କେନ୍ଦ୍ରାପଡ଼ା ଅଫିସ, ୧ା୧୧:ନ୍ୟାୟ ପାଇଁ ୮୦ ବର୍ଷର ବୃଦ୍ଧା ମାଆଙ୍କୁ ଟ୍ରଲିରେ ବୋହି ଜିଲାପାଳଙ୍କ କାର୍ଯ୍ୟାଳୟକୁ ନିଆଯାଇଛି। ପରିବାରର ସମସ୍ତ ଲୋକ ମାଆଙ୍କୁ କାର୍ଯ୍ୟାଳୟ ସମ୍ମୁଖରେ ଶୁଆଇ ଦେଇ ଗଣଧାରଣା ଦେଇଛନ୍ତି। କେନ୍ଦ୍ରାପଡ଼ା ବ୍ଲକ ବାରୁଅ ପଞ୍ଚାୟତର ଏହି ଦଳିତ ପରିବାରର ଦୁଃଖ କାହାଣୀ ଜିଲାପାଳଙ୍କ କାର୍ଯ୍ୟାଳୟ ପରିସରରେ ସୋମବାର ଦୁଃଖଦ ପରିସ୍ଥିତି ସୃଷ୍ଟି କରିଛି। ଗଁାର କେତେଜଣ ବ୍ୟକ୍ତିଙ୍କ ଅତ୍ୟାଚାରରେ ଦୁଇମାସରୁ ଊର୍ଦ୍ଧ୍ୱ ହେବ ଘର ଛାଡି ବାର ଦୁଆର ହେଉଥିବା ବାରୁଅ ଗଁାର ଅଶୋକ କୁମାର ମଲ୍ଲିକ କହିଛନ୍ତି, ଟ୍ରଲି ଟାଣିବା ସହ ମଜୁରି ଲାଗିଲେ ପରିବାର ପ୍ରତିପୋଷଣ ହୁଏ। ବାରୁଅ ଗ୍ରାମରେ ଥିବା ରାସ୍ତା ନିକଟରେ ତାଙ୍କର ନିଜସ୍ବ ସମ୍ପତ୍ତି ଉପରେ ଘର ଅଛି। ଏହି ଘରକୁ ଭାଙ୍ଗି ଗ୍ରାମର କେତେଜଣ ବ୍ୟକ୍ତି ରାସ୍ତା ନିର୍ମାଣ ପାଇଁ ଉଦ୍ୟମ କରୁଛନ୍ତି। ଏ ନେଇ କୋର୍ଟରେ ମାମଲା ହୋଇ ନିଜସ୍ବ ସମ୍ପତ୍ତି ଉପରେ ଘର ଥିବା ଦର୍ଶାଯାଇଛି। ଏହାସତ୍ତ୍ୱେ କେତେଜଣ ବ୍ୟକ୍ତି ଏହା ଉପରେ ରାସ୍ତା ନେବାକୁ କହି ଜୁଲାଇ ମାସରେ ଆକ୍ରମଣ କରିଥିଲେ। ଥାନାରେ ମାମଲା ସତ୍ତ୍ୱେ ଅଭିଯୁକ୍ତଙ୍କ ଉପରେ କାର୍ଯ୍ୟାନୁଷ୍ଠାନ ନିଆଯାଉନାହିଁ। ସେମାନଙ୍କୁ ଗଁାର କେତେଜଣ ବ୍ୟକ୍ତି ଘର ମଧ୍ୟରେ ପ୍ରବେଶ କରିବାକୁ ଦେଉ ନ ଥିବାରୁ ଅଢ଼େଇ ମାସ ଧରି ବାହାରେ କୌଣସି ଏକ ସ୍ଥାନରେ ପରିବାର ସଦସ୍ୟ ମୁଣ୍ଡ ଗୁଞ୍ଜୁଛନ୍ତି। ୮୦ ବର୍ଷର ବୃଦ୍ଧା ମାଆଙ୍କୁ ବାରମ୍ବାର ସ୍ଥାନ ପରିବର୍ତ୍ତନ କରାଇବା ଆଉ ସମ୍ଭବ ହେଉନାହିଁ। ମାଆଙ୍କ ସହ ପରିବାରର ସଦସ୍ୟ ଜିଲାପାଳଙ୍କ ଦୃଷ୍ଟି ଆକର୍ଷଣ ପାଇଁ ଗଣଧାରଣା ଦେଇଛନ୍ତି। ନ୍ୟାୟ ନ ପାଇବା ପର୍ଯ୍ୟନ୍ତ ଏଠାରେ ବସି ରହିବେ ବୋଲି ଅଶୋକ କହିଛନ୍ତି। ରିପୋର୍ଟ ଲେଖା ପର୍ଯ୍ୟନ୍ତ ଜିଲା ପ୍ରଶାସନର କୌଣସି ଅଧିକାରୀ ଗଣଧାରଣା ସ୍ଥଳକୁ ଯାଇନାହାନ୍ତି।
