ଚେନ୍ନାଇ,୧୯।୨ – ଆଗାମୀ ଆଇପିଏଲରେ ଅର୍ଜୁନଙ୍କୁ ପ୍ରମାଣ କରିବାକୁ ପଡ଼ିବ ବୋଲି ମୁମ୍ବାଇ ଇଣ୍ଡିଆନ୍ସ (ଏମ୍ଆଇ) ଫ୍ରାଞ୍ଚାଇଜର କ୍ରିକେଟ ଅପରେଶନ୍ସ ନିର୍ଦ୍ଦେଶକ ତଥା ପୂର୍ବତନ ପେସର ଜାହିର ଖାନ କହିଛନ୍ତି। କିମ୍ବଦନ୍ତୀ କ୍ରିକେଟର ସଚିନ ତେନ୍ଦୁଲକରଙ୍କ ପୁଅ ତଥା ଯୁବ ଅଲରାଉଣ୍ଡର ଅର୍ଜୁନ ତେନ୍ଦୁଲକରଙ୍କୁ ୨୦ ଲକ୍ଷ ଟଙ୍କାର ବେସ୍ ପ୍ରାଇସରେ କିଣିଛି ମୁମ୍ବାଇ ଇଣ୍ଡିଆନ୍ସ।
” ମୁଁ ନେଟ୍ସରେ ଅର୍ଜୁନଙ୍କ ସହ ବହୁ ସମୟ ବିତାଇଛି ଓ ଆଉ ବୋଲିଂର କିଛି ଟିପ୍ସ ମଧ୍ୟ ଦେଇଛି। ସେ କଠିନ ପରିଶ୍ରମ କରୁଥିବା ଯୁବ ଖେଳାଳି। ସେ ସର୍ବଦା କିଛି ନୂଆ ଶିକ୍ଷା କରିବାକୁ ଚାହଁାନ୍ତି, ଯାହାକି ସବୁଠୁ ଉଲ୍ଲେଖନୀୟ କଥା। କିମ୍ବଦନ୍ତୀ ସଚିନଙ୍କ ପୁଅ ହୋଇଥିବାରୁ ତାଙ୍କ ଉପରେ ଚାପ ସର୍ବଦା ରହିବ। କିନ୍ତୁ ଆମ ଦଳର ପରିବେଶ ତାଙ୍କୁ ଭଲ କ୍ରିକେଟର ଭାବେ ଗଢ଼ି ତୋଳିବାରେ ସହାୟକ ହେବ। ଅର୍ଜୁନଙ୍କୁ ନିଜକୁ ସାବ୍ୟସ୍ତ କରିବାକୁ ପଡ଼ିବ “ ବୋଲି ଜାହିର ଏକ ଭର୍ଚୁଆଲ ଖବରଦାତା ସମ୍ମିଳନୀରେ କହିଛନ୍ତି।
ଆଇପିଏଲର ୫ ଥର ଚାମ୍ପିୟନ ଦଳ ମିନି ଅକ୍ଶନରେ ଅର୍ଜୁନଙ୍କ ବ୍ୟତୀତ ନାଥନ କୁଲ୍ଟର ନାଇଲ, ଜିମ୍ମି ନିଶାମ, ଯୁଧବୀର ଚରକ, ମାର୍କୋ ଜନସେନ ଓ ପିୟୂଷ ଚାଓ୍ବାଲଙ୍କୁ କିଣିଛି।
