ଛତ୍ରପୁର,୨୬ା୪(ଦିଲ୍ଲୀପ ସାମଲ): ପ୍ରତ୍ୟେକ ଦୁଇ ବର୍ଷକୁ ଥରେ ଛତ୍ରପୁର ସହରରେ ଶ୍ରୀ ଶ୍ରୀ ଶ୍ରୀ ମା ’ ବ୍ୟାଘ୍ରଦେବୀଙ୍କ ଯାତ୍ରା ଅନୁଷ୍ଠିତ ହୋଇଆସୁଛି। ଚଳିତବର୍ଷ ଏହି ଯାତ୍ରା ଏପ୍ରିଲ ୨୬ରୁ ମେ’ ୪ ପର୍ଯ୍ୟନ୍ତ ଅନୁଷ୍ଠିତ ହେବ। ଏଥି ନିମନ୍ତେ ଆରକ୍ଷୀ ପରିବାର ପକ୍ଷରୁ ସରିଛି ସମସ୍ତ ପ୍ରସ୍ତୁତି। ଏହି ଯାତ୍ରା ନବମ ଦିନ ବ୍ୟାପି ଅନୁଷ୍ଠିତ ହେବ। ଏପ୍ରିଲ ୨୬ ତାରିଖ ତଥା ରବିବାର ଦିଗ ବନ୍ଦନ ଓ ମା’ଙ୍କ ଆଜ୍ଞାମାଳ ଆବାହନ ହେବ। ମା’ ନିଜ ମନ୍ଦିରରୁ ଅସ୍ଥାୟୀ ମଣ୍ଡପରେ ବିଜେ କରିବେ। ସେଠାରେ ମା’ଙ୍କ ରୀତିନୀତି ଅନୁସାରେ ପୂଜାର୍ଚ୍ଚନା କରାଯିବ, ଯାତ୍ରାର ୫ମ ଦିନ ଗୁରୁବାରରେ ମା’ ବିଶ୍ରାମ ନେବେ। ଏହି ଅବସରରେ ଭକ୍ତମାନଙ୍କ ମନୋରଞ୍ଜନ ନିମନ୍ତେ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ସହିତ ମୀନା ବଜାର ରହିବ।
