ବାରିପଦା ଅଫିସ,୨୪।୪: ମୟୂରଭଞ୍ଜ ଜିଲା ବୁଢ଼ାବଳଙ୍ଗ ନଦୀରୁ ବେଆଇନ ବାଲି ଉତ୍ତୋଳନ ଓ ପରିବହନକୁ ନେଇ ପୁଣି ବିବାଦ ଘେରରୁ ଆସିଛି ଜିଲା ପ୍ରଶାସନ। ମାସକ ପୂର୍ବରୁ ଦୁଇଟି ବାଲି ସଇରାତକୁ ନେଇ ନ୍ୟାସନାଲ ଗ୍ରୀନ ଟ୍ରିବ୍ୟୁନାଲ(ଏନ୍ଜିଟି) ରିପୋର୍ଟ ତଲବ କରିଥିବା ବେଳେ ପୁଣି ମହୁପୁରା ବାଲି ସଇରାତରୁ ବେଆଇନ ଉତ୍ତୋଳନ ଓ ପରିବହନକୁ ନେଇ ଏନଜିଟିରେ ମାମଲା ରୁଜୁ ହୋଇଛି। ଏ ନେଇ ବଡ଼ସାହି ବ୍ଲକ ଛେଳିଆ ଗ୍ରାମର ରାଧା ମୋହନ ସିଂଙ୍କ ଅଭିଯୋଗ କ୍ରମେ ମାମଲା (ନଂ.୪୦/୨୦୨୨/ଇଜେଡ୍) ରୁଜୁ ହୋଇଛି। ଜୁଡିସିଆଲ ମେମ୍ବର ଜଷ୍ଟିସ ବି.ଅମିତ ସ୍ଥହଲେକାର ଓ ଏକ୍ସପର୍ଟ ମେମ୍ବର ସାଇବଲ ଦାସଗୁପ୍ତାଙ୍କ ଖଣ୍ଡପୀଠରେ ମାମଲାକୁ ନେଇ ୩ଜଣ ଅଧିକାରୀଙ୍କୁ ପକ୍ଷଭୁକ୍ତ କରାଯାଇଛି। ଏ ସଂକ୍ରାନ୍ତରେ ଏକ ୫ଜଣିଆ କମିଟି ଗଠନ କରାଯାଇ ୪ସପ୍ତାହ ମଧ୍ୟରେ ତଦନ୍ତ କରି ରିପୋର୍ଟ ପ୍ରଦାନ କରିବାକୁ ମୟୂରଭଞ୍ଜ ଜିଲା ପ୍ରଶାସନକୁ ଏନ୍ଜିଟି ପକ୍ଷରୁ ନିର୍ଦ୍ଦେଶ ଦିଆଯାଇଛି ା ବଡ଼ସାହି ତହସିଲ ଅଧୀନ ବୁଢ଼ାବଳଙ୍ଗ ନଦୀର ମହୁପୁରା ବାଲି ସଇରାତକୁ ୨୦୧୬ରୁ ୫ବର୍ଷ ପାଇଁ ଲିଜ୍ ସୂତ୍ରରେ ପ୍ରଦାନ କରାଯାଇଛି। ମହୁପୁରା ସଇରାତରେ ଥିବା ଖାତା ନଂ. ୧୭୫, ପ୍ଲଟନଂ. ୨୫୩ରୁ ୧୩.୭୨ଏକର ସ୍ଥାନରୁ ପ୍ରତିଦିନ ୧୦ସିୟୁଏମ ବାଲି ଉତ୍ତୋଳନ ପାଇଁ ୩୧ମାର୍ଚ୍ଚ ୨୦୨୧ ପର୍ଯ୍ୟନ୍ତ ପରିବେଶ ମଞ୍ଜୁରୀ ମିଳିଥିଲା ା ମାତ୍ର ସମୟର ଅବଧି ସମ୍ପୂର୍ଣ୍ଣ ହେବା ପରେ ମଧ୍ୟ ଏକ ବର୍ଷଧରି ବାଲି ଉତ୍ତୋଳନ କରାଯାଉଥିବାରୁ ନିୟମ ଏହା ବର୍ହିଭୂତ ଅଟେ ବୋଲି ଅଭିଯୋଗରେ ଦର୍ଶାଯାଇଛି ା ଅପରପକ୍ଷରେ ଏହି ସଇରାତରେ ୩୬ହଜାର ୯୨୭ସିୟୁଏମ ବାଲି ଗଚ୍ଛିତ ଥିବା ବେଳେ ତହସିଲଦାର ଓ ମାଇନିଂ ଅଧିକାରୀ ମାତ୍ର ୨ହଜାର ସିୟୁଏମ ବାଲି ଗଚ୍ଛିତ ଥିବା ରେକର୍ଡରେ ଦର୍ଶାଇଥିଲେ। ୧ ମିଟର ଗଭୀର ହିସାବରେ ବର୍ଷକୁ ୨୨ଶହ ସିୟୁଏମ ବାଲି ଉତ୍ତୋଳନ କରିବାକୁ ଥିବା ବେଳେ ପ୍ରତିଦିନ ପ୍ରୋକଲିନ୍ ମେଶିନ ମାଧ୍ୟମରେ ନଦୀ ଗର୍ଭରୁ ୧୦ମିଟର ଖୋଳାଯାଇ ବେଆଇନ ଭାବେ ୨୦୪୦ସିୟୁଏମ ବାଲି ଉତ୍ତୋଳନ କରାଯାଇଛି। ଏହି କ୍ରମରେ ବର୍ଷକୁ ୪ଲକ୍ଷ ୨୮ହଜାର ସିୟୁଏମ ବାଲି ଖନନ ହେଉଥିବା ବେଳେ ଯାହାକି ଅନୁମତି ସୀମାର ବହୁ ଗୁଣ ଊର୍ଦ୍ଧ୍ୱରେ ବୋଲି ଅଭିଯୋଗରେ ଦର୍ଶାଯାଇଛି। ଏହା ଦ୍ୱାରା ସରକାରଙ୍କ କୋଟି କୋଟି ଟଙ୍କା ରାଜସ୍ବ ହରାଇଥିବା ଆକଳନ କରାଯାଇଛି। ମାମଲାର ପରବର୍ତ୍ତୀ ଶୁଣାଣି ମେ’୨୩ତାରିଖକୁ ଧାର୍ଯ୍ୟ କରାଯାଇଛି ା
