କେନ୍ଦୁଝର,୨୮ା୧୧(ସ୍ବ.ପ୍ର.): ଦିବ୍ୟାଙ୍ଗ ହେଲେ ବି ସେ ହାର ମାନି ନାହାନ୍ତି। ନିଜେ ଅଟୋ ଚଳାଇ ସ୍ବାବଲମ୍ବୀ ହେବା ସହ ବୃଦ୍ଧ ମା’ ବାପାଙ୍କ ମୁହଁରେ ଆହାର ଦେଉଛନ୍ତି। ତାଙ୍କ ସଂଘର୍ଷମୟ ଜୀବନ ଅନ୍ୟମାନଙ୍କ ପାଇଁ ପ୍ରେରଣାର ଉତ୍ସ ପାଲଟିଛି। ନାରୀଟିଏ ହୋଇ ବି ଦୃଢ଼ ଇଛା ଶକ୍ତି ବଳରେ ସମାଜରେ ଦୃଷ୍ଟାନ୍ତ ସାଜିଛନ୍ତି କେନ୍ଦୁଝର ଜିଲା ବାଂଶପାଳ ବ୍ଲକ ଗୋନାସିକା ପଞ୍ଚାୟତ ଅନ୍ତର୍ଗତ ବଣପାହାଡ଼ ଘେରା ଜନ୍ତାରୀ ଗ୍ରାମର ନିଦ୍ରାବତୀ ନାଏକ। ଋଣ ଅର୍ଥରେ ଅଟୋ କିଣି ପରିବାର ଚଳାଉଥିବା ବେଳେ ସରକାରୀ ସହାୟତାକୁ ସେ ଅପେକ୍ଷା କରି ରହିଛନ୍ତି।
ବାପା ରାମଚନ୍ଦ୍ର ଓ ମା’ ଜାଇ ବହୁ କଷ୍ଟରେ ମୂଲ ମଜୁରୀ ଲାଗି ପରିବାର ଚଳାଇ ଆସୁଥିଲେ। ଆର୍ଥିକ ଅନଟନ ଯୋଗୁ ଜୁଙ୍ଗା ହାଇସ୍କୁଲରେ ନବମ ଶ୍ରେଣୀରେ ପଢ଼ିବା ସମୟରେ ନିଦ୍ରାବତୀ ପାଠ ଛାଡ଼ି ବିଲରେ କାମ କରିବା ସହ ମୂଲ ମଜୁରୀ ଲାଗି ମା’ବାପାଙ୍କୁ ରୋଜଗାରରେ ସହାୟତା କରୁଥିଲେ। ତାଙ୍କୁ ଯେତେବେଳେ ୧୮ ବର୍ଷ ହୋଇଥିଲା ସେତେବେଳେ ହଠାତ ଜ୍ୱରରେ ପଡ଼ିଲେ। ଉପଯୁକ୍ତ ଚିକିତ୍ସା ଅଭାବରୁ ଅଣ୍ଟା ତଳକୁ ଦୁର୍ବଳ ହୋଇଯିବାରୁ ଭଲ ଭାବେ ଚଳପ୍ରଚଳ କରିପାରିଲେ ନାହିଁ। ଫଳରେ ଆଉ ମୂଲ ମଜୁରୀ ଲାଗି ନ ପାରି ମା’ବାପାଙ୍କ ଉପରେ ବୋଝ ପାଲଟିଥିଲେ। ତେବେ ଇଛା ଥିଲେ ଉପାୟ ଆପେ ଆପେ ଆସେ ଭଳି ରୋଜଗାର କରି ମା’ବାପାଙ୍କ ମୁହଁରେ ହସ ଫୁଟାଇବା ପାଇଁ ସେ ଉଦ୍ୟମ ଆରମ୍ଭ କରିଥିଲେ। ବର୍ଷେ ତଳେ ଧାର କରଜ କରି ୭୨ ହଜାର ଟଙ୍କା ଜମା ଦେଇ ଏକ ଅଟୋ ଫାଇନାନ୍ସରେ ଆଣି ନିଜେ ଚଲାଇବା ଶିଖିଥିଲେ। ସେହି ଅଟୋ ଆଜି ତାଙ୍କ ଜୀବନରେ ପରିବର୍ତ୍ତନ ଆଣି ଦେଇଛି। ଦିନ ରାତି ପରିଶ୍ରମ କରି ଅଟୋରେ ଯାତ୍ରୀଙ୍କୁ ନେବା ଆଣିବା କରି ରୋଜଗାର କରୁଛନ୍ତି। ତେବେ ମାସକୁ ୮ ହଜାର ଟଙ୍କା କିସ୍ତି ଦେବା ବୋଝ ତାଙ୍କୁ ବେଶୀ ଚିନ୍ତିତ କରୁଛି। ଏଣୁ ସରକାରୀ ସହାୟତା କିଛି ମିଳିଲେ ସେ ଋଣ ବୋଝରୁ ମୁକ୍ତି ପାଇ ପାରନ୍ତେ ବୋଲି କହିଛନ୍ତି।
ତାଙ୍କର ଭାଇ ଅଛନ୍ତି କିନ୍ତୁ ବିବାହ ପରେ ଘରୁ ଅଲଗା ହୋଇଯିବାରୁ ବୃଦ୍ଧ ମା’ ବାପାଙ୍କ ଦାୟିତ୍ୱ ନିଦ୍ରାବତୀ ବୁଝୁଛନ୍ତି। ଆହୁରି ୩ ବର୍ଷ ଋଣ କିପରି ଶୁଝିବେ ସେ ନେଇ ଚିନ୍ତାରେ ରହୁଛନ୍ତି ା ଏଣୁ ତାଙ୍କୁ ସରକାରୀ ସହାୟତା ମିଳିବା ଜରୁରୀ ବୋଲି ଉକ୍ତ ଅଞ୍ଚଳର ତଳ ବୈତରଣୀ ଗ୍ରାମର ପଦ୍ମଶ୍ରୀ ଦୈତାରୀ ନାୟକ କହିଛନ୍ତି।
ନିଦ୍ରାବତୀ ଅଟୋ ନେଇ ଦୂରଦୂରାନ୍ତ ଯୋଡ଼ା, ବଡ଼ବିଲ, ତେଲକୋଇ, ପାଲଲହଡ଼ା ଆଦି ଅଞ୍ଚଳ ପର୍ଯ୍ୟନ୍ତ ଯାତ୍ରୀ ନେଇ ଯାଇଥିବା କୁହନ୍ତି ା ମନରେ ଭୟ ଥିଲେ ବି ଘରେ ବସିଲେ କ’ଣ ହେବ ବୋଲି ସେ କୁହନ୍ତି। ଆଗରୁ ରାତିରେ ଯାତ୍ରୀ ନେଇ ଫେରିବା ସମୟରେ ରାସ୍ତାରେ ଅଟୋ ଖରାପ ହେଲେ ବହୁ ଅସୁବିଧାର ସମ୍ମୁଖୀନ ହୋଇଛନ୍ତି। ତେବେ ଅନେକ ସମୟରେ ଗ୍ରାମବାସୀ ତଥା ଯାତ୍ରୀମାନେ ମଧ୍ୟ ସହାୟତା କରିଥିବା ସେ କହିଛନ୍ତି। ଏସମ୍ପର୍କରେ ଜିଲାପାଳ ଆଶୀଷ ଠାକରେ କହିଛନ୍ତି ଯେ ତାଙ୍କୁ ସମସ୍ତ ପ୍ରକାରର ସହାୟତା ଯୋଗାଇ ଦିଆଯିବ ା ସେହିପରି ବାଂଶପାଳ ବ୍ଲକ ବିଡିଓ କହିଛନ୍ତି, ତାଙ୍କୁ ସରକାରଙ୍କ ଯୋଜନା ଅନୁଯାୟୀ ସମସ୍ତ ସହାୟତା ଦିଆଯିବ ା
