ଅନ୍ୟକୁ ଭଲ ପାଇବା ଏବଂ ଇର୍ଷା କରିବା ଆଦି ସମ୍ବେଦନଶୀଳ ଗୁଣ ମଣିଷ ମଧ୍ୟରେ ରହିଥାଏ। ଏହା ଦ୍ୱାରା ମଣିଷ ଅନ୍ୟ ପ୍ରତି ସହାନୁଭୁତି, ଇର୍ଷା ଓ ଭଲ ପାଇବା ପ୍ରଦର୍ଶନ କରିଥାଏ। ପ୍ରେମର ପରିପ୍ରକାଶ ପାଇଁ ମଣିଷ ଚୁମ୍ବନ ଦେଇଥାଏ। ସେହିପରି ଅନ୍ୟ ସମ୍ବେଦନଶୀଳ ଗୁଣର ପରିପ୍ରକାଶ ଲାଗି ଭିନ୍ନ ଭିନ୍ନ ଉପାୟ ଅବଲମ୍ବନ କରିଥାଏ। ମଣିଷଙ୍କ ତୁଳନାରେ ପ୍ରାଣୀଙ୍କଠାରେ ଏଭଳି ଗୁଣ ଅଧିକ ଦେଖାଦେଇଥାଏ। ଏନେଇ ଭିଏନା ବିଶ୍ୱବିଦ୍ୟାଳୟରେ ହୋଇଥିବା ଏକ ଗବେଷଣା ରିପୋର୍ଟରେ ଉଲ୍ଲେଖ କରାଯାଇଛି। ମସ୍ତିଷ୍କର ଆକାର ଏବଂ ବିକାଶ ଅନୁସାରେ ପ୍ରାଣୀଙ୍କଠାରେ ଏସବୁ ଗୁଣ ଦେଖା ଦେଇଥାଏ। ପରସ୍ପର ମଧ୍ୟରେ ରହିଥିବା ସମ୍ପର୍କ ବିଷୟରେ ସୂଚନା ଦେବା ପାଇଁ ଏଭଳି ଗୁଣ ଏକ ପ୍ରାକୃତିକ ମାଧ୍ୟମ ବୋଲି ରିପୋର୍ଟ ଦର୍ଶାଯାଇଛି। ଖୁସି ହେଲେ ମଣିଷ ଶରୀରରେ ହରମୋନ୍ ଅକ୍ସିଟୋସିନ୍ କ୍ଷରଣ ହୋଇଥାଏ। ପ୍ରାଣୀଙ୍କ କ୍ଷେତ୍ରରେ ମଧ୍ୟ ଏଭଳି ହୁଏ। ହରମୋନ୍ର ପ୍ରଭାବରେ ପ୍ରାଣୀଙ୍କଠାରେ ସମ୍ବେଦନଶୀଳ ଗୁଣ ଦୃଷ୍ଟିଗୋଚର ହୋଇଥାଏ। ପ୍ରାଣୀମାନେ ପରସ୍ପରକୁ ଆଲିଙ୍ଗନ ଓ ଚୁମ୍ବନ ଦେଇ ନିଜ ନିଜ ମଧ୍ୟରେ ଥିବା ନିବିଡ଼ ସମ୍ପର୍କକୁ ସୂଚିତ କରନ୍ତି। ସେହିପରି କେତେକ ପ୍ରାଣୀ ସାଥୀ ପ୍ରତି ନିଜର ଭଲ ପାଇବା ପ୍ରକାଶ ପାଇଁ ତାଙ୍କୁ ଚାଟି ଥାନ୍ତି। କୁକୁର ଏବଂ ହାତୀଙ୍କ କ୍ଷେତ୍ରରେ ଇର୍ଷା ଏବଂ ଭଲ ପାଇବା ଗୁଣ ଅନ୍ୟ ପ୍ରାଣୀଙ୍କ ତୁଳନାରେ ଅଧିକ ରହିଥାଏ ବୋଲି ରିପୋର୍ଟରେ ଦର୍ଶାଯାଇଛି। ଜଙ୍ଗଲରେ ଦଳରେ ରହୁଥିବା ସିମ୍ପାଜିମାନେ ପରସ୍ପର ମଧ୍ୟରେ ମଣିଷ ଭଳି ଆଚରଣ ପ୍ରଦର୍ଶନ କରିଥାନ୍ତି। ତେବେ ମୂଷା ଏବଂ ଅନ୍ୟ ଛୋଟ ଛୋଟ ପ୍ରାଣୀଙ୍କଠାରେ ଏହା କମ୍ ରହିଥାଏ।
