କେନ୍ଦ୍ରାପଡ଼ା ଅଫିସ, ୧୯ା୯:ଦେଶ ବିକାଶରେ ସଡ଼କ ଯୋଗାଯୋଗ ପଥର ଭୂମିକା ଗୁରୁତ୍ୱପୂର୍ଣ୍ଣ। ଏଥିପାଇଁ ରାଜ୍ୟ ଓ କେନ୍ଦ୍ର ସରକାର ଯୋଜନା ପ୍ରଣୟନ କରି ଅନୁଦାନ ପ୍ରଦାନ କରୁଛନ୍ତି। ତେବେ ଏହି ଅର୍ଥ ତୃଣମୂଳସ୍ତର ପ୍ରକଳ୍ପରେ ନ ଲାଗି ଠିକାଦାର ଓ ସମ୍ପୃକ୍ତ ବିଭାଗୀୟ ଅଧିକାରୀଙ୍କ ପକେଟକୁ ଯାଉଛି। ଏପରି ଅଭିଯୋଗ ଆଳିଜଙ୍ଗା-ନାଗପୁରା-ନିଳିକଣା ରାସ୍ତା ନିର୍ମାଣ ବିପର୍ଯ୍ୟସ୍ତକୁ ନେଇ ସ୍ଥାନୀୟ ଅଞ୍ଚଳବାସୀ ଜିଲା ପ୍ରଶାସନ ନିକଟରେ ଏକ ଅଭିଯୋଗ ପତ୍ର ଶନିବାର ପ୍ରଦାନ କରିଛନ୍ତି। ଅଭିଯୋଗ ମୁତାବକ, ୭କିମି ୫ ମିଟର ରାସ୍ତା ପାଇଁ ୪କୋଟି ୭୨ ଲକ୍ଷ ଟଙ୍କା ଖର୍ଚ୍ଚ ହୋଇଥିବା ବେଳେ ୩ ବର୍ଷ ନ ପୂରୁଣୁ ଫାଟି ଅଁା କରିଛି। ଏହି ରାସ୍ତାର ଭିଜିଲାନ୍ସ ତଦନ୍ତ ଦାବି କରିବା ସହ ସମ୍ପୃକ୍ତ ଠିକାଦାର ଓ ବିଭାଗୀୟ ଅଧିକାରୀଙ୍କ ଉପରେ କାର୍ଯ୍ୟାନୁଷ୍ଠାନ ପାଇଁ ନିବେଦନ କରିଛନ୍ତି।
ଏ ସମ୍ପର୍କରେ ହରିହର ବେହେରା, ମନୋଜ କୁମାର ଦାସ, ଭାଗୀରଥି ଜେନାଙ୍କ ସହ ୫୦ରୁ ଊର୍ଦ୍ଧ୍ୱ ଅଭିଯୋଗକାରୀ କହିଛନ୍ତି, ପ୍ରକଳ୍ପର ଅର୍ଥ ହଡପ ଯୋଗୁ ଜୀବନଯାତ୍ରା ବ୍ୟାହତ ହେଉଛି। ୨୦୧୭ରେ ମୁଖ୍ୟମନ୍ତ୍ରୀ ଗ୍ରାମ ସଡ଼କ ଯୋଜନାରେ ଏହି ରାସ୍ତା ନିର୍ମାଣ ପାଇଁ ଗ୍ରାମ୍ୟ ଉନ୍ନୟନ ବିଭାଗ ଓ ଠିକା ସଂସ୍ଥା ସହ ଚୁକ୍ତି ହୋଇଥିଲା। ରାସ୍ତାର ଲମ୍ବ ୭ କି.ମି. ୫୦୦ ମିଟର ହୋଇଥିବା ବେଳେ ବ୍ୟୟ ଅଟକଳ ୪ କୋଟି ୭୨ ଲକ୍ଷ ଟଙ୍କା ଥିଲା। ଚୁକ୍ତି ମୁତାବକ ଠିକା ସଂସ୍ଥା ସୂଚନା ଫଳକ ଦ୍ୱାରା ପ୍ରକଳ୍ପର ସମ୍ୟକ ସୂଚନା ପ୍ରଦାନ ପାଇଁ ବ୍ୟବସ୍ଥା ଅଛି। ତେବେ ଏହି ସୂଚନା ଫଳକ ଏଠାରେ ଅଦ୍ୟାବଧି ଲାଗିନାହିଁ। ସେହିପରି ୨୦୧୮ରେ ପ୍ରକଳ୍ପ ଶେଷ ଅବଧି ଥିବା ବେଳେ ଏହାର ବହୁ ବିଳମ୍ବରେ ରାସ୍ତା ନିର୍ମାଣ ହେଲା। ସେହିପରି ପ୍ରକଳ୍ପ ପାଇଁ ମୋଟ ୪୦ ହଜାର ଟ୍ରିପ୍ ମାଟି ବ୍ୟବସ୍ଥା ହୋଇଛି। ଏହି ମାଟିରେ ନାଗପୁରା ପାଟ ମଧ୍ୟ ଦେଇ ଯାଇଥିବା ଗୋବରୀ ଘେରିବନ୍ଧକୁ ୩ ଫୁଟ ଉଚ୍ଚ ଓ ୨୦ ଫୁଟ ଚଉଡା କରିବାକୁ ଚୁକ୍ତି ପତ୍ରରେ ଉଲ୍ଲେଖ ଅଛି। ତେବେ ଅଦ୍ୟାବଧି ମାତ୍ର ୧ ହଜାର ଟ୍ରିପ୍ ମାଟି ପଡିଥିବା ବେଳେ ରାସ୍ତା ଚଉଡା ୧୨ରୁ ୧୫ ଫୁଟ ମଧ୍ୟରେ ସୀମିତ ରହିଛି। ରାସ୍ତାରେ ମାଟି ପକାଇ ଭାଇବ୍ରେଟର ସାହାଯ୍ୟରେ ଚପାଯିବା କଥା। ପରେ ୬ ଇଞ୍ଚ ବହଳର କଂକ୍ରିଟ ଡଷ୍ଟ ପଡି ରାସ୍ତାକୁ ସୁଗମ ପାଇଁ ଚୁକ୍ତିପତ୍ରରେ ବ୍ୟବସ୍ଥା ଅଛି। ତେବେ ଏଥିରେ ବହୁ ଅନିୟମିତତା ଥିବାରୁ ବିଭାଗୀୟ ଅଧିକାରୀ ଓ ଜିଲା ପ୍ରଶାସନର ଦୃଷ୍ଟି ଆକର୍ଷଣ କରାଯାଇଛି। ବାରୁଅ, କୋରୋ, ଓସ୍ତପୁର, କଂସାର ପଞ୍ଚାୟତବାସୀଙ୍କ ସହ ପଟ୍ଟାମୁଣ୍ଡାଇ, ଆଳି, ରାଜନଗର, ରାଜକନିକା ବ୍ଲକବାସୀଙ୍କ ପାଇଁ ଜିଲା ମୁଖ୍ୟ କାର୍ଯ୍ୟାଳୟ, ଜିଲା ମୁଖ୍ୟ ଚିକିତ୍ସାଳୟକୁ ଯାତାୟାତ ପାଇଁ ଏହା ଉପଯୁକ୍ତ ପଥ। ତେବେ ନିର୍ମାଣଗତ ତ୍ରୁଟି ଯୋଗୁ ପିଚୁ ଓ ଢଲେଇ ରାସ୍ତାଟି ଗତ ୩ ବର୍ଷ ମଧ୍ୟରେ ବିଭିନ୍ନ ସ୍ଥାନରେ ଫାଟି ଅଁା କରିଛି। ଏପରି କି ଗତ ଏପ୍ରିଲ ମାସରେ ନିର୍ମାଣ କରାଯାଇଥିବା ଗାର୍ଡ ୱାଲ ଭୁଶୁଡି ପଡିଛି। ମା’ ବରୁଣେଇ ପୀଠ ନିକଟ ସମେତ ଅନେକ ସ୍ଥାନରେ ଗାତ ସୃଷ୍ଟି ହୋଇଛି। ଚଳିତ ବର୍ଷାରେ ପାଣି ଜମି ରହିବାରୁ ଅନେକ ଦୁର୍ଘଟଣା ଘଟିଛି। ୫ ବର୍ଷ ପାଇଁ ମେଣ୍ଟେନାନ୍ସ ପାଇଁ ଚୁକ୍ତିପତ୍ରରେ ଉଲ୍ଲେଖ ଥିଲେ ମଧ୍ୟ ବିଭାଗୀୟ ଅଧିକାରୀଙ୍କ ସଲାସୁତରାରେ ଏହାର ନବୀକରଣ ପାଇଁ ପୁଣି ଥରେ ଅର୍ଥ ବ୍ୟୟ ପାଇଁ ମସୁଧା ଚାଲିଛି। ଏଥିପାଇଁ ସ୍ଥାନୀୟ ଅଞ୍ଚଳବାସୀଙ୍କ ପକ୍ଷରୁ ଦାବିପତ୍ର ଦିଆଯାଇଛି। କାର୍ଯ୍ୟାନୁଷ୍ଠାନ ବିଳମ୍ବ ହେଲେ ଜନ ଆନ୍ଦୋଳନ ହେବ ବୋଲି ସେମାନେ ମତ ଦେଇଛନ୍ତି। ଏ ସମ୍ପର୍କରେ ଏଡିଏମ୍ ପୀତାମ୍ବର ସାମଲଙ୍କୁ ପଚାରିବାରେ ଅଭିଯୋଗପତ୍ରକୁ ବିଭାଗୀୟ ଅଧିକାରୀଙ୍କ ନିକଟକୁ ପଠାଇ ଦିଆଯାଇଛି। ରିପୋର୍ଟ ଆସିବା ପରେ ପରବର୍ତ୍ତୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି।
