ବଲାଙ୍ଗୀର ଅଫିସ, ୨୦ା୪: ବଲାଙ୍ଗୀର ଜିଲା ଗସ୍ତର ଦ୍ୱିତୀୟ ଦିନରେ ଉନ୍ନୟନ କମିଶନର ତଥା ଅତିରିକ୍ତ ମୁଖ୍ୟ ଶାସନ ସଚିବ ଅନୁ ଗର୍ଗ ବୁଧବାର ସକାଳେ ବଲାଙ୍ଗୀର ବ୍ଲକ ଅନ୍ତର୍ଗତ ପଥରଚେପା ସ୍ଥିତ ପାର୍ବତୀ ଗିରି ବାଳ ନିକେତନ ଶିଶୁ ଯନତ୍ ଅନୁଷ୍ଠାନ ପରିଦର୍ଶନରେ ଯାଇଥିଲେ। ଉନ୍ନୟନ କମିଶନର ଗର୍ଗ ଅନ୍ତେବାସୀ ମାନଙ୍କ ସହ ସେମାନଙ୍କ ରହିବା, ଖାଇବା, ଯନତ୍, ପାଠପଢା ତଥା ସ୍ବାସ୍ଥ୍ୟ ସମ୍ପର୍କରେ ପଚାରି ବୁଝିଥିଲେ। ସେମାନକୁ ଭଲ ମଣିଷ ହେବାକୁ କହି ଉତ୍ସାହିତ କରିଥିଲେ। ଅନ୍ତେବାସୀମାନେ ରହୁଥିବା ବାଳକ ଓ ବାଳିକା ହଷ୍ଟେଲ ଓ ରୋଷେଇ ଶାଳା ପରିଦର୍ଶନ କରିବା ସହ ସେଠାରେ ଥିବା ସିଲେଇ ତାଲିମ କେନ୍ଦ୍ର ଓ ଯନତ୍ ପରବର୍ତ୍ତୀ କେନ୍ଦ୍ର ପରିଦର୍ଶନ କରି ଅନୁଷ୍ଠାନ ପରିଚାଳକଙ୍କ ସହ ଆଲୋଚନା କରିଥିଲେ। ପାର୍ବତୀ ଗିରି ବାଳ ନିକେତନରେ ରହୁଥିବା ଦିବ୍ୟାଙ୍ଗ ଅନ୍ତେବାସୀ ପାୟଲ ନାଗ ଏହି ଅବସରରେ ଉନ୍ନୟନ କମିଶନର ଅନୁଙ୍କ ଏକ ପେଣ୍ଟିଂକୁ ଉପହାର ଦେଇଥିଲେ। ନିଜର ପେଣ୍ଟିଂ ଦେଖି ଅନୁ ବିମୋହିତ ହୋଇଯାଇଥିଲେ। ପାୟଲ ନାଗଙ୍କ ହାତ କି ଗୋଡ ନାହିଁ। ଦାଦନ ଖଟିଯିବାବେଳେ ଛତିଶଗଡ ରାୟପୁରଠାରେ ଏକ ଭୟଙ୍କର ବିଦ୍ୟୁତ୍ ଦୁର୍ଘଟଣାରେ ସେ ତାଙ୍କର ଦୁଇ ହାତ ଏବଂ ଦୁଇ ଗୋଡ ହରାଇଥିଲେ। ହେଲେ ଏଭଳି ଏକ ଭୟଙ୍କର ଦୁର୍ଘଟଣା ପରେ ବି ସେ ହରାଇ ନାହାନ୍ତି ଜୀବନ ଜୀଇଁବାର ରାହା। ନିଜ ମୁଁହରେ ରଙ୍ଗତୂଳୀରେ ସେ ଅଙ୍କନ କରିଥିଲେ ଉନ୍ନୟନ କମିଶନର ଅନୁ ଗର୍ଗଙ୍କ ଏକ ଚିତ୍ର। ନିଜର ଚିତ୍ର ଏବଂ ପାୟଲଙ୍କ ଗୁଲିଗୁଲିଆ ମୁହଁ ଦେଖି ତରଳି ଯାଇଥିଲା ଉନ୍ନୟନ କମିଶନର ଅନୁଙ୍କ ନାରୀ ହୃଦୟ। କୁଣ୍ଡାଇ ପକାଇଥିଲେ ପାୟଲଙ୍କୁ। ଅଜାଡି ଦେଇଥିଲେ ସ୍ନେହ। ବେଶ କିଛି ସମୟ ଏକ ଭାବମୟ ପରିବେଶ ସୃଷ୍ଟି ହୋଇଥିଲା। ଉନ୍ନୟନ କମିଶନର ଗର୍ଗଙ୍କ ସହ ସମବାୟ ବିଭାଗର ପ୍ରମୁଖ ଶାସନ ସଚିବ ସଞ୍ଜୀବ ଚଡ୍ଡା ଏବଂ ଜିଲାପାଳ ଚଞ୍ଚଳ ରାଣା ମଧ୍ୟ ସେଠାରେ ଉପସ୍ଥିତ ଥିଲେ। ବଲାଙ୍ଗୀର ଜିଲା ମୁରିବାହାଲ ବ୍ଳକ୍ ଯମୁନାବାହାଲ ଗ୍ରାମର ପାୟଲ ନାଗ ୨୦୧୫ ମସିହାରେ ତାଙ୍କ ପିତାମାତାଙ୍କ ସହ ଦାଦନ ଖଟିବାକୁ ଯାଇଥିବାବେଳେ ଏକ ବିଦ୍ୟୁତ୍୍ ତାର ସଂସ୍ପର୍ଶରେ ଆସିଯାଇଥିଲେ। ଏବେ ପାୟଲ ନବମ ଶ୍ରେଣୀ ପରୀକ୍ଷା ଦେଇସାରିଛନ୍ତି। ଚଳିତବର୍ଷ ସେ ଦଶମ ଶ୍ରେଣୀରେ ପାଠ ପଢିବେ। ପ୍ରାୟ ୧ ବର୍ଷରୁ ଉର୍ଦ୍ଧ୍ୱ ହେବ ପାୟଲ ପଥରଚେପା ପାର୍ବତୀଗିରି ବାଳ ନିକେତନରେ ରହୁଛନ୍ତି।
