ବୁଏନ୍ସ ଏୟାର୍ସ, ୨ା୬: ଆର୍ଜେଣ୍ଟିନାରେ ଅନୁଷ୍ଠିତ ୨୦ ବର୍ଷରୁ କମ୍ ଫୁଟବଲ ବିଶ୍ୱକପର କ୍ୱାର୍ଟର ଫାଇନାଲରେ ପ୍ରବେଶ କରିଛନ୍ତି ଇଟାଲୀ, ନାଇଜେରିଆ, ବ୍ରାଜିଲ ଓ କଲମ୍ବିଆ। ଅନ୍ୟପକ୍ଷରେ ଶକ୍ତିଶାଳୀ ଦଳ ଆର୍ଜେଣ୍ଟିନା ଓ ଇଂଲଣ୍ଡ ଏହି ଟୁର୍ନାମେଣ୍ଟରୁ ବିଦାୟ ନେଇଛନ୍ତି। ୧୦ ଜଣିଆ ବ୍ରାଜିଲ ଦଳ ୪-୧ରେ ଟ୍ୟୁନିସିଆକୁ ପରାସ୍ତ କରିଛି। ଆନ୍ଦ୍ରେ ସାଣ୍ଟୋସ ଦଳ ପକ୍ଷରୁ ଡବଲ ଗୋଲ ସ୍କୋର କରିଥିଲେ। ମାର୍କୋସ୍ ଲିଓନାର୍ଡୋ ୧୧ତମ ମିନିଟରେ ବ୍ରାଜିଲ ପକ୍ଷରୁ ପ୍ରଥମ ଗୋଲ ସ୍କୋର କରିଥିଲେ। ୩୧ତମ ମିନିଟରେ ସାଣ୍ଟୋସ ବ୍ୟକ୍ତିଗତ ପ୍ରଥମ ଗୋଲ ସ୍କୋର କରିବା ସହିତ ଦଳକୁ ୨-୦ରେ ଆଗୁଆ କରିଥିଲେ। ମ୍ୟାଚର ୪୫ ତମ ମିନିଟରେ ବିପଜ୍ଜନକ ଖେଳ ପ୍ରଦର୍ଶନ ପାଇଁ ରବର୍ଟ ରେନାନଙ୍କୁ ରେଡ୍କାର୍ଡ ମିଳିଥିଲା। ବ୍ରାଜିଲ ୧୦ ଜଣିଆ ଦଳରେ ଖେଳିଥିଲେ ମଧ୍ୟ ପ୍ରତିପକ୍ଷଙ୍କୁ ଚାପରେ ରଖିଥିଲା। ପରବର୍ତ୍ତୀ ୪୫ ମିନିଟ ଧରି ଗୋଲ ସ୍କୋର ହୋଇ ନ ଥିବା ବେଳେ ଇଞ୍ଜୁରୀ ଟାଇମରେ ବ୍ରାଜିଲ ଦୁଇଟି ଓ ଟ୍ୟୁନିସିଆ ଗୋଟିଏ ଗୋଲ ସ୍କୋର କରିଥିଲା। ୯୦+୧ ମିନିଟରେ ମାଥେଅସ୍ ମାର୍ଟିନ୍ସ ସିଲଭା ଡସ୍ ସାଣ୍ଟୋସ ବ୍ରାଜିଲକୁ ୩-୦ରେ ଆଗୁଆ କରିଥିବା ବେଳେ ୯୦+୧୦ ମିନିଟରେ ସାଣ୍ଟୋସ ବ୍ୟକ୍ତିଗତ ଦ୍ୱିତୀୟ ଗୋଲ ସ୍କୋର କରିଥିଲେ। ଟ୍ୟୁନିସିଆ ପକ୍ଷରୁ ମହମ୍ମଦ ଘରବେଲ ୯୦+୧୩ ମିନିଟରେ ଏକମାତ୍ର ଗୋଲ ପରିଶୋଧ କରିଥିଲେ। ଅନ୍ୟ ଏକ ମ୍ୟାଚରେ ଆୟୋଜକ ଆର୍ଜେଣ୍ଟିନାକୁ ୨-୦ ଗୋଲରେ ପରାସ୍ତ କରିଛି ନାଇଜେରିଆ। ବୁଧବାର ରାତିରେ ସାନ୍ ଜୁଆନରେ ଖେଳା ଯାଇଥିବା ମ୍ୟାଚରେ ୩୦ ହଜାର ଦର୍ଶକ ଉପସ୍ଥିତ ଥିଲେ। ଆୟୋଜକ ଦେଶ ଭାବରେ ଯୋଗ୍ୟତା ଅର୍ଜନ କରିଥିବା ଆର୍ଜେଣ୍ଟିନା ଗ୍ରୁପ୍ ଟପ୍ପର ଭାବରେ ରାଉଣ୍ଡ ଅଫ୍ ୧୬ରେ ପ୍ରବେଶ କରିଥିଲା। ତେବେ ନାଇଜେରିଆ ବିପକ୍ଷ ମ୍ୟାଚରେ ଦଳ ଏକାଧିକ ସୁଯୋଗ ହାତଛଡା କରିଥିଲା। ପ୍ରଥମାର୍ଦ୍ଧର ଧିମା ଆରମ୍ଭ ପରେ ୬୧ ମିନିଟରେ ମିଳିଥିବା ଫ୍ରି କିକ୍କୁ ଗୋଲରେ ପରିଣତ କରିଥିଲେ ଇବ୍ରାହିମ୍ ମହମ୍ମଦ। ଏହାପରେ ଇଞ୍ଜୁରୀ ଟାଇମର ୯୦+୧ ମିନିଟରେ ରିଲଓ୍ବାନୁ ହାଲିରୁ ସାର୍କି ଗୋଲ ଦେଇ ଦଳକୁ ୨-୦ରେ ବିଜୟୀ କରିଥିଲେ।
ଲା ପ୍ଲାଟା ଷ୍ଟାଡିୟମରେ ୟୁରୋ କପ୍ ଚାମ୍ପିୟନ ଇଂଲଣ୍ଡକୁ ୨-୧ରେ ପରାସ୍ତ କରିଛି ଇଟାଲୀ। ମ୍ୟାଚ୍ର ଅଷ୍ଟମ ମିନିଟରେ ଟୋମାସୋ ବାଲ୍ଡାଞ୍ଜି ପ୍ରଥମ ଗୋଲ ଦେଇ ଇଟାଲୀକୁ ୧-୦ରେ ଆଗୁଆ କରିଥିଲେ। ଏହାର ୧୬ ମିନିଟ ମଧ୍ୟରେ ଆଲ୍ଫି ଡିଭାଇନ୍ ସ୍କୋର କରି ମ୍ୟାଚ୍କୁ ବରାବର ସ୍ଥିତିକୁ ଆଣିଥିଲେ। ମ୍ୟାଚ୍ର ଅବଶିଷ୍ଟ ସମୟରେ ଉଭୟ ଦଳ ଗୋଲ ସ୍କୋର କରିବାରେ ବିଫଳ ହୋଇଥିବା ବେଳେ ମ୍ୟାଚ୍ ଡ୍ର ଆଡକୁ ଯାଉଥିଲା। ୮୭ ତମ ମିନିଟରେ ଭିଡିଓ ରେଫରାଲ ବଳରେ ଇଟାଲୀକୁ ମିଳିଥିବା ସ୍ପଟ୍ କିକ୍କୁ ଗୋଲରେ ପରିଣତ କରିଥିଲେ ସିଜାରେ କାସାଡେଇ। ଇଟାଲୀକୁ ବିଜୟୀ କରିଥିବା କାସାଡେଇ ଚଳିତ ଟୁର୍ନାମେଣ୍ଟରେ ନିଜର ୫ମ ଗୋଲ୍ ସ୍କୋର କରିଛନ୍ତି। ଅନ୍ତିମ ରାଉଣ୍ଡ ଅଫ୍ ୧୬ ମ୍ୟାଚରେ ଅସ୍କାର କୋର୍ଟେସ୍ (୪୮, ୯୦+୪) ଓ ଟୋମାସ୍ ଆଞ୍ଜେଲ(୫୨ ଓ ୬୩ ) ମିନିଟରେ ଡବଲ ଗୋଲ ସ୍କୋର କରିଥିବା ବେଳେ କଲମ୍ବିଆ ୫-୧ ଗୋଲରେ ସ୍ଲୋଭାକିଆକୁ ପରାସ୍ତ କରିଛି।
