ଓ୍ବାଶିଂଟନ,୨୨।୨ : ଏୟାର ଇଣ୍ଡିଆର ନ୍ୟୁୟର୍କ-ଦିଲ୍ଲୀ ବିମାନ ଏଆଇ -୧୦୬ ସ୍ବିଡେନର ଷ୍ଟକହୋମ ବିମାନବନ୍ଦରରେ ଜରୁରୀ ଅବତରଣ କରିଛି। ବିମାନରେ ଏକ ବୈଷୟିକ ତ୍ରୁଟି ଦେଖିବା ପରେ ଜରୁରୀକାଳୀନ ଅବତରଣ କରାଯାଇଥିବା କୁହାଯାଉଛି। ବିମାନରେ ଥିବା ସମସ୍ତ ୩୦୦ ଯାତ୍ରୀ ସୁରକ୍ଷିତ ଥିବା କୁହାଯାଉଛି। ସୂଚନା ପାଇବା ପରେ ବିମାନବନ୍ଦରରେ ବହୁ ସଂଖ୍ୟକ ଦମକଳ ଗାଡ଼ିକୁ ନିୟୋଜିତ କରାଯାଇଥିଲା।
ଏନେଇ ବେସାମରିକ ବିମାନ ଚଳାଚଳ ନିର୍ଦ୍ଦେଶାଳୟ (ଡିଜିସିଏ) ସୂଚନା ଦେଇଛି ଯେ ୩୦୦ ଯାତ୍ରୀଙ୍କୁ ନେଇ ଏକ ଏୟାର ଇଣ୍ଡିଆ ବିମାନ ବୁଧବାର ଆମେରିକାର ନ୍ୟୁୟର୍କରୁ ଦିଲ୍ଲୀ ଅଭିମୁଖେ ଯାତ୍ରା କରିଛି। ବିମାନଟି କିଛି ସମୟ ପାଇଁ ଆକାଶରେ ଉଡିବା ପରେ ହଠାତ ଏହାର ଗୋଟିଏ ଇଞ୍ଜିନରୁ ତେଲ ଲିକ ହେବାକୁ ଲାଗିଲା । ଏହା ପରେ ବିମାନଟି ସ୍ବିଡେନର ଷ୍ଟକହୋମ ବିମାନ ବନ୍ଦରରେ ଜରୁରୀ ଅବତରଣ କରିଥିଲା। ଅବତରଣ ପୂର୍ବରୁ ବିମାନବନ୍ଦରରେ ବହୁ ସଂଖ୍ୟକ ଦମକଳ ଗାଡି ନିୟୋଜିତ କରାଯାଇଥିଲା। କୁହାଯାଉଛି ଯେ ଜରୁରୀ ଅବତରଣ ନେଇ ଯାତ୍ରୀଙ୍କ ମଧ୍ୟରେ ଆତଙ୍କ ଖେଳିଯାଇଥିଲା।
ଏହାପୂର୍ବରୁ ଫେବୃଆରୀ ୨୦ ରେ ଦିଲ୍ଲୀରୁ ଦେଓଘରକୁ ଯାଉଥିବା ଇଣ୍ଡିଗୋ ବିମାନରେ ବୋମା ସମ୍ପର୍କରେ ସୂଚନା ପାଇବା ପରେ ଆଲୋଡ଼ନ ସୃଷ୍ଟି ହୋଇଥିଲା। ତରବରିଆ ଭାବେ ବିମାନଟି ଲକ୍ଷ୍ନୌର ଆମୌସି ବିମାନ ବନ୍ଦରରେ ଅବତରଣ କରିଥିଲା। ବିମାନକୁ ଆଇସୋଲେଶନ କରାଯାଇ ଘଟଣାର ତଦନ୍ତ କରାଯାଇଥିଲା। ଅନୁସନ୍ଧାନରେ କିଛି ନ ମିଳିବା ପରେ ବିମାନକୁ ଗନ୍ତବ୍ୟ ସ୍ଥଳକୁ ପଠାଯାଇଥିଲା।
ସେହିପରି ଫେବୃଆରୀ ୧୮ରେ, ସ୍ପାଇସଜେଟର ମୁମ୍ବାଇ-କାଣ୍ଡଲା ବିମାନକୁ ଯାନ୍ତ୍ରିକ ତ୍ରୁଟି କାରଣରୁ ବିମାନ ଉଡ଼ାଣ ପରେ ଜରୁରୀକାଳୀନ ଅବତରଣ କରିବାକୁ ପଡିଥିଲା। ଏକ କ୍ୟାବିନ ପ୍ରେସରାଇଜେଶନ ଆଲର୍ଟ ମିଳିବା ପରେ ସତର୍କତା ଅବଲମ୍ବନ କରି ବିମାନକୁ ମୁମ୍ବାଇକୁ ଫେରାଇବାକୁ ନିଷ୍ପତ୍ତି ଗ୍ରହଣ କରାଯାଇଥିଲା।
