କଟକ ଅଫିସ,୨୨।୧: ଓଲିଉଡ୍ କଣ୍ଠଶିଳ୍ପୀ ହ୍ୟୁମାନ ସାଗର ଓ ତାଙ୍କ ସ୍ତ୍ରୀ ଶ୍ରୀୟା ମିଶ୍ରଙ୍କ ଘରୋଇ କଳି ପ୍ରସଙ୍ଗ ପୁଣିଥରେ ରୋଚକ ହୋଇଛି। ଶୁକ୍ରବାର ହ୍ୟୁମାନ ଓ ତାଙ୍କ ମା’ ଶେଫାଳୀ ସୁନା ଗଣମାଧ୍ୟମରେ ବୟାନ ଦେଇ ଶ୍ରୀୟାଙ୍କୁ ଫେରାଇ ଆଣିବାକୁ ଚାହୁଁଛୁ ବୋଲି କହିଥିବାବେଳେ ଶନିବାର ଶ୍ରୀୟା ଗଣମାଧ୍ୟମରେ ମୁହଁ ଖୋଲିଛନ୍ତି। ସେ ବି କମ୍ପ୍ରମାଇଜ ବା ବୁଝାମଣା କରିବାକୁ ରାଜି ଅଛନ୍ତି କହିବା ସହ ସେପଟୁ (ହ୍ୟୁମାନଙ୍କ ପଟୁ) ସେତିକି ହାତ ବଢ଼ିବା ଦରକାର ବୋଲି କହିଛନ୍ତି। ଅପରପକ୍ଷରେ ୨ ଦିନର ମହଲତ ପରେ କଟକ ମହିଳା ଥାନାରେ ଉଭୟେ ହାଜର ହେବାକୁ ନିଷ୍ପତ୍ତି ହୋଇଥିବାରୁ ରବିବାର ସେମାନେ ହାଜର ହୋଇଥାନ୍ତେ। ହେଲେ ରବିବାର ସାପ୍ତାହିକ ଛୁଟିଦିନ ଓ ସୋମବାର ନେତାଜୀ ଜୟନ୍ତୀ ପାଇଁ ମୁଖ୍ୟମନ୍ତ୍ରୀ କଟକ ଆସୁଥିବାରୁ ପୋଲିସ ପକ୍ଷରୁ ମଙ୍ଗଳବାରକୁ ଏହି ମାମଲା ରଖାଯାଇଥିବା ସୂଚନା ମିଳିଛି।
ଶ୍ରୀୟାଙ୍କୁ ମନାଇବା ଲାଗି ହ୍ୟୁମାନ ଓ ତାଙ୍କ ମା’ ଶେଫାଳୀ ଶୁକ୍ରବାର ଗଣମାଧ୍ୟମରେ ଯେଉଁ ବୟାନ ଦେଇଥିଲେ, ତାହାକୁ ଶ୍ରୀୟା ପୁଣି ଥରେ ଖଣ୍ଡନ କରିଛନ୍ତି। କମ୍ପ୍ରମାଇଜ୍ ପାଇଁ ରାଜି ଅଛୁ କହିଥିଲେ ବି ତାଙ୍କର ମନର କଥାକୁ ନିଃସଙ୍କୋଚରେ ପ୍ରକାଶ କରିବାକୁ କୁଣ୍ଠାବୋଧ କରିନାହାନ୍ତି। ହ୍ୟୁମାନ ଖ୍ରୀଷ୍ଟ୍ରିଆନ ହୋଇଥିବାବେଳେ ଶ୍ରୀୟା ହିନ୍ଦୁ ବ୍ରାହ୍ମଣ ପରିବାରର କନ୍ୟା। ଶ୍ରୀୟାଙ୍କ କହିବାନୁସାରେ ସେ ସିନ୍ଦୂର, ଅଳତା ପିନ୍ଧିବାକୁ ଚାହୁଁଥିବାବେଳେ ତାଙ୍କୁ ପିନ୍ଧିବାକୁ ଦିଆଯାଉ ନ ଥିଲା। ଜଗନ୍ନାଥଙ୍କୁ ପୂଜା କରିବା ଓ ଅବଢ଼ା ଖାଇବାକୁ ଚାହୁଁଥିବାବେଳେ ଶାଶୁଘରେ ମନା କରନ୍ତି। ଧର୍ମ ପରିବର୍ତ୍ତନ କରିବାକୁ ଶାଶୁଘର ଲୋକ ବାଧ୍ୟ କରନ୍ତି। ଶ୍ରୀୟାଙ୍କ କନ୍ୟାସନ୍ତାନକୁ ନେଇ ଶାଶୁଘର ଲୋକ ଖୁସି ନ ଥିବା ସେ କହିଛନ୍ତି। ଝିଅ ହେବାରୁ ଶାଶୁଙ୍କର ବହୁତ ଅବସୋସ ହୋଇଥିଲା। ହ୍ୟୁମାନ ବି ଖୁସି ନ ଥିଲେ। ଯେଉଁଥିପାଇଁ ସେ ଝିଅ ସହ ଭଲ ସମ୍ପର୍କ ରଖନ୍ତି ନାହିଁ ଓ ମାଡ଼ ମାରନ୍ତି। ଏହାବାଦ ଆମ ଦୁହିଁଙ୍କ ମଧ୍ୟରେ ତୃତୀୟ ଲୋକ ବି ଅଛନ୍ତି। ତୃତୀୟ ଲୋକଙ୍କ ସହ ତାଙ୍କ ସମ୍ପର୍କର ପ୍ରତ୍ୟକ୍ଷଦର୍ଶୀ ମୁଁ ନିଜେ। ହ୍ୟୁମାନ ଓ ତାଙ୍କ ମା’ ଉଭୟେ ନିର୍ଯାତନା ଦିଅନ୍ତି। ମୋ ସ୍ବାମୀ ଜଣେ ସେଲିବ୍ରିଟି। ସେ ଏବେ ବଡ଼ ଗାୟକ, ତାଙ୍କ ନଁାରେ ଏତେବଡ଼ ଅଭିଯୋଗ ଆଣିବି। ମୁଁ ଚାହୁଁ ନ ଥିଲି ତାଙ୍କ ନଁା ପଡୁ ବୋଲି। କିନ୍ତୁ ନିର୍ଯାତନା ଅସହ୍ୟ ହେବାରୁ ଥାନାକୁ ଗଲି। ସେଦିନ ବି ମହିଳା ଥାନାରେ କାଉନ୍ସେଲିଂକୁ ଯାଇଥିବାବେଳେ ସାଙ୍ଗରେ ଏଫ୍ଆଇଆର୍ ନେଇଥିଲି। ମାତ୍ର ସେଠାରେ ଏସିପି ସାର୍ ବୁଝାଇବା ପରେ ଫେରାଇ ଆଣିଛି। ହ୍ୟୁମାନ ମୋତେ ସ୍ତ୍ରୀର ମାନ୍ୟତା ଦେଇ ଫେରାଇ ନେଲେ ମୁଁ ନିଶ୍ଚିତ ତାଙ୍କ ପାଖକୁ ଯିବି ବୋଲି ଶ୍ରୀୟା କହିଛନ୍ତି।
