ଲକ୍ଷ୍ନୌ,୧।୧୧: ଉତ୍ତରପ୍ରଦେଶ ବିଧାନସଭା ନିର୍ବାଚନ ପୂର୍ବରୁ ସମାଜବାଦୀ ପାର୍ଟି ପକ୍ଷରୁ ଅଖିଳେଶ ଯାଦବ ବଡ଼ ଘୋଷଣା କରିଛନ୍ତି। ଅଖିଳେଶ କହିଛନ୍ତି ଯେ, ସେ ଆସନ୍ତା ବିଧାନସଭା ନିର୍ବାଚନ ଲଢ଼ିବେନି। ରାଜ୍ୟର ବିଧାନସଭା ନିର୍ବାଚନରେ ସେ ନିଜକୁ ବ୍ୟସ୍ତ ରଖିବାକୁ ଚାହୁଁଥିବା କହିଛନ୍ତି। ତେଣୁ ନିଜେ ନିର୍ବାଚନ ଲଢ଼ିବେନି ବୋଲି ସୂଚନା ଦେଇଛନ୍ତି।
ସେହିପରି ରାଷ୍ଟ୍ରୀୟ ଲୋକ ଦଳ ସହିତ ମେଣ୍ଟ ନେଇ ସେ କହିଛନ୍ତି, ପ୍ରଥମେ ଆସନ ଭାଗବଣ୍ଟା ଉପରେ ନିଷ୍ପତ୍ତି ଗ୍ରହଣ କରାଯିବ। ପରବର୍ତ୍ତୀ ସମୟରେ ଏନେଇ ଅନ୍ୟ ପଦକ୍ଷେପ ଗ୍ରହଣ ହେବ।
୨୦୨୨ ଫେବୃୟାରୀ-ମାର୍ଚ୍ଚରେ ରାଜ୍ୟରେ ହେବାକୁ ଥିବା ବିଧାନସଭା ନିର୍ବାଚନକୁ ଦୃଷ୍ଟିରେ ରଖି ଅଖିଳେଶ ଭୋଟରଙ୍କ ନିକଟତର ହେବା ଲାଗି ରଥଯାତ୍ରା ଆରମ୍ଭ କରିଛନ୍ତି।
ଏହା ସହିତ ସେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ସରକାରଙ୍କୁ ଲଗାତାର ଟାର୍ଗେଟ କରିବାରେ ଲାଗିଛନ୍ତି। ରାଜ୍ୟରେ ଭାଜପା ନେତୃତ୍ୱାଧୀନ ସରକାର କେବଳ ଶୌଚାଳୟ ନିର୍ମାଣରେ ବ୍ୟସ୍ତ ରହିଛନ୍ତି। ରାଜ୍ୟ ସରକାର ଶିଳାନ୍ୟାସ କରି ଚାଲିଛନ୍ତି। ମାତ୍ର ମୁଖ୍ୟମନ୍ତ୍ରୀ ଯୋଗୀ ସରକାର କୌଣସି ପ୍ରକଳ୍ପର ଉଦ୍ଘାଟନ କରିବାକୁ ସକ୍ଷମ ହୋଇ ପାରୁ ନାହାନ୍ତି।
