ବରଗଡ଼, ୮।୧୨(ପ୍ରେମାନନ୍ଦ ଖମାରୀ): ବରଗଡ଼ ଜିଲାକୁ ରାଜ୍ୟର ଭାତହାଣ୍ଡି କୁହାଯାଏ। ଜିଲାରେ ଅଧିକ ଧାନ ଉପତ୍ାଦନ ଯୋଗୁ ବରଗଡ଼ର ଏଭଳି ପରିଚୟ ରହିଛି। ତେବେ ଉକ୍ତ ଜିଲାରେ ଚାଷ ଏବଂ ଚାଷୀ ସମସ୍ୟା ମଧ୍ୟ ରାଜ୍ୟର ଅନ୍ୟ ଜିଲାଠାରୁ ଅଧିକ। କେତେବେଳେ ସ୍ବଳ୍ପ ବୃଷ୍ଟିପାତ ତ ଆଉ କେବେ ରୋଗପୋକ ଉପଦ୍ରବ ଯୋଗୁ ଜିଲାର ଚାଷୀମାନଙ୍କୁ କ୍ଷତି ସହିବାକୁ ପଡୁଛି। କେବଳ ସେତିକି ନୁହେଁ, ଜିଲାରେ ଫସଲ ଉପତ୍ାଦନ ଭଲ ହୋଇଥିଲେ ବିକ୍ରି ସମସ୍ୟା ଚାଷୀମାନଙ୍କୁ ଅଡୁଆ ସାଜିଛି। ବର୍ତ୍ତମାନ ଜିଲାରେ ଖରିଫ ଧାନ ସଂଗ୍ରହ ପ୍ରକ୍ରିୟାରେ ଅନୁରୂପ ସମସ୍ୟା ଚାଷୀଙ୍କ ପାଇଁ ଚିନ୍ତାର ବିଷୟ ହୋଇଛି। ଜିଲାର ଚାଷୀମାନେ ମାସେ ପୂର୍ବରୁ ଧାନ ଅମଳ କରି ସାରିଛନ୍ତି। କିନ୍ତୁ ଏପର୍ଯ୍ୟନ୍ତ ଅମଳ ଧାନ ବିକ୍ରି କରି ପାରି ନ ଥିବାରୁ ସେମାନେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ପ୍ରାୟ ଏକ ମାସ ବିଳମ୍ବରେ ମଣ୍ଡି ଖୋଲି ଥିଲେ ହେଁ ଜିଲାର ଅଧିକାଂଶ ଚାଷୀଙ୍କୁ ଏପର୍ଯ୍ୟନ୍ତ ଧାନବିକ୍ରି ଟୋକନ ମିଳି ନାହିଁ। ଯେଉଁ ଚାଷୀମାନଙ୍କୁ ଟୋକନ ମିଳିଛି, ସେମାନଙ୍କ ମଧ୍ୟରୁ ଅଧିକାଂଶ ଚାଷୀଙ୍କୁ ଧାନବିକ୍ରି ତାରିଖ ବିଳମ୍ବିତ ରହିଛି। ସେହିପରି ଟୋକନ ଆଧାରରେ ମଣ୍ଡିକୁ ଧାନ ନେଉଥିଲେ ସୁଦ୍ଧା ତାହା ବିକ୍ରି ହେଉ ନାହିଁ ଏବଂ ଯେଉଁ ଚାଷୀଙ୍କ ଧାନ ବିକ୍ରି ହୋଇ ସାରଛି, ସେମାନଙ୍କୁ ଏପର୍ଯ୍ୟନ୍ତ ବିକ୍ରିଧାନର ପ୍ରାପ୍ୟରାଶି ମିଳି ପାରି ନ ଥିବା ଅଭିଯୋଗ ହୋଇଛି। ବରଗଡ଼ ଜିଲାର ବରଗଁା ସମେତ ଅନେକ ଧାନମଣ୍ଡି ଉପରେ ନିର୍ଭରଶୀଳ ଚାଷୀଙ୍କ କ୍ଷେତ୍ରରେ ଅନୁରୂପ ସମସ୍ୟା ଲାଗି ରହିଛି ଏବଂ ଜିଲାରେ ଏହାକୁ ନେଇ ଚାଷୀ ଅସନ୍ତୋଷ ବଢ଼ି ଚାଲିଛି।
ସୋମବାର ବରଗଁା ଅଞ୍ଚଳର ଚାଷୀମାନେ ଜିଲାପାଳ ଆଦିତ୍ୟ ଗୋୟଲଙ୍କୁ ଫେରାଦ ହୋଇ ଅନୁରୂପ ଅଭିଯୋଗ କରିଥିଲେ। ସେମାନଙ୍କ ସମସ୍ୟା ନେଇ ଜିଲାପାଳ ଗୋୟଲଙ୍କୁ ସେମାନେ ଏକ ସ୍ମାରକପତ୍ର ମଧ୍ୟ ପ୍ରଦାନ କରିଥିଲେ। ସ୍ମାରକପତ୍ରରେ ସେମାନେ ଉଲ୍ଲେଖ କରିଛନ୍ତି, ବରଗାଁ ଧାନ କ୍ରୟକେନ୍ଦ୍ର(ମଣ୍ଡି)ରେ ଚାଷୀମାନେ ଏପର୍ଯ୍ୟନ୍ତ ପ୍ରାୟ ୧୦ହଜାର କୁଇଣ୍ଟାଲ ଧାନ ଗଚ୍ଛିତ ରଖିଛନ୍ତି। ଆହୁରି ଅନେକ ଚାଷୀ ସ୍ଥାନାଭାବରୁ ମଣ୍ଡିକୁ ଧାନ ଆଣି ପାରୁ ନାହାନ୍ତି। ଚାଷୀଙ୍କ କ୍ଷେତ, ଖଳାରେ ତାହା ପଡ଼ି ରହିଛି। ତେବେ ଏହି ଧାନକ୍ରୟ କେନ୍ଦ୍ରରେ ଧାନବିକ୍ରି ପାଇଁ ୪୮୪ଜଣ ଚାଷୀ ପଞ୍ଜୀକୃତ ହୋଇଛନ୍ତି। ମାତ୍ର ଏପର୍ଯ୍ୟନ୍ତ ୭୨ଜଣଙ୍କ ପାଖକୁ କେବଳ ୨୫୦୦କୁଇଣ୍ଟାଲ ଧାନ ବିକ୍ରି ପାଇଁ ଟୋକନ ଆସିଛି। ହେଲେ ଧାନବିକ୍ରି ସମସ୍ୟା ଏହି ମଣ୍ଡିରେ ଲାଗି ରହିଛି। ଉକ୍ତ ମଣ୍ଡିରେ ଧାନବିକ୍ରି ଲକ୍ଷ୍ୟ ୪୦ହଜାର କୁଇଣ୍ଟାଲ ରହିଛି। କିନ୍ତୁ ଏତେଦିନ ଧରି ଏଠାରେ ଧାନ କିଣାବିକାରେ ଅଚଳାବସ୍ଥା ଲାଗି ରହିଥିବାରୁ ତୁରନ୍ତ ଧାନ ସଂଗ୍ରହ ପ୍ରକ୍ରିୟାକୁ ତ୍ୱରାନ୍ବିତ କରିବା ପାଇଁ ଚାଷୀମାନେ ଦାବି କରିଛନ୍ତି। ସ୍ମାରକପତ୍ରରେ ବରଗାଁ ସରପଞ୍ଚ ଋଷଭ ସେଟ୍ଙ୍କ ସମେତ ଧୀରେନ୍ଦ୍ର ଖମାରୀ, ଠିକାଦାର ଭୋଇ ପ୍ରମୁଖଙ୍କ ସ୍ବାକ୍ଷର ରହିଛି।
ସେହିପରି କଟାପାଲି ଧାନ ସଂଗ୍ରହ ପ୍ରକ୍ରିୟାରେ ଅଚଳାବସ୍ଥାକୁ ନେଇ ଧାନକ୍ରୟ କେନ୍ଦ୍ରରେ ସୋମବାର ଚାଷୀଙ୍କ ଏକ ବୈଠକ ବସିଥିଲା। ଗତମାସ ୨୮ତାରିଖରୁ ଧାନ ସଂଗ୍ରହ ପ୍ରକ୍ରିୟା ଆରମ୍ଭ ହୋଇଥିଲେ ସୁଦ୍ଧା ଏପର୍ଯ୍ୟନ୍ତ ଉକ୍ତ ଧାନ କ୍ରୟକେନ୍ଦ୍ରରୁ ଗୋଟିଏ ବସ୍ତା ଧାନବିକ୍ରି ନ ହେବାକୁ ନେଇ ଚାଷୀମାନେ ଉଦ୍ବେଗ ପ୍ରକାଶ କରିଥିଲେ। ବୈଠକକୁ ଜିଲା ଯୋଗାଣ କାର୍ଯ୍ୟାଳୟର କର୍ମଚାରୀ କବିରାଜ ଧରୁଆ ପହଞ୍ଚି ଚାଷୀଙ୍କ ସହିତ ଆଲୋଚନା କରିଥିଲେ। ତେବେ ମଙ୍ଗଳବାର ସୁଦ୍ଧା ଉକ୍ତ ମଣ୍ଡିରେ ଧାନ କିଣାବିକା ସ୍ବାଭାବିକ ନ ହେଲେ ଚାଷୀମାନେ କୌଣସି ମୁହୂର୍ତ୍ତରେ ଆନ୍ଦୋଳନକୁ ଓହ୍ଲାଇବାକୁ ଚେତାବନୀ ଦେଇଥିଲେ। ଏହାପରେ ମଙ୍ଗଳବାରରୁ ଉକ୍ତ ମଣ୍ଡିରୁ ଧାନକିଣା ଆରମ୍ଭ ହେବ ବୋଲି ଧରୁଆ କହିଥିଲେ। ମାତ୍ର ଏହି ପ୍ରତିଶ୍ରୁତିର ଖିଲାପ ହେଲେ ଆଗକୁ ଆନ୍ଦୋଳନ ତୀବ୍ର ହେବ ବୋଲି ଚାଷୀମାନେ ରୋକଠୋକ୍ ଶୁଣାଇ ଦେଇଥିଲେ। ବୈଠକରେ ଚାଷୀ ବୃନ୍ଦାବନ ଭୋଇ, କିଶୋର ପ୍ରଧାନ, ଭଲ ସାହୁ, ମହେନ୍ଦ୍ର ପ୍ରଧାନ, ସୁଦୀପ୍ତ ଦାସ, ଦଶରଥ ସେଠ, ବୀରବର ମଲ୍ଲିକ, ସଫେଦ ଭୋଇ, ସୁଦାମ ସାହୁ ପ୍ରମୁଖ ଉପସ୍ଥିତ ଥିଲେ।
