ନୂଆଦିଲ୍ଲୀ, ୨୨।୮(ପି.ଟି.)-ଚଳିତ ବର୍ଷର ଜାତୀୟ କ୍ରୀଡ଼ା ପୁରସ୍କାର ପାଇଁ ମନୋନୀତ କ୍ରୀଡ଼ାବିତ୍ଙ୍କ ନାମକୁ କେନ୍ଦ୍ର କ୍ରୀଡ଼ା ମନ୍ତ୍ରଣାଳୟ ଶୁକ୍ରବାର ଆନୁଷ୍ଠାନିକ ଭାବେ ଅନୁମୋଦନ କରିଛି। ଅବସରପ୍ରାପ୍ତ ବିଚାରପତି ମୁକୁନ୍ଦକମ୍ ଶର୍ମାଙ୍କ ନେତୃତ୍ୱରେ ଗଠିତ ଚୟନ କମିଟି ଗତ ୧୮ ତାରିଖରେ ୨୯ ଜଣଙ୍କ ନାମ ଅର୍ଜୁନ ପୁରସ୍କାର ପାଇଁ ସୁପାରିସ କରିଥିଲେ। ଏହି ତାଲିକା ମଧ୍ୟରେ ରାଜୀବ ଗାନ୍ଧୀ ଖେଳରନତ୍ ପୁରସ୍କାର ପାଇ ସାରିଥିବା ଭାରୋତ୍ତୋଳିକା ମୀରାବାଈ ଚାନୁ ଓ ରେସଲର ସାକ୍ଷୀ ମଲିକଙ୍କ ନାମ ମଧ୍ୟ ସାମିଲ ଥିଲା। ଏହି ଦୁଇଜଣଙ୍କ ସମ୍ପର୍କରେ କ୍ରୀଡ଼ାମନ୍ତ୍ରଣାଳୟ ଚୂଡ଼ାନ୍ତ ନିଷ୍ପତ୍ତି ନେବେ ବୋଲି କୁହାଯାଇଥିଲା। ମାତ୍ର ରିଓ ଅଲିମ୍ପିକ୍ସ ବ୍ରୋଞ୍ଜ ମେଡାଲିଷ୍ଟ ସାକ୍ଷୀ ଏବଂ ୨୦୧୭ ଭାରୋତ୍ତୋଳନ ବିଶ୍ୱଚାମ୍ପିୟନ ମୀରାବାଈ ପୂର୍ବରୁ ଦେଶର ସର୍ବୋଚ୍ଚ କ୍ରୀଡ଼ା ସମ୍ମାନ (ଖେଳରନତ୍) ପାଇ ସାରିଥିବାରୁ ସେମାନଙ୍କ ନାମକୁ କ୍ରୀଡ଼ାମନ୍ତ୍ରୀ କିରେନ ରିଜିଜୁ ଅର୍ଜୁନ ତାଲିକାରୁ ବାଦ୍ ଦେଇଛନ୍ତି। ଫଳରେ ଏଥର ୨୭ ଜଣ ଅର୍ଜୁନ ପୁରସ୍କାର ପାଇବା ସ୍ପଷ୍ଟ ହୋଇଛି। ପ୍ରକାଶ ଯୋଗ୍ୟ ଯେ, ଅର୍ଜୁନ ପୁରସ୍କାର ପାଇଁ ମୀରାବାଈ ଓ ସାକ୍ଷୀଙ୍କ ନାମ ସୁପାରିସକୁ ନେଇ ପ୍ରଶ୍ନ ଉଠିଥିଲା ଏବଂ ସମାଲୋଚନା ପାଇଁ ଖୋରାକ ଯୋଗାଇଥିଲା। ସାକ୍ଷୀ ୨୦୧୬ ଓ ମୀରାବାଈ ୨୦୧୮ରେ ଖେଳରନତ୍ ପୁରସ୍କାର ପାଇଥିଲେ। ଚୟନ କମିଟି ଚଳିତ ବର୍ଷର ଖେଳରନତ୍ ପୁରସ୍କାର ପାଇଁ ସର୍ବାଧିକ ୫ ଖେଳାଳିଙ୍କ ନାମ ମନୋନୀତ କରିଥିଲେ। ତାହାକୁ କ୍ରୀଡ଼ା ମନ୍ତ୍ରଣାଳୟ ସ୍ବୀକୃତି ଦେଇଛି। କୋଭିଡ-୧୯ ମହାମାରୀକୁ ଦୃଷ୍ଟିରେ ରଖି ଅଗଷ୍ଟ ୨୯ରେ ଏଥର କ୍ରୀଡ଼ା ପୁରସ୍କାର ପ୍ରଦାନ ଉତ୍ସବ ରାଷ୍ଟ୍ରପତି ଭବନରେ ନ ହୋଇ ଭର୍ଚୁଆଲି କରାଯିବାକୁ ନିଷ୍ପତ୍ତି ହୋଇଛି।
ପୁରସ୍କାର ବିଜେତା ତାଲିକା
ରାଜୀବ ଗାନ୍ଧୀ ଖେଳରନତ୍: ରୋହିତ ଶର୍ମା(କ୍ରିକେଟ), ଭିନେଶ ଫୋଗତ(ରେସଲିଂ), ମାନିକା ବାତ୍ରା(ଟେବୁଲ ଟେନିସ), ରାଣୀ ରାମପାଲ(ହକି), ମାରିଆପ୍ପାନ ଥାଙ୍ଗାଭେଲୁ (ପାରା ଆଥଲେଟିକ୍ସ-ହାଇଜମ୍ପ)।
ଅର୍ଜୁନ ପୁରସ୍କାର:
ଅତନୁ ଦାସ(ଆର୍ଚେରି), ଦୂତୀ ଚାନ୍ଦ(ଆଥଲେଟିକ୍ସ), ଚିରାଗ ସେଟ୍ଟୀ(ବ୍ୟାଡ୍ମିଣ୍ଟନ), ସାତ୍ତ୍ୱିକ ସାଇରାଜ ରାଙ୍କିରେଡ୍ଡୀ (ବ୍ୟାଡ୍ମିଣ୍ଟନ), ଭିଶେଷ ଭୃଗୁବଂଶୀ(ବାସ୍କେଟବଲ), ସୁବେଦାର ମନୀଶ କୌଶିକ(ବକ୍ସିଂ), ଲଭଲିନା ବୋରଗୋହେନ (ବକ୍ସିଂ), ଈଶାନ୍ତ ଶର୍ମା(କ୍ରିକେଟ), ଦୀପ୍ତି ଶର୍ମା(କ୍ରିକେଟ), ସାଓ୍ବନ୍ତ ଅଜୟ ଅନନ୍ତ(ଇକ୍ୱେଷ୍ଟ୍ରେନ), ସନ୍ଦେଶ ଜିଙ୍ଘାନ(ଫୁଟବଲ), ଅଦିତୀ ଅଶୋକ(ଗଲ୍ଫ), ଆକାଶଦୀପ ସିଂ(ହକି), ଦୀପିକା(ହକି), ଦୀପକ ହୁଦା (କବାଡ଼ି), କାଲେ ସାରିକା ସୁଧାକର (ଖୋ ଖୋ), ଦତ୍ତୁ ବାବନ ଭୋକାନଲ(ରୋଇଂ), ମନୁ ଭାକର(ଶୁଟିଂ), ସୌରଭ ଚୌଧାରୀ(ଶୁଟିଂ), ମଧୁରିକା ସୁହାସ ପାଟକର(ଟେବୁଲ ଟେନିସ), ଡିଭିଜ ସରନ(ଟେନିସ), ଶିବ କେଶବନ(ଓ୍ବିଣ୍ଟର ସ୍ପୋଟର୍ସ), ଦିବ୍ୟା କରଣ(ରେସଲିଂ), ରାହୁଲ ଆଓ୍ବାରେ(ରେସଲିଂ), ସୁୟାଶ ନାରାୟଣ ଯାଦବ(ପାରା ସୁଇମିଂ), ସନ୍ଦୀପ ଚୌଧାରୀ (ପାରା ଆଥଲେଟିକ୍ସ), ମନୀଷ ନରଓ୍ବାଲ(ପାରା ଶୁଟିଂ)
