ଗାବା,୧୯।୧: ଅଷ୍ଟ୍ରେଲିଆ ବିପକ୍ଷରେ ଭାରତର ଐତିହାସିକ ବିଜୟ ପରେ କାମଚଳା ଅଧିନାୟକ ଅଜିଙ୍କ୍ୟ ରାହାଣେ ଖୁସି ପ୍ରକଟ କରିଛନ୍ତି। ଏହି ବିଜୟର ଗୁରୁତ୍ୱ ଅଧିକ। ଏହାକୁ କିଭଳି କହିବି ତାହା ଜଣାନାହିଁ। ଦଳର ଖେଳାଳିମାନଙ୍କ ଉପରେ ମୁଁ ଗର୍ବ କରେ। ଆମେ ସର୍ବଶ୍ରେଷ୍ଠ ଦେବାକୁ ଚାହୁଁଥିଲୁ। ପରିଣାମ କ’ଣ ହେବ ତାହା ଭାବି ନ ଥିଲି। ବ୍ୟାଟିଂ କରିବାକୁ ଯାଇଥିବା ସମୟରେ ଚେତେଶ୍ୱର ପୂଜାରାଙ୍କୁ ତାହା ହିଁ କହିଥିଲି। ଆମକୁ ସାମାନ୍ୟ ଭାବେ ଖେଳିବାକୁ ହେବ। ମୁଁ ନିଜର ଶର୍ଟ ଖେଳିବି। ଜଣାଥିଲା ଆଗକୁ ପନ୍ତ ଏବଂ ମୟଙ୍କ ଆସିବେ। ପୂଜାରା ଚାପରେ ଥାଇ ବି ଯେଉଁଭଳି ଖେଳିଲେ ତାହା ଅବିଶ୍ୱସନୀୟ। ଶେଷରେ ପନ୍ତ ଚମକାଇଲେ ବୋଲି ରାହାଣେ କହିଛନ୍ତି।
ପ୍ରକାଶ ଯେ, ଭାରତ ପାଇଁ ନିର୍ଣ୍ଣାୟକ ଟେଷ୍ଟକୁ ଜିତିବା ସହଜ ନ ଥିଲା। ଆଡିଲେଡ୍ରେ ଲଜ୍ଜାଜନକ ପରାଜୟ ପରେ ଅଧିନାୟକ ବିରାଟ କୋହଲି ସ୍ବଦେଶ ଫେରି ଆସିଥିଲେ। ଏପରି ପରିସ୍ଥିତିରେ ଯୁବ ଖେଳାଳିଙ୍କ ଟିମ୍ ରାହାଣେଙ୍କ ତତ୍ତ୍ୱାବଧାନରେ ଭଲ ପ୍ରଦର୍ଶନ କରିଥିଲା। ଅନେକ ଖେଳାଳି ଆହତ ହେବା ସତ୍ତ୍ୱେ ଦଳ ୨-୧ରେ ସିରିଜ ବିଜୟ ହାସଲ କରିଛି।
