ପାପଡାହାଣ୍ଡି,୩୧।୧(ଡିଏନଏ): ନବରଙ୍ଗପୁର ଜିଲା ପାପଡାହାଣ୍ଡି କୋଷାଗୁମୁଡ଼ା-ସୋରିଷ ପଦର ବୁଲାଣି ରାସ୍ତାରେ ଏକ ଦୁର୍ଘଟଣା ଘଟିଛି। ଏକ ଅଟୋ ଓଲୋଟି ପଡିବାରୁ ତିନି ନାବାଳିକାଙ୍କ ସହ ୧୨ରୁ ଊର୍ଦ୍ଧ୍ୱ ଆହତ ହୋଇଛନ୍ତି । ଆହତଙ୍କ ମଧ୍ୟରୁ ଜଣେ ନାବାଳିକା ସହ ୩ ଜଣଙ୍କୁ ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି । ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି।
ସୂଚନା ଅନୁଯାୟୀ, ତାରାଗାଁ ପଞ୍ଚାୟତ ବୋଦାମୁଣ୍ଡା ଗ୍ରାମର ଜଣେ ଯୁବକଙ୍କ ସହ ପାପଡାହାଣ୍ଡି ବ୍ଲକ ଚେରଚେଟା ପଞ୍ଚାୟତ କଣ୍ଟାସାରୁ ଗ୍ରାମର ଯୁବତୀଙ୍କ ବିବାହ ପାଇଁ ଦିନ ଧାର୍ଯ୍ୟ ହୋଇଥିଲା। ସୋମବାର ବିବାହ ସରିବା ପରେ ବର ପକ୍ଷର ୨୦ ଜଣକୁ ଧରି ଏକ ଓଟୋ ନଂ.(ଓଡି୧୧କେ ୩୦୫୫ )ଗାଁକୁ ଫେରରୁଥିଲା। ସୋରିଷପଦର ବୁଲାଣି ନିକଟରେ ଅଟୋଟି ଭାରସାମ୍ୟ ହରାଇ ଜମିକୁ ଓଲଟି ପଡିଥିଲା। ଉକ୍ତ ରାସ୍ତାଦେଇ ଫେରୁଥିବା ପଦଲାମ ବିଷୋୟୀ ଏହା ଦେଖି ତୁରନ୍ତ ପୋଲିସକୁ ଖବର ଦେଇଥିଲେ। ପୋଲିସ ଘଟଣାସ୍ଥଳରେ ପହଞ୍ଚି ସ୍ଥାନୀୟ ଗ୍ରାମବାସୀ ସହାୟତାରେ ସମସ୍ତ ଆହତଙ୍କୁ ଉଦ୍ଧାର କରି ପାପଡାହାଣ୍ଡି ଗୋଷ୍ଠୀସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ। ଆହତ ହୋଇଥିବା ମଙ୍ଗଳ ଦେଇ ମୁଦୁଲି, ମକର ମୁଦୁଲି, ସଦନ ନାୟକ, ଜିତୁ ଯାନୀ, ସାତି ଯାନୀ, ମମତା ଯାନୀ, ଚମ୍ପା ମୁଦୁଲି, ଗୋମତୀ ଯାନୀ, ସ୍ବାଇଁ ମୁଦୁଲି, ବୁଦେଇ ଯାନୀ, ରୋପେଇ ମୁଦୁଲି, ଶ୍ୟାମ ସୁନ୍ଦର ଯାନୀଙ୍କ ପ୍ରାଥମିକ ଚିକିତ୍ସାପରେ ଘରକୁ ପଠାଇ ଦିଆ ଯାଇଛି। ନାବାଳିକା ମମତା ଯାନୀ, ଗୋମତୀ ଯାନୀ ଓ ମଙ୍ଗଳଦେଇ ମୁଦୁଲିଙ୍କ ସ୍ବାସ୍ଥ୍ୟଅବସ୍ଥା ଗୁରୁତର ଥିବା ଯୋଗୁ ସେମାନଙ୍କୁ ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି।
