୍ତ୍ରିମଣ୍ଡଳରେ ଏମାନଙ୍କୁ ବାଦ୍ ଦେଇ ନୂଆ ମୁହଁକୁ ସ୍ଥାନ ଦେଇଥିବା କୁହାଯାଉଛି। ଅରୁଣ ସାହୁ କୃଷି ଏବଂ ଉଚ୍ଚଶିକ୍ଷା ବିଭାଗର ମନ୍ତ୍ରୀ ଥିବାବେଳେ ପ୍ରତାପ ଜେନାଙ୍କୁ ପଞ୍ଚାୟତିରାଜ, ଗୃହ ନିର୍ମାଣ ଓ ନଗର ଉନ୍ନୟନ ବିଭାଗ ମନ୍ତ୍ରୀ ଦାୟିତ୍ୱରେ ଥିଲେ।
ସେହିପରି ରାଜସ୍ବ ମନ୍ତ୍ରୀ ଥିବା ସୁଦାମ ମାରାଣ୍ଡିଙ୍କୁ ମଧ୍ୟ ମନ୍ତ୍ରିମଣ୍ଡଳରୁ ବାଦ୍ ଦିଆଯାଇଥିବା ଚର୍ଚ୍ଚା ହେଉଛି। ଅନ୍ୟମାନଙ୍କ ମଧ୍ୟରେ ବିକ୍ରମ କେଶରୀ ଆରୁଖଙ୍କୁ ମନ୍ତ୍ରିମଣ୍ଡଳ ନେଇ ଟେଲିଫୋନ ଯାଇଥିବା କୁହାଯାଉଥିଲେ ମଧ୍ୟ ତାଙ୍କୁ ବାଚସ୍ପତି କରାଯାଇପାରେ ବୋଲି ସୂଚନା ମିଳୁଛି। ଅନ୍ୟପଟେ ପରିବହନ ମନ୍ତ୍ରୀ ପଦ୍ମନାଭ ବେହେରା, ଗ୍ରାମ୍ୟ ଉନ୍ନୟନ ମନ୍ତ୍ରୀ ସୁଶାନ୍ତ ସିଂ, ପର୍ଯ୍ୟଟନ ମନ୍ତ୍ରୀ ଥିବା ଜ୍ୟୋତି ପ୍ରକାଶ ପାଣିଗ୍ରାହୀ, ଦକ୍ଷତା ବିକାଶ ଓ ବୈଷୟିକ ଶିକ୍ଷା ମନ୍ତ୍ରୀ ଥିବା ପ୍ରେମାନନ୍ଦ ନାଏକ, ଜଳ ସମ୍ପଦ ସହ ସୂଚନା ଓ ଲୋକ ସମ୍ପର୍କ ମନ୍ତ୍ରୀ ଥିବା ରଘୁନନ୍ଦନ ଦାସ, ହସ୍ତତନ୍ତ, ବୟନ ଶିଳ୍ପ ମନ୍ତ୍ରୀ ଥିବା ପଦ୍ମିନୀ ଦିଆନଙ୍କୁ ମଧ୍ୟ ମନ୍ତ୍ରିମଣ୍ଡଳରୁ ବାଦ୍ ଦିଆଯାଇଥିବା କୁହାଯାଉଛି। ତେବେ ପ୍ରକାଶ ପାଇଥିବା ସମ୍ଭାବ୍ୟ ମନ୍ତ୍ରୀ ତାଲିକାରେ ଆଦିବାସୀ କଲ୍ୟାଣ ମନ୍ତ୍ରୀ କାହାକୁ କରାଯିବ ତାକୁ ନେଇ ଚର୍ଚ୍ଚା ଲାଗି ରହିଛି। କାରଣ ସେଥିରେ କୌଣସି ଆଦିବାସୀ ନେତାଙ୍କୁ ସ୍ଥାନ ମିଳିନାହିଁ। ତେବେ ବାଦ୍ ପଡିଥିବା ମନ୍ତ୍ରୀମାନଙ୍କ ମଧ୍ୟରୁ ରଘୁନନ୍ଦନ, ପଦ୍ମିନୀ ଦିଆନ, ପ୍ରେମାନନ୍ଦ ନାଏକ ଆଦି ନେତାମାନଙ୍କ ଦାୟିତ୍ୱ ତୁଲାଇବାର ଦକ୍ଷତା ନେଇ ଅନେକ ପ୍ରଶ୍ନ ଉଠିବା ପରେ ସେମାନଙ୍କୁ ବାଦ୍ ଦିଆଯାଇଥିବା ଦଳର ଜଣେ ବରିଷ୍ଠ ନେତା ତାଙ୍କ ନାମ ଗୋପନ ରଖିବା ସର୍ତ୍ତରେ କହିଛନ୍ତି। ତେବେ ମନ୍ତ୍ରିମଣ୍ଡଳ ତାଲିକାରୁ ବାଦ୍ ପଡିଥିବା କେତେଜଣ ନେତାଙ୍କ କହିବା କଥା ବିଜେଡି ସେମାନଙ୍କୁ ବହୁ ସମୟରେ ଅନେକ ଦାୟିତ୍ୱ ଦେଇଛି। ବର୍ତ୍ତମାନ ଦଳ ଯଦି ଆଉ କାହାକୁ ମନ୍ତ୍ରୀ କରି ସେମାନଙ୍କୁ ସଙ୍ଗଠନ କାମ ଦେଉଛି ତେବେ ସେଥିରେ ଅସୁବିଧା କ’ଣ ବୋଲି ସେମାନେ କହିଛନ୍ତି।
