ମୁମ୍ବାଇ: ଅଭିନେତ୍ରୀ ଆଲିଆ ଭଟ୍ଟ ଖୁବ୍ଶୀଘ୍ର ତାଙ୍କ ନାଁ ପରିବର୍ତ୍ତନ କରିବାକୁ ଯାଉଛନ୍ତି। ଆଲିଆ ତାଙ୍କ ନାଁରେ ସ୍ବାମୀ ରଣବୀର କପୁରଙ୍କ ସର୍ନେମ ଯୋଡ଼ିବେ। ଆଲିଆ-ରଣବୀର ୨୦୨୨ ଏପ୍ରିଲରେ ବିବାହ କରିଥିଲେ। ଫିଲ୍ମ ‘ବ୍ରହ୍ମାସ୍ତ୍ର’ର ସେଟ୍ରେ ଏକାଠି କାମ କରୁଥିବାବେଳେ ସେମାନେ ପରସ୍ପର ନିକଟତର ହୋଇଥିଲେ। ଜୁନ ଶେଷରେ ଆଲିଆ ଗର୍ଭବତୀ ଥିବା ଘୋଷଣା କରିଥିଲେ। ଉଭୟ ନିଜ ସନ୍ତାନକୁ ସ୍ବାଗତ ପାଇଁ ପ୍ରସ୍ତୁତ ହେଉଛନ୍ତି।
ଏକ ସାକ୍ଷାତକାରରେ ଆଲିଆ କହିଛନ୍ତି, ତାଙ୍କ ସ୍କ୍ରିନ ନାମ ସବୁବେଳେ ଆଲିଆ ଭଟ୍ଟ ହେବ। କିନ୍ତୁ ସେ ଖୁବ୍ଶୀଘ୍ର କପୁର ପରିବାରରେ ଯୋଗ ଦେଇଥିବାରୁ ସେ ତାଙ୍କ ନାଁକୁ ଆଲିଆ ଭଟ୍ଟ-କପୁରରେ ପରିବର୍ତ୍ତନ କରିବେ। ତାଙ୍କ ପାସପୋର୍ଟରେ ନାମ ଅପଡେଟ କରି ସେ କହିଛନ୍ତି ମୁଁ ଏହା କରି ଖୁସି ଅଟେ।
ରଣବୀର ତାଙ୍କ ପାସପୋର୍ଟରେ ନିଜର ବୈବାହିକ ସ୍ଥିତିକୁ ତୁରନ୍ତ ବଦଳାଇବା ପରେ ଆଲିଆ କହିଛନ୍ତି , ବର୍ତ୍ତମାନ ଆମର ଏକ ସନ୍ତାନ ହେବାକୁ ଯାଉଛି। କପୁର ପରିବାର ଏକାଠି ଯାତ୍ରା କରୁଥିବାବେଳେ ମୁଁ ଆଉ ଭଟ୍ଟ ହେବାକୁ ଚାହେଁ ନାହିଁ; ତୁମେ ଜାଣ ମୁଁ କଣ ଚାହେଁ? ମୁଁ ଏକୁଟିଆ ଅନୁଭବ କରିବାକୁ ଚାହେଁ ନାହିଁ। ଆଲିଆ ଏବଂ ରଣବୀର ସେମାନଙ୍କ ଫିଲ୍ମ ‘ବ୍ରହ୍ମାସ୍ତ୍ର’ ରିଲିଜକୁ ଅପେକ୍ଷା କରିଛନ୍ତି।
ଏ ତ ଗଲା ଆଲିଆ-ରଣବୀରଙ୍କ ବ୍ୟକ୍ତିଗତ କଥା। ଯଦି ତାଙ୍କ ପ୍ରଫେଶନାଲ କଥା ଦେଖିବା ତେବେ ରଣବୀରଙ୍କୁ ‘ବ୍ରହ୍ମାସ୍ତ୍ର’ରେ ଶିବ ରୂପେ ଦେଖିବାକୁ ମିଳିବ, ଆଲିଆ ତାଙ୍କ ପ୍ରେମିକା ଈଶା ଭୂମିକାରେ ଅଭିନୟ କରୁଛନ୍ତି। ଏହି ଫିଲ୍ମର ନିର୍ଦ୍ଦେଶନା ଦେଇଛନ୍ତି ଆୟନ ମୁଖାର୍ଜୀ। ଏଥିରେ ବିଗ୍ ବି ଅମିତାଭ ବଚ୍ଚନ, ନାଗାର୍ଜୁନ ଏବଂ ମୌନୀ ରାୟ ପ୍ରମୁଖ ଭୂମିକାରେ ଅଭିନୟ କରିଛନ୍ତି। ଏହା ସେପ୍ଟେମ୍ବର ୨ରେ ପ୍ରେକ୍ଷାଳୟରେ ମୁକ୍ତିଲାଭ କରିବ।
