ଡେରାଡୁନ୍,୧୨।୧: ଉତ୍ତରାଖଣ୍ଡ ଚାମୋଲି ଜିଲା ଜୋଷୀମଠରେ ବର୍ତ୍ତମାନ ପରିସ୍ଥିତି ଭଲ ନାହିଁ। ଏଠାରେ ଶହ ଶହ ଘରେ ଫାଟ ହେବା ପରେ ଉଦ୍ଧରା କାର୍ଯ୍ୟ ଜାରି ରହିଛି। ଏଥିସହ ସହରକୁ ଭୂସ୍ଖଳନ ଜୋନ୍ ଘୋଷଣା କରାଯିବା ପରେ ସ୍ଥାନୀୟ ଲୋକଙ୍କୁ ସୁରକ୍ଷିତ ଜାଗାକୁ ସ୍ଥାନାନ୍ତର କରାଯାଇଛି। ବର୍ତ୍ତମାନ ସେନାଙ୍କୁ ଅନ୍ୟ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯିବା ନେଇ ନିଷ୍ପତ୍ତି ନିଆଯାଇଥିବା ଆର୍ମି ଚିଫ୍ ଜେନେରାଲ ମନୋଜ ପଣ୍ଡେ ଗୁରୁବାର କହିଛନ୍ତି। ଚାଇନା ସୀମାରେ ଅବସ୍ଥିତ ଜୋଷୀମଠର ୨୫ରୁ ୨୮ ଆର୍ମି ବିଲ୍ଡିଂରେ ଫାଟ ଦେଖାଯିବା ପରେ ସେମାନଙ୍କୁ ଆଉଲି ସ୍ଥାନାନ୍ତର କରାଯିବ। ଆବଶ୍ୟକସ୍ଥଳେ ଅଧିକ ୟୁନିଟ୍ ମୁତୟନ କରାଯିବା ସହ ଯବାନ ପ୍ରତିକୂଳ ସ୍ଥିତିର ମୁକାବିଲା ପାଇଁ ପ୍ରସ୍ତୁତ ଥିବା ଜେନେରାଲ ପାଣ୍ଡେ କହିଛନ୍ତି। ପ୍ରକୃତ ନିୟନ୍ତ୍ରଣ ରେଖା ସଂଲଗ୍ନ ୩,୪୮୮ କି.ମି. ପରିମିତ ସ୍ଥାନକୁ ଶତ୍ରୁ ରାଷ୍ଟ୍ର କବଳରୁ ରକ୍ଷା କରିବା ଲାଗି ୨୦, ୦୦୦ ଟ୍ରୁପ୍କୁ ନେଇ ସେନା ଛାଉଣି କରାଯାଇଛି। ଅନ୍ୟପଟେ ଜୋଷୀମଠର ୭୦୦ ବିଲ୍ଡିଂ କାନ୍ଥରେ ଫାଟ ଦେଖାଯାଇଥିବା ବେଳେ ବିପଦସଙ୍କୁଳ କୋଠାକୁ ନାଲି ଛକି ଚିହ୍ନ ଦ୍ୱାରା ଚିହ୍ନଟ କରାଯାଇଛି। ଲୋକଙ୍କ ଥଇଥାନ ପାଇଁ ରାଜ୍ୟ ସରକାର ୪୫ କୋଟି ଟଙ୍କାର ରିଲିଫ୍ ପ୍ୟାକେଜ୍ର ଘୋଷଣା କରିଛନ୍ତି। ଏଥିରେ ୩,୦୦୦ ପରିବାର ଲାଭବାନ ହେବେ ବୋଲି ମୁଖ୍ୟମନ୍ତ୍ରୀ ପୁଷ୍କର ସିଂ ଧାମି କହିଛନ୍ତି। ପ୍ରତି ପରିବାରକୁ ଦେଢ଼ ଲକ୍ଷ ଟଙ୍କା ଦେବା ଲାଗି ସରକାର ଘୋଷଣା କରିଥିବା ବେଳେ ଜମି ମାଲିକଙ୍କୁ ପ୍ରଥମ ସୋପାନରେ ୧ ଲକ୍ଷ ଆଡଭାନ୍ସ ଦିଆଯିବ। ରାଜ୍ୟ ବିପର୍ଯ୍ୟୟ ପାଣ୍ଠିରୁ ପ୍ରତି ସ୍ଥାନାନ୍ତର ପରିବାରକୁ ୫୦,୦୦୦ ଟଙ୍କା ସହାୟତା ରାଶି ପ୍ରଦାନ କରାଯିବ ବୋଲି ମୁଖ୍ୟମନ୍ତ୍ରୀ କହିଛନ୍ତି।
