ଆଳି,୭ା୯(ଡି.ଏନ.ଏ): ରାଜ୍ୟ ସରକାର ପ୍ରଶାସନକୁ ଲୋକମାନଙ୍କ ନିକଟରେ ପହଞ୍ଚାଇବାକୁ ପ୍ରୟାସ କରୁଥିବା ବେଳେ ପ୍ରଶାସକମାନେ କିଭଳି ରହିବେ ସେ କଥା ଭୁଲି ଯାଉଛନ୍ତି। ସରକାର ଉନ୍ନୟନମୂଳକ କାର୍ଯ୍ୟରେ ଅର୍ଥ ବ୍ୟୟ ସାଙ୍ଗକୁ ଯୋଜନା କରୁଛନ୍ତି। କିନ୍ତୁ ଜଣେ ତହସିଲଦାରଙ୍କ କ୍ୱାର୍ଟର୍ସ ଦୀର୍ଘ ଏକ ଦଶନ୍ଧି ହେବ ଅବ୍ୟବହୃତ ହୋଇ ପଡ଼ିରହିଛି। ସେ କଥା କାହାରି ଦୃଷ୍ଟିରେ ନ ପଡ଼ିବା ଆଶ୍ଚର୍ଯ୍ୟ ବିଷୟ ହୋଇଛି। ଆଳିର ତହସିଲଦାରଙ୍କ ରହିବା ପାଇଁ ଠିକ୍ ତାଙ୍କ କାର୍ଯ୍ୟାଳୟର ସମ୍ମୁଖରେ ରହିଛି କ୍ୱାର୍ଟର୍ସ। କିନ୍ତୁ ଦୀର୍ଘ ଏକ ଦଶନ୍ଧି ଧରି ଏହି କ୍ୱାର୍ଟରର ମରାମତି କରାଯାଉ ନ ଥିବାରୁ ଏହା ଏକ ଭୂତକୋଠି ପରି ପଡ଼ିରହିଛି। କ୍ୱାର୍ଟର୍ସ ସାମ୍ନାରେ କୁଢ଼କୁଢ଼ ଅଳିଆ ଗଦା ହୋଇଛି। ଅପରପକ୍ଷେ ତହସିଲଦାରଙ୍କ କାର୍ଯ୍ୟାଳୟ ପରିସରରେ ଥିବା ଏକ ସାଧାରଣ ଘରେ ରହିବାକୁ ବାଧ୍ୟ ହେଉଛନ୍ତି। ଏହି ଘରଟିରେ କେବଳ ବର୍ତ୍ତମାନର ତହସିଲଦାର ନୁହନ୍ତି ତାଙ୍କ ପୂର୍ବରୁ ମଧ୍ୟ ଅନ୍ୟ ଦୁଇଜଣ ତହସିଲଦାର ରହି ନିଜର କାର୍ଯ୍ୟକାଳ ଏଠାରେ ସମାପ୍ତ କରି ଅନ୍ୟତ୍ର ଯାଇଛନ୍ତି। ଅନେକ ସମୟରେ ଜିଲାର ଉଚ୍ଚପଦସ୍ଥ ଅଧିକାରୀମାନେ ଏଠାକୁ ଆସୁଥିଲେ ମଧ୍ୟ ଏଥିପ୍ରତି ଦୃଷ୍ଟି ନ ପଡ଼ିବା ଆଶ୍ଚର୍ଯ୍ୟଜନକ ଘଟଣା ପରି ଜଣାପଡୁଛି। ଏ ସମ୍ପର୍କରେ ତହସିଲଦାର ତପନ ସେନାପତିଙ୍କୁ ପଚାରିବାରୁ କ୍ୱାର୍ଟର୍ସ ରହିବା ଉପଯୋଗୀ ନୁହେଁ। ଏ ନେଇ ବିଭାଗୀୟ ଅଧିକାରୀଙ୍କୁ ଜଣାଯାଇଛି। ଖୁବ୍ଶୀଘ୍ର ଏହି କାର୍ଯ୍ୟ ଆରମ୍ଭ ହେବ ବୋଲି ଜଣାଯାଇଛି। ତେବେ ଦେଖିବାକୁ ବାକି ରହିଲା କେବେ ତହସିଲଦାରଙ୍କ କ୍ୱାର୍ଟର୍ସର ପୁନରୁଦ୍ଧାର ହେଉଛି।
