କଳା ତାଙ୍କ ପ୍ରାଣ ପ୍ରାଚୁର୍ଯ୍ୟର ପ୍ରତିଫଳନ। ତାହା ପୁଣି ବହୁମୁଖୀ, ବହୁପ୍ରସ୍ଥି । କଳାର ବ୍ୟବହାରକୁ ଦୈନନ୍ଦିନ ଜୀବନ ସ୍ତରକୁ ନେଇ ଆସିବା ତାଙ୍କର ଏକ ବିଶେଷ ସ୍ବପ୍ନ । କଳା ଜୀବନର ଅନ୍ତର୍ଜଗତ ନିଃସୃତ ଅମୃତ । ହଳାହଳମୟ ଜୀବନରେ କଳା ସାଧାରଣ ମଣିଷକୁ ଆଶ୍ୱାସନା ଦିଏ, ଆନନ୍ଦ ମୁଖର କରେ ।
ସୁତରାଂ କଳାକୁ ବ୍ୟବହାରିକ ଏବଂ ସମସାମୟିକ କରି ସାଧାରଣ ଜୀବନର ଏକ ଅଂଶ କରେଇ ପାରୁଥିବା ଏହି ପ୍ରତିଭାମୟୀ ଚିତ୍ରଶିଳ୍ପୀ ହେଉଛନ୍ତି ଡ. ସସ୍ମିତା କମିଳା । କଳାକୁ ଆଭିଜାତ୍ୟର ପସରାରେ ନ ସଜେଇ ସମୟ ଦାବି କରୁଥିବା ଆବଶ୍ୟକ ସାଜସରଞ୍ଜାମରେ କଳାର ଯଥାର୍ଥ ନିଦର୍ଶନ କରନ୍ତି ସସ୍ମିତା । ପର୍ଦ୍ଦା, କୁସନ କଭର, ବେଡଶିଟ୍, ଗାଲିଚା, ଘରର କାନ୍ଥ, ଚଟାଣ, ଖାଇବା ପିଇବା ପାଇଁ ଉଦ୍ଦିଷ୍ଟ ପାତ୍ର, ଫୁଲଦାନି ଆଦିରେ ସଜେଇ ପାରନ୍ତି ସେ ତାଙ୍କ ଅଙ୍କିତ ଜ୍ଞାନର ସୂକ୍ଷ୍ମ କାରିଗରି । ଉଭୟ ଚିତ୍ରକଳା ଓ ବ୍ୟବହାରିକ କଳାରେ ପାରଦର୍ଶିତା ଲାଭ କରିଥିବା ସସ୍ମିତାଙ୍କ ଜନ୍ମ ୧୦ ମେ ୧୯୮୦ ମସିହା ଚୋରମରା ଗ୍ରାମ, ବାଲେଶ୍ୱରରେ ।
ବାପା ଅରୁଣ କୁମାର କମିଳା, ମା’ ସୁଜାତା କମିଳାଙ୍କ ସୁକନ୍ୟା ସସ୍ମିତା ସଂଯୋଗକ୍ରମେ ବିବାହ କରନ୍ତି ଅନ୍ୟତମ ଚିତ୍ରଶିଳ୍ପୀ ସଞ୍ଜୟ କୁମାର ପରିଡାଙ୍କୁ । ପ୍ରାରମ୍ଭିକ ସ୍ତରରେ ମା’ଙ୍କ ଉଲ୍, କ୍ରୁସ୍, ଏମ୍ବ୍ରୋଡରି କାମରେ ମୁଗ୍ଧ ହେଉଥିବା କୁନି ସସ୍ମିତା ଜୀବନସାଥୀ ସାଜିଥିବା ସଞ୍ଜୟଙ୍କ ପ୍ରେରଣାରେ ଆନୁଷ୍ଠାନିକ କଳା ଶିକ୍ଷା ପାଇଁ ନିଜକୁ ପ୍ରସ୍ତୁତ କରିନେଇଥିଲେ । ସେଥିସକାଶେ ବିକେ ଚାରୁ ଓ କାରୁକଳା ମହାବିଦ୍ୟାଳୟରୁ ସ୍ନାତକ ହାସଲ କରି ଉତ୍କଳ ସଂସ୍କୃତି ବିଶ୍ୱବିଦ୍ୟାଳୟରେ ଆନିମେସନ ଓ ଗ୍ରାଫିକ ଡିଜାଇନରେ ସ୍ନାତକୋତ୍ତର ଡିଗ୍ରୀ ହାସଲ କରିଥିଲେ ।
ଅଦ୍ୟାବଧି ଉତ୍କଳ ସଂସ୍କୃତି ବିଶ୍ୱବିଦ୍ୟାଳୟରେ ଅତିଥି ଅଧ୍ୟାପିକା ଭାବରେ କାର୍ଯ୍ୟରତ ସସ୍ମିତା ୨୦୨୧ରେ ସେହି ବିଶ୍ୱବିଦ୍ୟାଳୟରୁ ସମ୍ମାନଜନକ ଡକ୍ଟରେଟ ଡିଗ୍ରୀ ପ୍ରାପ୍ତ ହୋଇଛନ୍ତି । ଚିତ୍ର କଳା ଓ ବ୍ୟବହାରିକ କଳା ଉଭୟରେ ସେ ଦକ୍ଷ। ତାଙ୍କ କଳା ମଣିଷ ଜୀବନର ସମସ୍ୟା ଭିତରେ ଆନନ୍ଦ ଖୋଜେ । ଦୁଃଖକୁ ଅତିକ୍ରମ କରି ଉଲ୍ଲାସର ସନ୍ଧାନ କରିବା ତାଙ୍କର ବିଶେଷତ୍ୱ । କଳାକାର ଭାବେ ରଙ୍ଗ ଓ ରେଖାର ବ୍ୟାକରଣ ଅତିକ୍ରମ କରି ସେ କାଳାତୀତ ସ୍ପନ୍ଦନ ଦିଅନ୍ତି ।
କଳାର ବଜାରୀକରଣ ହୋଇପାରିଲେ କଳାକୁ ଜୀବିକା କରି ଜିଉଥିବା କଳାକାର ଓ ସାଧାରଣ ମଣିଷ ବିଶେଷ ଭାବେ ଉପକୃତ ହେବେ ବୋଲି ଆଶାପୋଷଣ କରନ୍ତି ସସ୍ମିତା। ନିଜର କଳାର ଧାରା ସମ୍ପର୍କରେ ସସ୍ମିତା କୁହନ୍ତି , ରଙ୍ଗ ପ୍ରୟୋଗରେ ମୁଁ ମୋ ନିଜର ରୁଚି ଏବଂ ଅଭିନବତ୍ୱ ଦେଖେଇବାକୁ ଚେଷ୍ଟା କରେ । କିନ୍ତୁ ବିଷୟ ଦିଗରୁ ମୋ କଳାର ବିଷୟ ସ୍ବତନ୍ତ୍ର । ନୂଆ କୌଶଳ ଯଥା ଡିଜିଟାଲ ପଦ୍ଧତିରେ କାମକୁ ରୁଚି ମୁତାବକ ସଜେଇ ତାକୁ ବଜାରକୁ ଛାଡିବା ଏବଂ ବଜାରରେ ତା’ର ଚାହିଦା ବୃଦ୍ଧି କରିବାରେ ସେ ଏବଂ ତାଙ୍କ ଶିକ୍ଷାର୍ଥୀମାନେ ଅବିରତ ଚେଷ୍ଟାରେ ଥାଆନ୍ତି ।
ଅର୍ଦ୍ଧଶତକରୁ ଅଧିକ ଜାତୀୟ ଓ ଅନ୍ତର୍ଜାତୀୟ ସ୍ତରରେ ଚିତ୍ର ପ୍ରଦର୍ଶନୀ, କର୍ମଶାଳା ଓ ଆଲୋଚନାଚକ୍ରରେ ଭାଗ ନେଇଥିବା ସସ୍ମିତା ବିଭିନ୍ନ ସଂସ୍ଥା ଦ୍ୱାରା ନିମନ୍ତ୍ରିତ ହୋଇ କଳାର ବିଚାରକ ଭାବରେ ଦାୟିତ୍ୱ ନିର୍ବାହ କରିଛନ୍ତି । ଲଳିତ କଳା ଏକାଡେମୀ, ବିଭିନ୍ନ କଳା ସଂସ୍ଥା, ପାଠ ପଢିଥିବା ବିକେ ଆର୍ଟ ଆଣ୍ଡ କ୍ରାଫ୍ଟ ମହାବିଦ୍ୟାଳୟ, ପାଠ ପଢ଼ାଉଥିବା ଧଉଳି ଆର୍ଟ କଲେଜ, ଉତ୍କଳ ସଂସ୍କୃତି ବିଶ୍ୱବିଦ୍ୟାଳୟ, ପ୍ରସିଦ୍ଧି ହାସଲ କରିଥିବା ଅନେକ ଅନ୍ ଲାଇନ ସଂସ୍ଥା ଆନୁକୂଲ୍ୟରେ ଆୟୋଜିତ ପ୍ରତିଯୋଗିତା ଓ ପ୍ରଦର୍ଶନୀରେ ସସ୍ମିତା କେବଳ ଅଂଶଗ୍ରହଣ କରିନାହାନ୍ତି ଅଧିକନ୍ତୁ ତାଙ୍କ କଳାକାର୍ଯ୍ୟ ପାଇଁ ପୁରସ୍କୃତ ଓ ସମ୍ବର୍ଦ୍ଧିତ ହୋଇଛନ୍ତି ।
-ମାନମୟୀ ରଥ
ଅଧ୍ୟକ୍ଷା, ସେଣ୍ଟ ଜାଭିଅର କିଡ୍ସ , ବାଲିପୁଟ, ପୁରୀ
ମୋ:୭୯୭୮୫୭୯୩୯୯
