ଭୁବନେଶ୍ୱର, ୨୨।୧୨(ବ୍ୟୁରୋ): ନୟାଗଡ଼ ଯଦୁପୁରର ପରୀ ହତ୍ୟା ମାମଲାର ମୁଖ୍ୟ ଅଭିଯୁକ୍ତ ସରୋଜ ସେଠୀଙ୍କୁ ରିମାଣ୍ଡରେ ନେଇଛି କ୍ରାଇମବ୍ରାଞ୍ଚ ଏସ୍ଆଇଟି। ଏ ନେଇ ମଙ୍ଗଳବାର ଏସ୍ଆଇଟି ମୁଖ୍ୟ ଅରୁଣ ବୋଥ୍ରା ପ୍ରେସ୍ମିଟ୍ ଜରିଆରେ ସୂଚନା ଦେଇଛନ୍ତି। ସରୋଜ ସେଠୀ ମୁଖ୍ୟ ଅଭିଯୁକ୍ତ ବୋଲି ଅରୁଣ କହିଛନ୍ତି।
ଅରୁଣ କହିଛନ୍ତି ଯେ, ସରୋଜଙ୍କ ସାନ ଭଉଣୀ ପାଖକୁ ପରୀ ଆସୁଥିଲା । ଘଟଣା ଦିନ ସରୋଜ ଭଉଣୀ ପାଖକୁ ଏକୁଟିଆ ପରୀ ଯାଇଥିଲା । ସରୋଜଙ୍କ ଭଉଣୀ ଅଫିସ ଯିବା ପରେ ସେ ପରୀ ସହ ବଳାତ୍କାର ଉଦ୍ୟମ କରିଥିଲେ। ପରୀ କାନ୍ଦିବାରୁ ତଣ୍ଟି ଚିପି ମାରିଦେଇଥିଲେ ସରୋଜ । ପରୀର ମୃତଦେହ ସହ ଯୌନ ସମ୍ପର୍କ ମଧ୍ୟ ସରୋଜ ରଖିଥିଲେ। ପରେ ପରୀର ମୃତଦେହକୁ ଅଖାରେ ଭର୍ତ୍ତିକରି ପୋଖରୀରେ ଫିଙ୍ଗି ଦେଇଥିଲେ । ନଡିଆ ବାହୁଙ୍ଗାରେ ଅଖାକୁ ଲୁଚାଇ ପୋଖରୀରେ ନେଇ ଫିଙ୍ଗିଥିଲେ ।
ଏସ୍ଆଇଟି ମୁଖ୍ୟ ଆହୁରି ମଧ୍ୟ କହିଛନ୍ତି, ସରୋଜ ସବୁବେଳେ ମୋବାଇଲରେ ଚାଇଲ୍ଡ ପର୍ଣ୍ଣ ଫିଲ୍ମ ଦେଖନ୍ତି। ପର୍ଣ୍ଣ ଫିଲ୍ମ ମୋବାଇଲରେ ରଖି ଲକ୍ ପକାଇଥିଲେ। ଏଥିସହ ମୋବାଇଲରୁ ଗୁଗୁଲ ହିଷ୍ଟ୍ରି ଡିଲିଟ କରିଦେଇଛନ୍ତି। ବଳାତ୍କାର ଏବଂ ହତ୍ୟା ପାଇଁ ପୂର୍ବ ପ୍ରସ୍ତୁତି ନ ଥିବା ଜଣାପଡିଛି । ପ୍ରତ୍ୟକ୍ଷଦର୍ଶୀ ନ ଥିବାରୁ ଆମେ ବୈଜ୍ଞାନିକ ପ୍ରମାଣ ଏକାଠି କରୁଛୁ ବୋଲି ଅରୁଣ ବୋଥ୍ରା କହିଛନ୍ତି।
୩ ଦିନ ରିମାଣ୍ଡରେ ଯାହା ନୂଆ ତଥ୍ୟ ଆସିବ ଆମେ ଅବଗତ କରାଇବୁ । ଅଭିଯୁକ୍ତକୁ କେଉଁମାନେ ସାହାଯ୍ୟ କରୁଥିଲେ ତାହାର ତଦନ୍ତ ଜାରି ରହିଛି ବୋଲି ବୋଥ୍ରା କହିଛନ୍ତି।
