ଗୁଆଟାମଳା ସିଟି, ୨୭ା୪ (ପି.ଟି.)-ଭାରତୀୟ ତୀରନ୍ଦାଜ ଦମ୍ପତି ଦୀପିକା କୁମାରୀ ଓ ଅତନୁ ଦାସ ବ୍ୟକ୍ତିଗତ ବିଭାଗରେ ଦୁଇଟି ସ୍ବର୍ଣ୍ଣ ପଦକ ଲାଭ କରିଛନ୍ତି। ଫଳରେ ଏଠାରେ ଚାଲିଥିବା ତୀରନ୍ଦାଜୀ ବିଶ୍ୱକପ୍ ଷ୍ଟେଜ୍-୧ରେ ଭାରତ ୩ ସ୍ବର୍ଣ୍ଣ ଓ ଗୋଟିଏ ବ୍ରୋଞ୍ଜ ସହ ମୋଟ ୪ ପଦକ ପାଇଏହାର ଅଭିଯାନ ଶେଷ କରିଛି। କୌଣସି ବିଶ୍ୱକପ୍ରେ ଭାରତର ଏହା ଶ୍ରେଷ୍ଠ ପ୍ରଦର୍ଶନ ବୋଲି ବିବେଚନା କରାଯାଉଛି। ବିଶ୍ୱର ପୂର୍ବତନ ନମ୍ବର ଓ୍ବାନ ଖେଳାଳି ଦୀପିକା ତାଙ୍କ କ୍ୟାରିୟରରେ ତୃତୀୟ ଥର ବ୍ୟକ୍ତିଗତ ବିଶ୍ୱକପ୍ ସ୍ବର୍ଣ୍ଣ ପଦକ ଜିତିପାରିଛନ୍ତି। ତାଙ୍କ ସ୍ବାମୀ ଅତନୁ ପୁରୁଷ ରିକର୍ଭ ଫାଇନାଲରେ ବିଜୟ ଲାଭ କରିବା ସହ ସ୍ବର୍ଣ୍ଣ ଜିତିପାରିଛନ୍ତି। ଏହି ଦୁଇଜଣ ସ୍ବତଃପ୍ରବୃତ ସିଜନର ସବୁଠାରୁ ବଡ଼ ମର୍ଯ୍ୟାଦାପୂର୍ଣ୍ଣ ଟୁର୍ନାମେଣ୍ଟକୁ ଆର୍ଚେରୀ ବିଶ୍ୱକପ୍ ଫାଇନାଲକୁ ଉନ୍ନୀତ ହୋଇଛନ୍ତି। ପୂର୍ବରୁ ଦୀପିକା, ଅଙ୍କିତା ଭକତ ଓ କୋମୋଳିକା ବାରିଙ୍କୁ ନେଇ ଭାରତୀୟ ମହିଳା ରିକର୍ଭ ଟିମ୍ ଫାଇନାଲରେ ମେକ୍ସିକୋକୁ ୫-୪ରେ ପରାସ୍ତ କରି ସ୍ବର୍ଣ୍ଣ ପଦକ ହାସଲ କରିଥିଲା। ସ୍ଥାନୀୟ ସ୍ପୋଟର୍ସ କମ୍ପ୍ଲେକ୍ସ ଲସ୍ ଆର୍କସଠାରେ ମିକ୍ସଡ ଯୋଡ଼ି ଇଭେଣ୍ଟରେ ଅତନୁ ଓ ଭକତ ଯୋଡ଼ି ଟପ୍ ସିଡ୍ ୟୁକ୍ତରାଷ୍ଟ୍ର ଆମେରିକା (ୟୁଏସ୍ଏ)କୁ ୬-୨ରେ ପରାସ୍ତ କରି ଏକ ବ୍ରୋଞ୍ଜ ପଦକ ଲାଭ କରିଥିଲା। ଏଠାରେ ତୃତୀୟ ସିଡ୍ ପ୍ରାପ୍ତ ତଥା ପୂର୍ବତନ ବିଶ୍ୱର ନମ୍ବର ଓ୍ବାନ ଖେଳାଳି ବ୍ୟକ୍ତିଗତ ବିଭାଗ ଫାଇନାଲରେ ୟୁଏସ୍ଏର ମ୍ୟାକେଞ୍ଜି ବ୍ରାଉନ୍ଙ୍କୁ ୬-୫ରେ ପରାସ୍ତ କରିଥିଲେ। ଅନ୍ୟପକ୍ଷରେ ଅତନୁ ଫାଇନାଲରେ ସ୍ପେନର ଡାନିଲ କାଷ୍ଟ୍ରୋଙ୍କୁ ୬-୪ରେ ହରାଇ ଦେଇଥିଲେ।
