ବାରଙ୍ଗ,୨୯ା୧୦(ଡି.ଏନ୍.ଏ.): ପ୍ରାଣୀ ଉଦ୍ୟାନ ନନ୍ଦନକାନନର ଅନ୍ୟତମ ଆକର୍ଷକ ସାଜିଥିବା ମାଈ ହାତୀ ପ୍ରେମା ଶୁକ୍ରବାର ଚିକିତ୍ସାଧୀନ ଅବସ୍ଥାରେ ଆଖି ବୁଜିଛି। ନନ୍ଦନକାନନ କର୍ତ୍ତୃପକ୍ଷ ଓ ଡାକ୍ତରମାନଙ୍କ ଦ୍ୱାରା ଚାଲିଥିବା ଚିକିତ୍ସା କ୍ଷେତ୍ରରେ ସବୁପ୍ରକାର ଉଦ୍ୟମ କରାଯାଇଥିଲେ ମଧ୍ୟ ପ୍ରେମାକୁ ବଞ୍ଚାଇବାରେ ସକ୍ଷମ ହୋଇପାରି ନାହାନ୍ତି। ଗତ ୨ଦିନ ହେବ ପ୍ରେମା ସମ୍ପୂର୍ଣ୍ଣ ଭାବେ ଅସୁସ୍ଥ ହୋଇ ତଳେ ପଡିଯାଇଥିବା ବେଳେ ଆଉ ଉଠିପାରି ନ ଥିଲା। ଶେଷରେ ଅପରାହ୍ନ ୩ଟାରେ ତା’ର ମୃତ୍ୟୁ ହୋଇଛି।
ପ୍ରକାଶ ଯେ, ୬୬ ବର୍ଷ ହୋଇଥିବା ହାତୀ ପ୍ରେମା ଗତ ଜୁଲାଇ ମାସରୁ କୌଣସି କାରଣରୁ ଅସୁସ୍ଥ ହୋଇପଡ଼ିଥିଲା। ପରେ ତା’ର ଆଗ ବାମ ଗୋଡରେ ଏକ ମାଂସପିଣ୍ଡୁଳା ଥିବା ଜଣାପଡ଼ିଥିଲା। ମାଂସପିଣ୍ଡୁଳାକୁ ଅସ୍ତ୍ରୋପଚାର କରିବା ପରେ ମଧ୍ୟ ସ୍ବାସ୍ଥ୍ୟରେ ଉନ୍ନତି ଘଟି ନ ଥିଲା। ଏପରିକି ଧୀରେ ଧୀରେ ସ୍ବାସ୍ଥ୍ୟାବସ୍ଥା ବିଗିଡ଼ିବା ସହ ଖାଇବା ମଧ୍ୟ କମାଇବାରେ ଲାଗିଥିଲା। ଅସୁସ୍ଥ ଥିବା ସତ୍ତ୍ୱେ ପ୍ରେମା ହାତୀସଫାରିର ହାତୀଶାଳରେ ଗୋଡ଼ରେ ଶିକୁଳିବନ୍ଧା ହୋଇ ଛିଡ଼ା ହୋଇରହୁଥିଲା। କିନ୍ତୁ ଗୁରୁବାର ସକାଳେ ହାତୀଶାଳରେ ହଠାତ୍ ସେ ପଡ଼ିଯାଇଥିଲା। କର୍ମଚାରୀମାନେ ପ୍ରେମାକୁ ଉଠାଇବାକୁ ସବୁପ୍ରକାର ଚେଷ୍ଟା କରି ଉଠାଇପାରି ନ ଥିଲେ। କ୍ରେନ୍ ଦ୍ୱାରା ଉଠାଇବାକୁ ଉଦ୍ୟମ କରାଯାଇ ବିଫଳ ହେବକୁ ପଡିଥିଲା। କ୍ରେନ ସାହାଯ୍ୟରେ ଉଠାଇବାବେଳେ ପ୍ରେମା ମଳତ୍ୟାଗ କରିଥିବା ଜଣାପଡ଼ିଥିଲା। ପ୍ରେମା ଉଠି ନ ପାରିବାରୁ ବାଧ୍ୟ ହୋଇ ନନ୍ଦନକାନନର ଡାକ୍ତରଙ୍କୁ ଜଣାଇ ଦିଆଯିବା ସହ ହାତୀଶାଳର ଚତୁଃପାର୍ଶ୍ୱ ଜରିପାଲରେ ଆବଦ୍ଧ କରାଯାଇ ଚିକିତ୍ସା ଆରମ୍ଭ ହୋଇଥିଲା। ଏଥିପାଇଁ ପର୍ଯ୍ୟଟକଙ୍କ ଲାଗି ହାତୀ ସଫାରି ମଧ୍ୟ ବନ୍ଦ କରାଯାଇଥିଲା। ଗୁରୁବାର ୪୦ ଓ ଶୁକ୍ରବାର ୧୦ ଲିଟର ସାଲାଇନ ସହ ଭିଟାମିନ ଏବଂ ଆଣ୍ଟିବାୟୋଟିକ ଦିଆଯାଇ ପ୍ରେମାକୁ ଛିଡ଼ା କରାଇବା ପାଇଁ ସବୁପ୍ରକାର ଚେଷ୍ଟା କରାଯାଇଥିଲା। କିନ୍ତୁ ସବୁ ଉଦ୍ୟମ ବିଫଳ ହୋଇଥିଲା। ଶେଷରେ ଶୁକ୍ରବାର ଅପରାହ୍ନ ୩ଟାରେ ହାତୀଶାଳରେ ଚିକିତ୍ସାଧୀନ ଅବସ୍ଥାରେ ପ୍ରେମାର ଜୀବନ ଚାଲିଯାଇଥିଲା। ପ୍ରେମାର ମୃତ୍ୟୁ ପରେ ନନ୍ଦନକାନନରେ ହାତୀ ସଂଖ୍ୟା ହ୍ରାସ ପାଇ ୩ରେ ପହଞ୍ଚତ୍ଛି। ବାର୍ଦ୍ଧକ୍ୟଜନିତ କାରଣରୁ ପ୍ରେମା ଗତ ୩ ମାସ ଧରି ଅସୁସ୍ଥ ହେବା ଆରମ୍ଭ ହୋଇଥିଲା। ଗୁରୁବାର ତଳେ ପଡିଯାଇ ଚେଷ୍ଟା ସତ୍ତ୍ୱେ ଉଠିପାରି ନ ଥିଲା। ଓୟୁଏଟି, ଦିଲ୍ଲୀ ଓ ଆସାମର ବିଶେଷଜ୍ଞମାନଙ୍କ ପରାମର୍ଶକ୍ରମେ ପ୍ରେମାର ଚିକିତ୍ସା କରାଯାଇଥିଲା। ତେବେ ବ୍ୟବଚ୍ଛେଦ ପରେ ମୃତ୍ୟୁର ପ୍ରକୃତ କାରଣ ଜଣାପଡିବ ବୋଲି ନନ୍ଦନକାନନ ଉପନିର୍ଦ୍ଦେଶକ ସଞ୍ଜିତ କୁମାର କହିଛନ୍ତି।
