ନବରଙ୍ଗପୁର,୧୯ ।୬(ବି.ପ୍ର.): ଗୋଟିଏ ପଟେ ବିଳମ୍ବିତ ମୌସୁମୀ ଓ ଧାନ ବିହନ ଅଭାବ। ଅନ୍ୟ ପକ୍ଷରେ ନବରଙ୍ଗପୁର ଜିଲାରେ ଡିଜେଲ ମିଳୁନାହିଁ । କୃଷି କାର୍ଯ୍ୟରେ ବ୍ୟବହୃତ ଟ୍ରାକ୍ଟର ଓ ଡିଜେଲ ଚଳିତ ଯନ୍ତ୍ରାଂଶ ପାଇଁ ଚାଷୀ ଡିଜେଲ ଖୋଜିଲେ ମିଳୁ ନାହିଁ। ଅନ୍ୟପକ୍ଷରେ ନବରଙ୍ଗପୁର ଜିଲାର ସମସ୍ତ ଡାକ୍ତରଖାନାରୁ ପ୍ରତ୍ୟେକ ଦିନ ଆମ୍ବୁଲାନ୍ସ ମାଧ୍ୟମରେ ରୋଗୀ ଓ ଗୁରୁତରଙ୍କୁ ଅନ୍ୟତ୍ର ସ୍ଥାନାନ୍ତର କରାଯାଉଛି। ପୋଲିସ ପେଟ୍ରୋଲିଂ ଓ ଜରୁରୀକାଳୀନ ସେବାରେ ଗାଡି ବ୍ୟବହାର କରୁଛନ୍ତି। ସେହିଭଳି ମାଲ ପରିବହନ କରୁଥିବା ଟ୍ରକ୍ ଓ ଗାଡି ମଟରଗୁଡିକ ପେଟ୍ରୋଲ ପମ୍ପରେ ଡିଜେଲ ପାଉନାହାନ୍ତି। ରାସ୍ତାରେ ଗାଡ଼ି ଅଟକାଇ ଡିଜେଲ କେଉଁଠାରେ ମିଳିବ ଖୋଜି ବୁଲୁଛନ୍ତି। ଚାଷବାସ ସମୟରେ ଅନେକ ଚାଷୀ ଟ୍ରାକ୍ଟରକୁ ଘରେ ରଖିବାକୁ ବାଧ୍ୟ ହେଉଛନ୍ତି। ନବରଙ୍ଗପୁର ସହର ଓ ଉପକଣ୍ଠରେ ୧୦ଟି ପେଟ୍ରୋଲ ପମ୍ପ ରହିଥିବାବେଳେ ଗୋଟିଏ ପେଟ୍ରୋଲ ପମ୍ପରେ ଶୁକ୍ରବାର ୨୦ ହଜାର ଲିଟର ଡିଜେଲ ପହଞ୍ଚିଥିଲା । ଶନିବାର ସକାଳୁ ତାହାମଧ୍ୟ ସରିଗଲା। ଜିଲାରେ ଡିଜେଲ ସମସ୍ୟା ଏକ ସପ୍ତାହ ହେବ ଲାଗି ରହିଛି। ତେଣୁ କେନ୍ଦ୍ର ଓ ରାଜ୍ୟ ସରକାର ଏଥିପ୍ରତି ଗୁରୁତ୍ୱ ଦେଇ ପ୍ରତିକାର ବ୍ୟବସ୍ଥା କରନ୍ତୁ ବୋଲି ଦାବି ହେଉଛି।
