କଣିହାଁ ୪।୧୦(ଡି.ଏନ.ଏ.): ଝାଡ଼ଖଣ୍ଡ ହଜାରିବାଗଠାରେ ତୀର୍ଥଯାତ୍ରୀ ବସ୍ ଦୁର୍ଘଟଣାରେ ମୃତକଙ୍କ ସଂଖ୍ୟା ବୃଦ୍ଧି ପାଇଛି। ରବିବାର ଦୁର୍ଘଟଣାପରେ ୪ ଜଣଙ୍କର ମୃତ୍ୟୁ ହୋଇଥିବା ବେଳେ ସୋମବାର ଚିକିତ୍ସାଧୀନ ଅବସ୍ଥାରେ ଆଉ ଜଣଙ୍କର ପ୍ରାଣ ଯାଇଛି। ଫଳରେ ମୋଟ୍ ମୃତକଙ୍କ ସଂଖ୍ୟା ୫ରେ ପହଞ୍ଚିଛି। ସେମାନଙ୍କ ମଧ୍ୟରୁ ମୟୂରଭଞ୍ଜ ଜିଲାର ୨ ଜଣ ଥିବାବେଳେ ଅନୁଗୋଳ ଜିଲା କଣିହାଁ ଅଞ୍ଚଳର ୩ ଜଣ ରହିଛନ୍ତି। ମସୁଣିହତା ଗ୍ରାମର ମେନକା ପ୍ରଧାନ ଓ କଂସମୁଣ୍ଡା ଗ୍ରାମର ମନୁ ବେହେରାଙ୍କ ଦୁର୍ଘଟଣା ଦିନ ମୃତ୍ୟୁ ହୋଇଥିଲା। କଂସମୁଣ୍ଡାର ଗୁରୁତର ବିନୋଦ ସାହୁ ତାଳଚେର ଶତାବ୍ଦୀ ନେହେରୁ ହସ୍ପିଟାଲରେ ଚିକିତ୍ସାଧୀନ ଥିବାବେଳେ ସୋମବାର ତାଙ୍କର ମୃତ୍ୟୁ ହୋଇଛି। ଅପରପକ୍ଷରେ ମେନକା ଓ ମନୁଙ୍କ ମୃତଦେହ ଝାଡ଼ଖଣ୍ଡରୁ ଆସି କଣିହାଁରେ ପହଞ୍ଚିବା ପରେ ଜନପ୍ରତିନିଧି, ପ୍ରଶାସନ ଓ ଅଞ୍ଚଳବାସୀ ଉପସ୍ଥିତ ରହି ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି।
ପ୍ରକାଶ ଯେ, ଦୁର୍ଘଟଣା ଖବର ମିଳିବା ପରେ ଅନୁଗୋଳ ଜିଲା ପ୍ରଶାସନ ପକ୍ଷରୁ ଏକ ଟିମ୍ ଝାଡ଼ଖଣ୍ଡ ଗସ୍ତ କରିଥିଲେ। ସୋମବାର ବାରିପଦାଠାରେ ଝାଡ଼ଖଣ୍ଡ ପ୍ରଶାସନ ୨ ମୃତଦେହ ଅନୁଗୋଳ ଜିଲାର ଉକ୍ତ ଟିମ୍କୁ ହସ୍ତାନ୍ତର କରିଥିଲେ। ଉକ୍ତ ଟିମ୍ର ସଦସ୍ୟ ଥିବା କଣିହାଁ ତହସିଲଦାର ପତିତପାବନ ଦେବତା ଏକ ସ୍ବତନ୍ତ୍ର ବସ୍ରେ ଅନ୍ୟ ତୀର୍ଥଯାତ୍ରୀ ଓ ଆମ୍ବୁଲାସରେ ୨ ମୃତଦେହ ଆଣି କଣିହାଁରେ ପହଞ୍ଚିଥିଲେ। ୨ ମୃତଦେହ କଂସମୁଣ୍ଡା ଓ ମସୁଣିହତା ଗ୍ରାମରେ ପହଞ୍ଚିବା ପରେ ଢେଙ୍କାନାଳ ଏମ୍ପି ମହେଶ ସାହୁ, ତାଳଚେର ବିଧାୟକ ବ୍ରଜକିଶୋର ପ୍ରଧାନ, ଭାଜପା ନେତା କାଳନ୍ଦୀ ସାମଲ, ଜିଲାପରିଷଦ ଉପସଭାପତି ରଶ୍ମିତା ସେଠୀ, ଜିଲାପରିଷଦ ସଦସ୍ୟ ରଞ୍ଜନ ସାହୁ, କଣିହାଁ ବ୍ଲକ ଅଧ୍ୟକ୍ଷ ରାମକୃଷ୍ଣ ପ୍ରଧାନଙ୍କ ସମେତ ବହୁ ଜନସାଧାରଣ ପହଞ୍ଚି ଶ୍ରଦ୍ଧାଞ୍ଜଳି ଅର୍ପଣ କରିଥିଲେ।
ସୂଚନାଯୋଗ୍ୟ ଉକ୍ତ ତୀର୍ଥଯାତ୍ରୀ ବସ୍ରେ କଣିହାଁ ବ୍ଲକ ଅଞ୍ଚଳର ୧୨ଜଣ ଯାଇଥିଲେ। ସେଥିରୁ ମନୁ ବେହେରା, ବିନୋଦ ସାହୁ ଓ ମେନକା ପ୍ରଧାନଙ୍କ ମୃତ୍ୟୁ ହୋଇଥିବାବେଳେ ଅନ୍ୟ ୯ ଜଣ ହେଉଛନ୍ତି ବାସନ୍ତୀ ବେହେରା, ଲତା ସାହୁ, ରତ୍ନାକର ସାହୁ, ସଞ୍ଜୁ ପ୍ରଧାନ, ପ୍ରମିଳା ସାହୁ, ସୋମ୍ୟ ସାହୁ, ମସୁଣିହତା ଗ୍ରାମର ନକୁଳ ପ୍ରଧାନ, ବଡହାର ଗ୍ରାମର ନରୋତ୍ତମ ପ୍ରଧାନ ଏବଂ ଟୋଲବେଡା ଗ୍ରାମର ଅନ୍ତର୍ଯ୍ୟାମୀ ସାହୁ।
